Read Navajo ESTHER 5 Bible Online

ESTHER 5 - Navajo bible

ESTHER 5

¹Ákódzaadóó hodílzingo doo adą́ tágí jį́ azlį́į'go Esther éí naat'á éé' nizhóníii biih jííyáago aláahgo naat'áanii bighan bich'éédą́ą'gi haz'ání góne' yah ajííyá, áko aláahgo naat'áanii bibik'i dah asdáhí bikáá'dóó nahat'áii yikáá' dah sidáago binaashiidę́ę́' dziizį'.

²Áko kóhóót'įįd: éí haz'ání góne' asdzą́ą́ naat'ááh Esther dzizį́įgo aláahgo naat'áanii hoołtsą́ągo bił jíílįįd, áko aláahgo naat'áanii bi'óola naat'á gish bílák'ee sitánígíí Esther yich'į' yideeztsih. Ákohgo Esther éí aláahgo naat'áanii bit'áahjį' jideeyáago óola naat'á gish bílátahdę́ę́' bizhdeelchid.

³Áko aláahgo naat'áanii áhodííniid, Ha'át'íishą' naat'ááh nílíinii, Esther? Ha'át'íishą' yíníkeed? Aláahgo bee shóhólníihgo bił haz'áanii ałníí'dóo nidi naa didoot'ááł.

⁴Áko Esther ázhdííniid, Aláahgo naat'áanii bił hóshǫ́ǫ́ ládą́ą́' bíni' díí jį́ aláahgo naat'áanii bá ída'íísįįdíjį' Héíman yił doo'ash.

⁵Ákohgo aláahgo naat'áanii ádííniid, Esther ánínígíí íidoolííł biniyé Héíman tsį́įłgo nídoohłóós. Ákohgo aláahgo naat'áanii áádóó Héíman éí Esther ída'íísįįdjį' ní'áázh.

⁶Áko ída'azįįdgi wáin yidlą́ągo aláahgo naat'áanii éí Esther áyidííniid, Ha'át'íishą' naa didoot'áałgo baa ná'iinikąąh? Áko ha'át'íishą' yíníkeed? Aláahgo bee shóhólníihgo bił haz'áanii ałníí'dóó shííníkeed nidi ná bohodoolnííł.

⁷Ákohgo Esther ádííniid, Baa ná'iinishkąąhii áádóó yíníshkeedii éí díí:

⁸aláahgo naat'áanii shich'oha'néego shaa nitsíkeesgo baa ná'iinishkąąhgo yíníshkeedii éí aláahgo naat'áanii shadi'doo'áałgi bił yá'íít'ééh ládą́ą́', bíni' yiską́ągo aláahgo naat'áanii bá ída'azįįd hodeeshłíiłjį' Héíman yił doo'ash, áko yiską́ągo t'áá aláahgo naat'áanii ádííniidígi ádeeshnííł.

⁹Áko éí bijį́ Héíman bił hózhǫ́ǫgo índa bijéí bił nihoozhǫǫhgo dah diiyá. Nidi aláahgo naat'áanii bich'é'étiingóó dáń'dítį́hígi Mórdiikai doo t'áá k'ad yiizį'góó índa doo t'áá k'ad hideesnáá'góó éí Héíman yiyiiłtsą́ągo t'áá íiyisí Mórdiikai yich'į' báhóóchįįd.

¹⁰Nidi Héíman éí t'áá bí t'óó déesyéelgo hooghangóó anáádzáago áadi bik'isóó danilíinii índa be'asdzą́ą́ Zííresh bíká i'jííł'a'.

¹¹Áko Héíman ayóó át'é jit'íinii bee ádaa hoji'niihii áádóó haye'ké danilíinii ánéelą́ą'gi bee bił hojoolne'; bee ayahoniidlįįh t'áá át'é aláahgo naat'áanii bee bił jílíinii áádóó naat'áanii danilíinii índa aláahgo naat'áanii bá naal'a'í danilíinii biláahgo yá'át'éehgo náás hodeest'e'ígíí bee bił hojoolne'.

¹²Náá'áłdó' Héíman hanáádzoodzíi'go ájíní, Asdzą́ą́ naat'ááh nilíinii Esther éí ída'azįįd hasht'eyiilaaígíí aláahgo naat'áanii doo ła' bił yah azhdoogááłgóó yee hooł'a', nidi t'áá shí t'éiyá, áko yiską́ągo aláahgo naat'áanii bił hach'į' yah anáádeesht'ash.

¹³Ákondi éí t'áá át'é doo bee shił hózhǫ́ǫ le' át'ée da, háálá Mórdiikai Jew dine'é jílį́įgo aláahgo naat'áanii bich'éédą́ą́'góó dáń'dítį́hígi dah dzizdáago náhoostsééh.

¹⁴Ákohgo hwe'asdzą́ą́ Zííresh áádóó hak'is danilíinii t'áá ałtso ádahodííniid, Háni' tsosts'idiindóó ba'aan ashdla' ké silá áníłnéezgo tsin ła' hasht'edoolnííł, áko abínígo aláahgo naat'áanii ábididííniiłgo éí tsin hasht'eelyaaígíí bąąh Mórdiikai dah bidi'doodloh, áko bąą nił hózhǫ́ǫgo ída'azįįdgóó aláahgo naat'áanii bił díí'ash. Díí Héíman t'áá íiyisí bił yá'íít'ééh áádóó tsin bąąh dahodi'yiidleehígíí ádoolníiłgo yee hooł'a'.