Read Navajo ESTHER 1 Bible Online

ESTHER 1 - Navajo bible

ESTHER 1

¹Ákódzaago Ahazawííras bíyoołkááłdą́ą́' (díí Ahazawííras nant'áago éí Índiya kéyahdóó Iithiyópiya kéyahjį' t'ááłáhídi neeznádiindóó ba'aan naadiin tsosts'idgo aláahgo bee ídahólníihgo bił nahaz'áanii bee bóhólnííh nít'éé'),

²éí yoołkááłdą́ą́' aláahgo naat'áanii Ahazawííras bibik'i dah asdáhí ayóó át'éii yikáá' dah sidáago, Shúshan kin haal'áagi bił haz'ą́ą́ nít'éé'.

³Nant'áago táá' náhááh góne' hayaadóó aláahgo bídahólníihii áádóó hanaal'a'í danilíinii bá ída'jíísįįd; Pérzha dine'é áádóó Míídiya dine'é bisiláo yindanit'a'í áádóó aghá dahideezíinii índa bee ídahólníihii bił nahaz'áanii binaat'áanii danilíinii t'áá ałtso haa áłah silį́į́'.

⁴Ayóo ajit'į́įgo bee haa ha'niihii áádóó ts'ídá aláahgo bee hóhólníihii hólónígíí bá daníl'į́įgo t'óó ahayóí yiską́; t'áá éí neeznádiindóó ba'aan tseebídiin yiską́.

⁵Áko díí bíighah niiníłką́ągo Shúshan kin haal'áagi aláahgo naat'áanii bighan binaagóó hootsogo haz'ánígi aláahgo naat'áanii éí diné ayóó ádaat'éii índa ayáhígo ádaat'éii t'áá ałtso tsosts'id jį́ yá ída'asįįd.

⁶Naak'ą' łigaii áádóó tátł'id nahalingo dootł'izhígíí índa yá nahalingo dootł'izhígíí ahéédaníbaal índa áłts'óózígo yisdizígíí łigaii dits'idgo ályaii áádóó tsídídééh nahalingo łichíi'go bee tł'óółts'ósí ályaa; éí béésh łigaii nídaazbąsgo ádaalyaii bee dah dahidídlo', áádóó tsé nitł'izii bídazdilidgo bee yada'iitł'ingo ádaalyaii, áádóó bik'i dah antéhé óola índa béésh łigaii bee ádaalyaa índa ni'góó sikaadii éí tsé dantł'izii dadilkǫǫhígíí, daalchíí' áádóó yá nahalingo dootł'izhígíí áádóó daalgaii índa daalzhinii, áádóó diichiłí ílíinii bee ályaa.

⁷Óola bee adlání bee da'joodlą́ą́' (éí óola bee adlání t'áá ał'ąą ádaat'éé nít'éé'), índa aláahgo naat'áanii bik'ehgo wáin bee ída'íízįįd.

⁸Bee haz'áanii bik'ehgo t'éí da'jidlą́ą́ nít'éé'; doo bóhodi'nilchéehgo ázhdoodlį́įł da, háálá aláahgo naat'áanii bee bóhólníihgo bił haz'ą́ągi diné t'ááłá'í nítínígo deinízinígíí bik'ehgo ádaat'į́į doogo yee haadzíí'.

⁹Asdzą́ą́ naat'ááh Váshtai éí asdzání danilíinii yá ída'íísįįd. Éí aláahgo naat'áanii Ahazawííras bikin si'ą́ągi yaa na'azh'eezh.

¹⁰Tsosts'id jį́ aleeh góne' aláahgo naat'áanii wáin bił honiiłdoigo bijéí bił nihoozhǫǫhgo díí yee haadzíí': Miihóman, Bíztha, Harbóna, Bígtha, Abágtha, Zííthar índa Kárkas éí aláahgo naat'áanii Ahazawííras áhánígo tsosts'id yilt'éego bá nidaal'a'ígíí

¹¹éí asdzą́ą́ naat'ááh nilíinii naat'á ch'ah bich'ahgo aláahgo naat'áanii bidááhdóó bił nidazhdookah, áko bee yá'ájít'éehii éí diné danilíinii áádóó aláahgo bídahólníihii bich'į' ádééhozdoolzįįł, háálá asdzání baa dzólníinii jílį́.

¹²Nidi asdzą́ą́ naat'ááh Váshtai éí aláahgo naat' áanii bá nidaal'a'í yinahjį' yee haadzíi'ii bik'ehgo aláahgo naat'áanii yich'į' nidoogáłígíí doo yinízin da; éí bąą aláahgo naat'áanii ayóo báhóóchįįd, áko báhóóchįįdígíí yee ádiniilchxii'.

¹³Ákohgo aláahgo naat'áanii éí diné dahóyáanii dahwéelzhíísh bił béédahózinígíí yich'į' haadzíí', (jó, aláahgo naat'áanii éí bee haz'áanii áádóó ánihodiit'aah bił béédahózinii yił na'ak'íyádaałti' łeh,

¹⁴áko diné hakéé' góne' naazíinii éí Kárshiina, Shííthar, Ádmatha, Társhish, Míírez, Marsíína índa Miimúkan daolyé; éí Pérzha dine'é áádóó Míídiya dine'é yinanit'a'í danilíinii tsosts'id yilt'éego aláahgo naat'áanii bił nída'ahidziiltsééh áádóó aláahgo bee bóhólníihgo bił haz'ą́ągi bił aláahgo hódahólnííh nít'éé'),

¹⁵áko áhodííniid, Asdzą́ą́ naat'ááh Váshtaishą' bee haz'áanii bik'ehgo haa dadiilnííł? Jó, aláahgo naat'áanii Ahazawííras bá nidaal'a'í binahjį' hach'į' haadzíi'ii doo yik'eh hóół'įįd da.

¹⁶Ákohgo Miimúkan éí aláahgo naat'áanii áádóó aláahgo bídahólníihii binááł ázhdííniid, Asdzą́ą́ naat'ááh Váshtai éí doo aláahgo naat'áanii t'éiyá yich'į' doo ákǫ́ǫ́ áát'įįd da, nidi aláahgo bídahólníihii áádóó aláahgo naat'áanii Ahazawííras t'áá át'é bił nahaz'ą́ągi kéédahat'íinii t'áá ałtso ałdó' yich'į' doo ákǫ́ǫ́ áát'įįd da.

¹⁷Háálá asdzą́ą́ naat'ááh kódzaaígíí éí aláahgo naat'áanii Ahazawííras bidááhdóó nidahodoolóosgo yee haadzíi'ii t'áadoo níyáa daígíí bee baa hodeezne'go bąą asdzání t'áá ałtso bił béédahoozingo asdzání danilíinii badahastiin doo bił danilį́į́góó íidoolííł.

¹⁸Díí jį́ Pérsha kéyahgi índa Míídiya kéyahgi sáanii danilíinii éí asdzą́ą́ naat'ááh ádzaaígíí dayíínii'go éí aláahgo naat'áanii biyaadóó naat'áanii danilíinii t'áá ałtso yich'į' hadaasdzíi'go t'óó yówehda saad hodooleełgo hahodidoodlałgo hashké hwiidínóodzįįł.

¹⁹Áko aláahgo naat'áanii bił yá'át'ééh ládą́ą́', bíni'dii bits'ą́ą́dóó t'ah aláhígo bee haz'áanii éí Pérzha dine'é áádóó Míídiya dine'é bibee haz'áanii doo łahgo ánáolne' át'éégóó bee ak'e'ashchį́įgo ádoolnííł, áko Váshtai wolyéii aláahgo naat'áanii Ahazawííras bits'áhodi'doolt'eeł, nidi bíni' hatsásk'ehjį' t'ah haláhígo yá'át'éhígíí ła' anáádoolt'eeł.

²⁰Ákohgo aláahgo naat'áanii bee haz'áanii íidoolíłígíí éí aláahgo bee bóhólníihgo bił haz'ą́ą́góó, hótsaago bił haz'ą́ą nidi, t'áá át'é dadoo'nihgo asdzání danilíinii t'áá ałtso badahastiin, t'áá éí diné alááh ádaat'éii índa a'oh ádaat'éii bił danilį́į doo.

²¹Áko díigi áhá'níigo aláahgo naat'áanii áádóó naat'áanii danilíinii bił yá'ádaat'ééh, áádóó aláahgo naat'áanii éí Miimúkan bizaad k'eh ádzaa.

²²Áko aláahgo naat'áanii bee bóhólníihgo bił nahaz'ą́ą́góó t'áá át'é naaltsoos yi'iisnii'; éí aláahgo bee óhólnííh bił nahaz'ą́ą́góó t'áá bí ak'eda'ałchíhígíí bik'ehgo índa t'áá ałtso t'áá bí bizaad yee yádaałti'ii bik'ehgo yee ak'e'ashchį́, áko diné t'ááłá'í nítínígo t'áá bí dabighangóó yee bídahólníihgo t'áá bí bizaadígíí bik'ehgo ba'áłchíní yił dahalne' doo.