Read Navajo ESTHER 2 Bible Online

ESTHER 2 - Navajo bible

ESTHER 2

¹Díí kódahóót'įįdóó bik'ijį' aláahgo naat'áanii Ahazawííras báhóóchįįdígíí bił hasht'ehodíít'e'go Váshtai áádóó áát'įįdígíí índa bee haz'áanii bee bihodiikaalgo ályaaígíí yénáálnii'.

²Ákohgo aláahgo naat'áanii bá nidaal'a'ígíí ádabidííniid, Bíni' ch'ikéí bizhą́ą́ nidaakaii naat'áanii bá há'déest'į́į' doo.

³Áko bíni' aláahgo naat'áanii bee bóhólníihgo bił nahaz'ą́ągi bídahólníhígíí ła' yik'i hidiilníihgo ch'ikéí bizhą́ą́ nidaakaii Shúshan kin haal'áagi asdzání danilíinii baa ádahayą́ądi áłah ádeidoolííł. Áadi aláahgo naat'áanii bá naal'a'í Hégeiyai éí asdzání danilíinii yaa áhályáanii nilį́įgo ch'ikéí áłah ályaii baa áhojilyą́ą doo, áádóó bíni'dii t'áadoo le'é bee chin ádąąh deidooldahígíí baazhdidoo'ááł.

⁴Áko ch'ikę́ę́h bizhą́ą́ naagháii éí aláahgo naat'áanii yił hóshǫ́ǫ dooígíí éí Váshtai bitsásk'ehgi naat'ááh dooleeł. Díí aláahgo naat'áanii bił hóshǫ́ǫgo yik'eh ádzaa.

⁵Íídą́ą́' Jew dine'é ła' Shúshan kin haal'áagi bighan; éí Mórdiikai wolyé, Jéíyer biye' nilį́ áádóó Shímiyai yę́ę hanálí nít'éé' índa naakidi náhánálí Kish éí Bénjamin dine'é nilį́į́ nít'éé'.

⁶Éí Bábilan dine'é aláahgo binanit'a'í Nébukadnézzar éí Jerúsalem kin haal'áádóó hahonííłkaadgo Júdah dine'é aláahgo binanit'a'í Jekonáíyah yił yisnááh áhoolaa nít'éé'.

⁷Hadásah yineesą́ągo éí hazhé'é yázhígo bitsi' Esther ałdó' wolyé, háálá bizhé'é áádóó bimá neezná. Ch'ikę́ę́h bizhą́ą́ naagháii t'óó dinilgááhí yee' áádóó nizhóní yee', áko bizhé'é áádóó bimá neezná; éí bąą Mórdiikai honeesą́ągo t'áá bí bitsi' jílį́įgo áhoolaa.

⁸Ákódzaago aláahgo naat'áanii bibik'eh ó'oo'níiłii índa bibee haz'áanii bee ádá nihodiit'aahii áyiilaaígíí yaa dahodiizts'ą́ą'go ch'ikéí bizhą́ą́ nidaakaii t'óó ahayóí Shúshan kin haal'áagi, Hégeiyai aa áhályą́ nilíinii ba'ałk'ee áłah ádaalyaago Esther ałdó' aláahgo naat'áanii bighan góne' atah bi'deelt'e' índa asdzání yaa áhályáanii Hégeiyai haa áhályą́ą́ nít'éé'.

⁹Áko ch'ikę́ę́h bizhą́ą́ naagháii bił hóshǫ́ áádóó hats'ą́ą́dóó ach'oha'né bee hazlį́į́', áádóó t'áadoo le'é bee chin ádąąh yildééh dooígíí áádóó bikiiní baazhdiní'ą́, áko aláahgo naat'áanii bił haz'ánídę́ę́' ch'ikéí nidaal'a'í tsosts'idgo, éí bee ájít'ée dooígíí áádóó ch'ikéí bizhą́ą́ nidaakaii yee ádaat'ée dooígíí nídii'nil índa agháago yá'áhoot'éehgo haz'ą́ągi bił niho'dee'nil.

¹⁰Esther éí hadine'é danilíinii áádóó hak'éí danilíinii t'ah doo bee ádaa hojilne' da, háálá Mórdiikai éí doo ádééhozdoolzįįłgóó hach'į' haadzíí'.

¹¹Áko t'áá ákwíí jį́ Mórdiikai aa ádahayą́ bá haz'ánígóó nídídáahgo Esther haa jit'į́ índa haa jidoonííł nízingo ákǫ́ǫ́ nídídááh.

¹²Áko ch'ikéí bizhą́ą́ nidaakaii t'ááłá'í nítínígo bitah hoolzhishgo aláahgo naat'áanii Ahazawííras yił yah ahikááh. Asdzání baa ádahayą́ągo naakits'áadah bee nídahidizíídóó bik'ijį' t'áá éí bik'ehgo ákódaal'į́į́ nít'éé'. (Ákót'éego bida'didéehgo yoołkáłígíí bíighah ni'iileeh: ak'ah tsin bijeeh bee łikání halchinii mir wolyéii bee asdzání bida'didéehgo hastą́ą́h nídízi' áádóó spáis wolyéii ałdó' bee asdzání bida'didéehgo hastą́ą́h nínádízi' nít'éé'.)

¹³Áko kót'éego ch'ikę́ę́h éí aláahgo naat'áanii yił yah iigháahgo ch'ikéí baa ádahayánídóó t'áá yinízinígíí éí yooléełgo aláahgo naat'áanii yił yah iighááh nít'éé'.

¹⁴E'e'áahgo dah diighááh áádóó biiłkáhí índa e'asdzą́ą́ yíl'į́ baa ádahayą́ągo haz'áníjí náánádááh; aláahgo naat'áanii bá naal'a'í Sheiyáshgaz, éí e'asdzą́ą́ daól'íinii yaa áhályáanii nilíinii yaa yighááh; aláahgo naat'áanii éí doo bił yah anáázhdoodáał da, t'áá hazhó'ó aláahgo naat'áanii bił hojíshǫ́ǫgo háká áho'doo'niidgo t'éiyá ákǫ́ǫ́ jidoogááł.

¹⁵Áko Mórdiikai bizhé'é yázhí Ábiheil wolyéii bitsi'go Esther hatsi' nilį́ nahalingo jineesą́ągo aláahgo naat'áanii bił yah azhdoogááł baa hoolzhiizhgo doo ha'át'íhígíida náájííkeed da, t'áá hazhó'ó aláahgo naat'áanii bá naal'a'í Hégeiyai éí asdzání yaa áhályáanii yee nahontįįhii bik'ehgo t'éiyá. Áko t'áá ałtso dabinááł Esther éí bee ach'oha'néenii hwee hazlį́į́'.

¹⁶Áko Esther éí aláahgo naat'áanii Ahazawííras bił haz'ą́ą́ góne' hoł daaskai; éí neeznáá nídízííd, t'áá éí Tííbeth yiziłígíí binih nant'áago tsosts'id náhááh góne' áhóót'įįd.

¹⁷Áko aláahgo naat'áanii éí asdzání t'áá ałtso biláahgo Esther ayóó'áyó'ní, índa ch'ikéí bizhą́ą́ nidaakaii t'áá ałtso biláahgo ajooba'ii áádóó bee ach'oha'níinii aláahgo naat'áanii binááł hwee hazlį́į́', ákohgo naat'á ch'ah hak'iidíí'ą́ índa Váshtai bitsásk'ehgi e'asdzą́ą́ naat'ááh áhoolaa.

¹⁸Áko aláahgo naat'áanii éí biyaadóó naat'áanii danilíinii t'áá ałtso áádóó bá nidaal'a'ígíí t'áá ałtso yá ída'íísįįd. T'áá éí Esther bá ída'azįįd át'é. Bił nahaz'ą́ągi háá'áyį́į́h jį́į́ góne' éí doo ni'doonishgóó yee hooł'a'go aláahgo naat'áanii yit'íinii bik'ehgo t'áá jíík'eh aa doolyéełii neiznii'.

¹⁹Naakidi aleeh góne' ch'ikéí bizhą́ą́ nidaakaii áłah ánáábi'diilyaago Mórdiikai éí aláahgo naat'áanii bidáń'dítį́hígi dzizdá.

²⁰Áko Esther éí hadine'é áádóó hak'éí danilíinii t'ah doo bee ádaa hojilne' da, háálá Esther éí Mórdiikai honeesánígíí bik'ehgo bik'eh hojíł'į́.

²¹Áko éí yoołkááłdą́ą́' aláahgo naat'áanii bidáń'dítį́hígi Mórdiikai dzizdáago aláahgo naat'áanii bá naal'a'í nidilt'éego Bígthan áádóó Tííresh éí ch'é'étiingi nídídáhí nilį́įgo báhóóchįįdgo, t'áá ha'át'éegoda aláahgo naat'áanii Ahazawííras yidiyoołhéłígíí hát'į́.

²²Áko díí Mórdiikai bił bééhoozingo éí asdzą́ą́ naat'ááh Esther yił hoolne', áko Esther éí Mórdiikai bízhi' binahjį' aláahgo naat'áanii bił nááhojoolne'.

²³Áko naaskáa'go bééhoozingo diné t'áá áłah tsin íí'áii bąąh dahidii'nil. Áko díí aláahgo naat'áanii binááł aláahgo nidanit'a'í baa dahane' binaaltsoos bii' bee ak'e'ashchį́.