Read Navajo NEHEMIAH 9 Bible Online

NEHEMIAH 9 - Navajo bible

NEHEMIAH 9

¹Áko íídą́ą́' díí yiziłígíí naadiin dį́į́'góó yoołkáałgo Ízrel dine'é dahodísingo doo da'ayą́ą́góó índa tł'oh azis dabi'ée'go áádóó łeezh yee daalbáago áłah nilį́.

²Áádóó Ízrel dine'é éí doo Ízrel dine'é danilíinii t'áá ałtso yits'áskai áádóó ádahodiilzee'go ádił nida'iiszí'ígíí yee ádaa ch'ídahwiist'ą́, índa dabizhé'é yę́ę doo ákwii ádáát'įįdii baa nidahodzisne'.

³Áko t'áá ákwii nidzizį́įgo abínídóó ałní'ní'ą́ąjį' naaltsoos biyi'dóó Bóhólníihii haDiyin God bibee haz'áanii dajííłta', áádóó ałní'ní'ą́ą́dóó i'íí'ą́ąjį' ádił nida'dziisí'ígíí bee ádaa ch'ídahodziist'ą́ áádóó Bóhólníihii haDiyin God bich'į' nidahodzisá.

⁴Ákohgo Líívai dine'é ła' Jéshuwa, Béínai, Kádmiyel, Shebanáíyah, Bánai, Sheriibáíyah, Béínai índa Kiinéínai éí ałk'i hoo'nilígi naazį́įgo Bóhólníihii haDiyin God chánahgo bich'į' sodazdoolzin.

⁵Áko Líívai dine'é danilį́įgo Jéshuwa, Kádmiyel, Béínai, Hashabnáíyah, Sheriibáíyah, Hodáíjah, Shebanáíyah índa Pethaháíyah ádadííniid, Daohsįįhgo Bóhólníihii nihiDiyin God baa dahohniihgo hool'áágóó ahóyéel'áa doo; nízhi' ayóó át'éii éí ak'ihojidlíii índa aa ha'niihii biláahgo ayóó át'éego baa ha'niih doo.

⁶Ts'ídá t'áá ni t'éiyá t'áá sáhí Bóhólníihii nílį́; yádiłhił aghá ánízáadii índa biyi'di dahólóonii t'áá ałtso áádóó nahasdzáán índa bikáá' hólóonii t'áá ałtso, tónteel índa biyi'di dahólóonii t'áá ałtso íinilaa; ákohgo t'áá ałtso baa áhólyą́; yá'ąąshdi diyingo naal'a'í dah deínéehii t'áá ałtso nich'į' nidahałá.

⁷Bóhólníihii Diyin God nilíinii nílį́. Ni lą́ą Éíbram ats'éíníłtį́įgo Kaldíya kéyah bikáa'di Er kin haal'áádóó bił ch'ííní'áazhgo Éíbraham bee yíínízhi',

⁸áádóó níníł'į́įgo bijéí ba'ahódlíigo nił bééhoozin áádóó bił aha'díínít'ą́ągo Kéínan dine'é, Het dine'é, Ámor dine'é, Píírez dine'é, Jííbas dine'é áádóó Gérgash dine'é dabikéyah ha'áłchíní ahoolchíiłii baa didíí'áałgo bee hwiinił'a' índa ádííníniidígi át'éego íinidzaa, háálá t'áá ákogi áánííł.

⁹Ákohgo danihizhé'é yę́ę Ííjip kéyahdi bich'į' nidahwii'náago yiniłtsą́ áádóó Tónteel Łichíi'ii bíighahgi nída'ookąąhgo disíníts'ą́ą́',

¹⁰áádóó bee éédahózinii índa álílee ayóó ádaat'éii Féro bik'ijį' kwíinilaa, índa bá nidaal'a'í t'áá ałtso áádóó bikéyahgi diné kéédahat'ínígíí t'áá ałtso bik'ijį' ádeinilaa, háálá nił bééhózingo ádaa daha'niihgo doo ts'ííd ádahóół'įįd da. Áko nízhi' bééhózíní íinilaa, díí jį́ át'éhígi át'éego.

¹¹Bidááhgóó tónteel aháíníłk'olgo tónteel bita' gónaa łeezh yíłtsei yikáá' ha'naa niníná, índa bik'ee nidanoochą́ą'ii éí tó ayóó íídéetą́ą'ii tsé biih jiyííłhanígi át'éego táłtł'ááh hwííníghaz.

¹²Áádóó náá'ákóne' yí'ishgo bikáa'di jį́įgo k'os níyizgo yilzhoł, índa tł'ée'go éí yinééłgóó bee bá hool'in doo biniyé bikáa'di kǫ' níyizii bik'ehgo yííní'eezh.

¹³Náá'áłdó' Dził Sáínai bighą́ą'di hadah hwííníle'go yá'ąąshdę́ę́' bich'į' háínídzíí' áádóó t'áá ákóne' át'éego bee nihodiit'aahii áádóó t'áá aaníí bee nahaz'áanii índa yá'át'éehgo bee nihoyíní'áanii áádóó bik'eh ó'oo'níiłii haa dííní'ą́,

¹⁴áádóó hodiyingo niháá'áyį́į́h jį́ bił béédahózingo íinilaa índa bik'ehgo iináanii áádóó bee nihoyíní'áanii índa bee nahaz'áanii ná naal'a'í Mózes binahjį' bee bich'į' hahíínídzíí',

¹⁵índa dichin danilį́įgo yá'ąąshdę́ę́' bááh baa dííní'ą́ áádóó dibáá' danilį́įgo tsé bii'dę́ę́' tó bá háálį́įgo íinilaa, áádóó, Kéyah baa didíí'áałgo bee ádee hadíínídzíi'ii nihílááh biih wohnéehgo nihíí' daóle', bidiníigo bich'į' háínídzíí'.

¹⁶Nidi bí áádóó danihizhé'é yę́ę ádaa daha'niihgo índa doo nabída'didzilgóó nibik'eh ó'oo'níiłii doo dayíists'ą́ą' da,

¹⁷doo t'áá k'ad ak'eh dahóół'įįd da, índa bitahgi álílee k'ehgo ayóó ádaat'éii baa nisíníyáhígíí doo t'áá k'ad yaa nitsídaazkéez da, nidi doo nibída'didzilgóó áádóó dooda yee nidaalteehgo yisnááh danilį́į́ nít'éé' yę́ęgóó náboo'ish dooleełii ła' ádá nideistį́, nidi ni Diyin God nílíinii, ádił ni'iidzííh tsxį́įłgo yóó'anídiyí'aahii áádóó jiiníba'ii áádóó aa a'ááh nízinii áádóó tąądee báháchįįhii índa t'áá íiyisí nił hadlee'go jooba'ii nílį́, áko doo yóó'adahodííní'ą́ą da.

¹⁸T'áá aaníí óola doolyį́į'go béégashii yáázh ádá ádayiilaago, Díí nihiDiyin God éí Ííjip kéyahdę́ę́' ch'ínihiní'eezhii át'į́, dadííniidgo ayóó át'éego doo ílį́į́góó ádáát'įįdígíí yee hádahóółchįįd;

¹⁹azhą́ ákót'ée nidi, ayóó át'éego baa a'ááh nínízingo honoojíidi t'áadoo yóó'ahodííní'ą́ą da: jį́įgo hakáa'di k'os níyizgo yildohgo bik'ehgo joonéłígíí t'áadoo hats'ą́ą́' yóó'eelzhóod da, índa tł'ée'go hakáa'di kǫ' níyizii bik'ehgo joonééłgóó bee hool'inii t'áadoo hats'ą́ą́' dahodiile' da.

²⁰Áádóó ałdó' ninábintįįh dooleeł biniyé niNíłch'i Diyinii jooba'ii baa nídí'ááh nít'éé' áádóó deidooyį́įłii bá mána wolyéii doo bits'ábíínílnáa da nít'éé' índa dibáá' danilį́įgo tó baa hidí'aah nít'éé'.

²¹T'áá aaníí honoojíidi baa áhólyą́ągo dízdiin nááhai, áko t'áadoo yídin danilíní da nít'éé'; dabi'éé' éí t'áadoo dadiizhaazh da, dabikee' éí t'áadoo daniichaad da.

²²Náá'áłdó' kédaayah áádóó dadine'é t'áá bił bee hódahólníih doo biniyé kéyah nidahós'a' t'áá át'é bá bitaa hosínízo, áko Héshban kin haal'áádóó aláahgo naat'áanii Sáíhan wolyéii bikéyah índa Béíshan kéyahdóó aláahgo naat'áanii Ag wolyéii bikéyah hwíí' daazlį́į́'.

²³Yádiłhił biyi' di sǫ' yíl'áhígi át'éego bada'áłchíní ałdó' k'ee'ąą díníníłt'ą́, índa kéyah hóó' dadooleeł biniyé biih dazhdoonéełgo dahazhé'é yę́ę baa dííní'áanii biih hwííní'eezh.

²⁴Áko Ízrel dine'é éí kéyah yiih yínáago bíí' daazlį́į'go éí kéyah yii' kéédahat'į́į́ nít'éé' yę́ę Kéínan dine'é bik'eh dínídlį́į́', áko t'áá hó daznízinígi át'éego ádazhdoolííł biniyé éí kéyahdóó aláahgo naat'áanii danilíinii índa dadine'é hálák'ee dadííní'ą́.

²⁵Áádóó bidziilgo kin hadaas'áii índa kéyah bikáá' nida'nt'ą'ii nishódadziyoost'e' áádóó yá'ádaat'éehii t'áá ałtso kin bii' hadadeezbingo áádóó tó t'áá áłdįįd hadahaas'nilgo áádóó ch'il na'a'tł'o'ii deíl'áago áádóó áliv deíl'áago índa tsin naazkaadii bineest'ą' ał'ąą ádaat'éii t' óó ahayóigo hwíí' daazlį́į́', áko da'jiyą́ągo hwiih nídajidleeh áádóó hoda'niilk'ai índa ayóó át'éego jiiníba'ígíí bąą hoł nidahoozhǫǫh nít'éé'.

²⁶Azhą́ ákót'ée nidi, doo ak'eh dahóół'įįd da índa nich'į' nidaalteehgo nibee haz'áanii yaa dáádiikai áádóó nich'į' dah nídahizhdidookah biniyé doo ákǫ́ǫ́ ádáát'įįdii éí ná dahalne'ii yee bił nídahoolne' yę́ę nideistseed índa ayóó át'éego doo ílį́į́góó ádáát'įįdígíí yee ná dahóółchįįd.

²⁷Éí bąą hoda'ana'í bílák'ee hodííní'ą́ągo ti'dahoyoosnii', áádóó hach'į' nidahwii'náago hoolzhish yę́ędą́ą́' nídanookąąhgo yá'ąąshdę́ę́' dahodisíníts'ą́ą́', áádóó lą'ígóó aa a'ááh nínízinii bik'ehgo yisdáda'iiníiłii haa dadííní'ą́; éí hoda'ana'í bits'ą́ąjį' yisdádahwiiznil.

²⁸Nidi háádaasyį́į́'dóó bik'ijį' ninááł doo yá'áshónígi ánáádáát'įįd; éí bąą hoda'ana'í t'áá biyaa dziznilgo áhwiinilaa, áko éí hwee ádídahólnííh nít'éé', nidi nich'į' dah nídahidiikaigo áádóó nídanooskango yá'ąąshdę́ę́' dahodisíníts'ą́ą́' índa haa a'ááh nínízinígíí bik'ehgo lą'ídi yisdáhwííníjaa',

²⁹áádóó nibee haz'áanii bik'eh náádahojíł'į́įgo baa náhoyí'éesh doo biniyé bee hwi'ííníłnii' nít'éé'; azhą́ ákót'ée nidi, ádaa daha'niihgo nibik'eh ó'oo'níiłii doo dayíists'ą́ą' da, nidi ádił nida'iilzíihgo nibee nihodiit'aahii yik'ijį' danilį́į́ nít'éé', (éí diné yik'ehgóó áát'įįdgo yee hináa doo;) éí yich'į' ádił nída'alnaad nít'éé' áádóó doo nibída'didzil da nít'éé' índa doo t'áá k'ad da'diizts'ą́ą' da.

³⁰Nidi lą'í nááhaigóó ha'íínílníigo hoolzhiizh áádóó hak'ijį' nílį́įgo ná dahalne'ii niNíłch'i Diyinii bii' dahólóonii bee hoł dahwíínílne', nidi doo dajíists'ą́ą' da; éí bąą kéyah naaznilgóó dine'é danilíinii bílák'ee dahodííní'ą́.

³¹Nidi ayóó át'éego aa a'ááh nínízinígíí bąą t'áadoo áhosíníłdįįd da índa t'áadoo yóó'ahodííní'ą́ą da, háálá Diyin God t'áá íiyisí jooba'ii índa aa a'ááh nízinii nílį́.

³²Éí bąą k'ad, nihiDiyin God nílíinii, Diyin God ayóó'át'éii áádóó bidziilii índa bik'e'íyée'ii nílíinii, bee aha'deet'áanii bi'íínísinii áádóó aa a'ááh hasin bee ááníiłii nílíinii, Asíriya dine'é aláahgo binanit'a'í dah nídahidinoobįįł yę́ędóó díí jį́įjį' nihí áádóó aláahgo nihindanit'a'í áádóó nihinanit'a'í danilíinii áádóó nihá nááda'iiłniihii, íinínízinii yee nihił dahalne'ii áádóó danihizhé'é yę́ę índa nidine'é t'áá ałtso nihich'į' dahodiis'ná'ígíí t'áá át'é t'áadoo t'įįhdígo át'éego baa nitsíníkeesí.

³³Ákondi ánihi'diilyaaígíí t'áá ałtso bee t'áá ákogi ánít'į́, háálá ni t'áá ákogi áánííł, nidi nihí éí doo yá'áshǫ́ǫ́góó ádeii'nííł,

³⁴áádóó aláahgo nihindanit'a'í áádóó nihinanit'a'í danilíinii áádóó nihá nááda'iiłniihii índa danihizhé'é yę́ę nibee haz'áanii doo yik'eh dahóół'įįd da, áádóó nibik'eh ó'oo'níiłii índa bee hahínídzíi'ii éí bee hak'ijį' nílį́įgo háínídzí' ígíí doo dayíists'ą́ą' da.

³⁵Jó, bee hódahólníihgo haz'ą́ą́dóó áádóó t'áá íiyisí yá'ádaat'éehii índa kéyah hótsaago bikáá' áda'azįįdii baa dííní'áanii éí bikáá'góó t'áadoo ná nidaas'a' da, índa doo yá'áshǫ́ǫ́góó ádaaníiłii t'áadoo yits'áhaaskai da.

³⁶Jó, díí jį́ ná nidaal'a'í daniidlį́, áádóó kéyah bikáá'dóó aneest'ą' danilíinii índa yá'át'éehii danihizhé'é yę́ę deiyą́ą doo biniyé baa dííní'áanii, shoo, éí biyi' ná nidaal'a'í daniidlį́;

³⁷ádił nida'ayiilzí'ígíí biniinaa aláahgo naat'áanii nihindant'áago ádeinilaaígíí éí kéyah bikáá'góó t'óó ahayóí bá nida'nt'ą' áádóó ałdó' baa bił dahózhǫ́ǫgo nihits'íís índa danihilį́į́' yee ádídahólnííh, áko nihí éí t'áá íiyisí ádił nitsiniikai.

³⁸Díí t'áá ałtso biniinaa bee aha'deet'áanii t'áá aaníí nilíinii ádeiilnéehgo ak'eda'iilchí; éí nihinanit'a'í danilíinii áádóó Líívai dine'é índa nihá nááda'iiłniihii dabízhi' yikáá' ádeidoolííł.