Read Navajo NEHEMIAH 5 Bible Online

NEHEMIAH 5 - Navajo bible

NEHEMIAH 5

¹Áádóó diné índa bida'asdzą́ą́ éí yił bik'isóó Jew dine'é danilíinii yik'ijį' danilį́įgo yéego saad dahasłį́į́'.

²Jó, ła' ádadííniid, Nihí, nihiye'ké áádóó nihitsi'ké t'óó adahonii'yóí; éí bąą tł'oh naadą́ą́' bá ninádahiijáah doo, áko da'iidą́ą'go dahinii'náa doo.

³Náánáła' éí ádadííniid, Doo nahałtingóó biniinaa nihidáda'ak'eh índa nihich'il na'atł'o'ii deíl'áhígíí áádóó danihikin bik'é tł'oh naadą́ą́' nihaa dahidoojih biniyé ąąh nidahii'nííł.

⁴Áádóó náánáła' ałdó' ádadííniid, Nihidáda'ak'eh índa nihich'il na'atł'o'ii deíl'áhígíí bik'é béeso éí aláahgo naat'áanii bich'į' nidahidiilyééł biniyé nihada'iisnil.

⁵Áko la' nihik'isóó t'áá hoł t'áá ahideiilkágí; niha'áłchíní ałdó' bada'áłchíní t'áá yił ahidaalkágí, áko la' nihiye'ké índa nihitsi'ké hanaalte' danilį́ biniyé haa dahii'níiłgo nihitsi'ké ła' t'áá íídą́ą́' hanaalte' danilį́, áko t'ą́ą́' náádahidiilnihgi doo bídaniil'ą́ą da, háálá nihidáda'ak'eh yę́ę índa nihich'il na'atł'o'ii deíl'á nít'éé' yę́ę diné náánáła' bee bídahólnííh.

⁶Áko hahóół'áhígíí índa díí saad diséts'ą́ą'go t'áá íiyisí bik'ee sháhóóchįįd.

⁷Áádóó baa nitsísíkéezgo índa aląąjį' naazíinii áádóó naat'áanii danilíinii dadítehgo ábidishní, T'ááłá'í nootínígo nihik'isóó danilíinii ínáoltą'í nidayiilé biniyé bidadoołkaal. Áádóó diné t'óó ahayóí hach'į' ninínil.

⁸Áko áhodííniid, Nihik'isóó Jew dine'é danilíinii ał'ąą dine'é bich'į' nidabi'diiznii' yę́ę t'áá bídaniil'ánígíí bik'ehgo t'ą́ą́' náádahiilnii'. Da' ákoósh nihik'isóó nihaa nidahidoonih? Éí doodago nihich'į'go daats'í nidahidoonih? Áko t'óó dadéesxéelgo t'áadoo yee hadaodziihí da.

⁹Áádóó ałdó' ádííniid, Kódaoht'ínígíí doo yá'át'éeh da; nihiDiyin God ts'ídá dadíínóhsingo deínóhkáah doo nít'éé', háálá ał'ąą dine'é nihi'ana'í danilíinii nihá nidahałt'i'.

¹⁰Shí áádóó shik'isóó índa shá nidaal'a'í daats'í ałdó' béeso áádóó tł'oh naadą́ą́' bik'é ínáoltą'í nihaa daha'níił doo nít'éé'; baa nánihooshkąąh, haa'íshą' ínáoltą'í nahalyéhígíí nidadiilt'ih.

¹¹Díí baa nánihooshkąąh: t'áá díí jį́ bidáda'ak'eh, ch'il na'atł'o'ii deíl'áhígíí, áliv tsin deíl'áhígíí, dabikin índa dabibéeso, tł'oh naadą́ą́', wáin, ak'ah neeznádiin daníjaa'ígíí éí t'ááłá'í shijaa' bíighahgo baa nídahididooh'ááł.

¹²Nít'éé' ádadííniid, Baa nídahidii'nił, áádóó doo yik'é nihich'į' nida'dooléeł da; t'áá ádííníniidígi ádadii'nííł. Áko nááda'iiłniihii hágo bidííniidgo binááł ádee hadahoyééłdzíí', Díí bee nihoot'áanii bik'ehgo ádadii'nííł.

¹³Shi'éé' ałdó' yígháadgo ádííniid, Diné t'ááłá'í jinítínígo díí bee hadzoodzí'ígíí doo bi'jiilaaígíí haghandóó áádóó nijilnishdóó Diyin God kót'éego hodooghałgo t'áá ákohígo nijigháa doo. Nít'éé' áłah daazlį́'ígíí t'áá ałtso Bóhólníihii yaa dahaniihgo ádadííniid, T'áá ákót'ée doo. Áádóó diné yee ádee hadadeesdzí'ígíí yik'eh ádaadzaa.

¹⁴Náá'áłdó' Júdah kéyahdi naat'áanii áshi'diilyaadóó t'áá éí aláahgo naat'áanii Artazérksiiz nant'áago naadiin náhááhdóó tádiindóó ba'aan naaki náháahjį', naakits'áadah nááhaigo shí áádóó shik'isóó bił aláahgo naat'áanii bich'iyą' t'áadoo deiidą́ą' da.

¹⁵Nidi t'áá shítséedi naat'áanii danilį́į́ nít'éé' yę́ę diné yąąh hadeitsih nít'éé', áádóó ch'iyáán índa wáin, béésh łigaii shékel wolyéii dízdiin dah hidiidloh óóltą'go nályééh át'éego yits'ą́ą́' nídayiilááh nít'éé'; bá nidaal'a'í nidi diné yindant'áá nít'éé', nidi shí t'áadoo ákósdzaa da, háálá Diyin God díínísin.

¹⁶T'áá aaníí shí éí tsé yitł'ingo bo'oonishígíí t'áá k'éséłt'i'; kéyah nidi t'áadoo ła' nidahaalnii' da; shá nidaal'a'í éí t'áá ałtso kwe'é t'áá ahąąh deílníísh nít'éé'.

¹⁷Áádóó ałdó' neeznádiindóó ba'aan ashdladiin Jew dine'é áádóó naat'áanii danilíinii índa ał'ąą dine'é nihinaagóó kéédahat'ínígíí bitahdę́ę́' ła' óóltą'go ná'áshdį́įhgi dah nídinibįįhgo nída'adį́į́h nít'éé'.

¹⁸Ła'a jį́įjį' béégashii t'ááłá'í áádóó dibé bitahaasdlá'ígíí hastą́ągo dadooghał biniyé ninádaatsi'go hasht'éédaal'įįh nít'éé', naat'agii ałdó' shá hasht'enál'įįh nít'éé', t'áá neeznáá néílkááh bik'eh éí wáin t'áá ał'ąą ádaat'éii hasht'e'niná'nił nít'éé'; azhą́ díí t'áá ałtso bee shi'doolzání nidi, naat'áanii bich'iyą' ła' wóshdę́ę́' t'áadoo dííniid da, háálá díí dine'é t'áá hojoobá'ígo deílníísh.

¹⁹ShiDiyin God nílíinii, yá'át'éehgo díí dine'é bá baa niséyáhígíí bik'ehgo yá'át'éehgo shaa nitsíníkees.