Read Navajo NEHEMIAH 8 Bible Online

NEHEMIAH 8 - Navajo bible

NEHEMIAH 8

¹Áko diné t'ááłá'í níyá nahalingo diné t'áá ałtso t'ááłáhígi ahíikai; tó bidáń'dítį́į́h bich'éédą́ą́'góó atiinígi áłah nilį́, áko bee haz'áanii yína'niłtinii Ézra, Mózes yee has'áanii naaltsoos bee si'ánígíí Bóhólníihii éí Ízrel dine'é yich'į' yee hahaasdzíi'ii díí'ááł, deidííniid.

²Áádóó tsosts'id nídízííd binih ła'a jį́į́ góne' diné áádóó asdzání índa da'íísts'ą́ą'go ak'idadi'yiitįįhii yidááhdóó náá'iiłniihii Ézra éí bee haz'áanii naaltsoos yiní'ą́.

³Áádóó tó bidáń'dítį́įhgi éí bich'éédą́ą́'góó atiinígi t'áá íiyisí t'ah abíínídą́ą́' ałní'ní'ą́ąjį' diné áádóó asdzání índa ak'idadi'yiitįįhii bich'į' bee haz'áanii bee bik'eda'ashchínígíí jííłta', áko diné t'áá ałtso éí bee haz'áanii naaltsoos bee si'ánígíí wólta'go ts'ídá hazhó'ó deidiizts'ą́ą́'.

⁴Bee haz'áanii yína'niłtinii Ézra éí bikáá'dóó yáti'ii tsin bee ályaii Diyin God bizaad yíídóołtah biniyé yikáá'dóó dah yiizį'; honish'náájígo hwíighahgóó éí Matitháíyah, Shííma, Anáíyah, Yuráíjah, Hilkáíyah índa Méíyasíyah naazį́; honishtł'ahjígo éí Piidéíyah, Mísheiyel, Malkáíyah, Héísham, Hashbádana, Zekaráíyah índa Miishálam naazį́.

⁵Áádóó Ézra éí diné t'áá ałtso binááł naaltsoos ąą ájiilaa; jó, diné bitisdi dah dzizį́; naaltsoos ąą ájiilaago diné t'áá ałtso deizį'.

⁶Áko Ézra éí Bóhólníihii Diyin God Ayóó'át'éii yaa haznih. Áádóó diné t'áá ałtso yadadidiilnii'go ádadííniid, T'áá ákót'ée doo, t'áá ákót'ée doo, áko diné yaa ádaadzaago Bóhólníihii yich'į' nidahałáago ni'jį' daneeshjool.

⁷Jéshuwa, Béínai, Sheriibáíyah, Jéímin, Ákab, Shábiithai, Hodáíjah, Méíyasíyah, Kiiláíta, Azaráíyah, Jázabad, Héínan, Piiláíyah índa Líívai dine'é éí ałdó' bee haz'áanii yaa dahoolne'go diné ak'idadi'yiitįįhgo ádayiilaa, áko diné t'áá ákwii naazį́.

⁸Áko naaltsoos biyi'dóó Diyin God bibee haz'áanii ts'ídá hazhó'ó yéélta' áádóó ááhyiłníinii nawólta'go baa hóóne' índa ak'idadi'yiitįįhgo ádayiilaa.

⁹Áádóó naat'áanii nilíinii Niihemáíyah áádóó Ézra, náá'iiłniihii áádóó bee haz'áanii yína'niłtinii nilį́įgo, índa Líívai dine'é nida'nitinii diné t'áá ałtso ádeidííniid, Díí jį́ Bóhólníihii nihiDiyin God bá hodílzingo oo'ááł; t'áadoo atínídadinohdleehí índa t'áadoo daahchaaí. Jó, diné t'áá ałtso saad bee haz'áanii deidiizts'ą́ą'go atídadineesdlį́į'go dáácha.

¹⁰Ákohgo ábizhdííniid, Nihílááh deínóhkááh, neesk'ahii daołghał, łikanii daohdlą́, ha'át'íhída t'áadoo bá hasht'e daalyaii éí ła' bich'į' bił ádahołe', háálá díí jį́ éí nihiBóhólníihii bá hodílzingo oo'ááł, índa t'áadoo yínííł danohłíní, háálá Bóhólníihii bibee ił hózhóonii bee danihidziil.

¹¹Áko Líívai dine'é danilíinii kódaaníigo diné deidiiłheel, Díí jį́ hodílzingo oo'ááł índa t'áadoo yínííł danohłíní.

¹²Áko diné t'áá ałtso da'dooyį́į́ł áádóó doodlį́įłii deidoodlį́į́ł índa doodį́įłii áádóó doodlį́įłii náánáłahgóó bił ádahozhdoolííł índa ayóó át'éego baa hózhóonii baa nizhdookah biniyé anídadziiskai, háálá saad bee hoł hóóne'ígíí nizhónígo bik'idazhdiitą́.

¹³Áádóó naaki jį́į́ góne' diné t'áá ałtso dabizhé'é aláahgo bídahólníhígíí áádóó nááda'iiłniihii índa Líívai dine'é éí bee haz'áanii ts'ídá hazhó'ó náádeízdóołts'įįł biniyé bee haz'áanii yína'niłtinii Ézra baa áłah dzizlį́į́'.

¹⁴Áko Bóhólníihii éí Mózes binahjį' yee haadzíi'ii díí bik'ída'dzista': tsosts'id nídízííd binih hodílzingo áłah ná'ádleeh bá náhoot'aahgo Ízrel dine'é chaha'oh yii' kéédahat'į́į doo

¹⁵áádóó kin hadaas'á t'áá ałtsogóó índa Jerúsalem kin haal'áagi baa nidahodołdlaadgo ádadohní, T'áá bik'e'ashchínígi át'éego chaha'oh ádadoohłííł biniyé dziłgóó dadohkáahgo áliv bits'áoz'a', nídíshchíí' bits'áoz'a', mértal sikaadii áádóó páam sikaadii bits'áoz'a' índa tsin naazkaadii t'áá íiyisí bi'iil díłch'ilii ch'ídahidoohxééł.

¹⁶Áko diné dah dahidiikaigo ił nidayiizyį́ áádóó t'ááłá'í nítínígo dahakin dabighą́ą́'góó áádóó dahakin dabich'éédą́ą́'góó áádóó Diyin God bikin bii' sohodizin bich'éédą́ą́'góó áádóó tó bidáń'dítį́hí bíighahgóó atiinígi índa Íífreiyim bidáń'dítį́į́h bíighahgóó atiinígi chaha'oh ádá ádayiilaa.

¹⁷Yisnááh dajílį́į́ nít'éé' yę́ędę́ę́' ninádadziiskaígíí t'áá ádzíłtso chaha'oh ádajiilaago éí biyi' dahaghan; jó, Nan biye' Jáshowa bíyoołkááł yę́ędóó díí jį́įjį' Ízrel dine'é t'áadoo ákódaadzaa da. Ayóó át'éego baa hoł dahózhǫ́.

¹⁸T'áá ákwíí jį́ ła'a jį́į́dóó nihoogháahjį' naaltsoos biyi'dóó Diyin God bibee haz'áanii ałdó' hach'į' náyóltah. Hodílzingo áłah ná'ádleeh baa nijikaigo tsosts'id néílkááh, áádóó tseebíí jį́į́ góne' ho'é'él'į' bik'ehgo t'áá íiyisí dahozdósingo iná'át'ááh.