Read Navajo ESTHER 7 Bible Online

ESTHER 7 - Navajo bible

ESTHER 7

¹Áko aláahgo naat'áanii áádóó Héíman éí asdzą́ą́ naat'ááh Esther ída'íísįįdjį' yaa ní'áázh.

²Áko naaki yiłkaah góne' ída'azįįdgi wáin yidlą́ągo aláahgo naat'áanii éí Esther ánéidoo'niid, Asdzą́ą́ naat'ááh Esther ha'át'íísh naa didoot'áałgo baa ná'iinikąąh? Áko ha'át'íísh yíníkeed? Aláahgo bee shóhólníihgo bił haz'áanii ałníí'dóó shííníkeedgo ná bohodoolnííł.

³Ákohgo asdzą́ą́ naat'ááh Esther ánááhodoo'niid, Aláahgo naat'áanii nílíinii, bee ach'oha'néenii bee shaa nitsíníkees ládą́ą́' áádóó aláahgo naat'áanii bił yá'íít'ééh ládą́ą́', bíni' she'iina' baa ná'iinishkąąh, shidine'é be'iina' bá ííníshkeed.

⁴Jó, shí índa shidine'é nanihidi'dootsiłgo ánihidi'dooldįįł, áádóó nanihídoodįįł biniyé nidanihi'diiznii'. Diné danilíinii áádóó asdzání danilíinii naalte' biniyé nanihi'diiznii'go shí t'óó hasht'edinisht'ée doo nít'éé', háálá nihí atínihi'diilyaaígíí éí aláahgo naat'áanii doo bída'iitį́įh da.

⁵Ákohgo aláahgo naat'áanii Ahazawííras éí asdzą́ą́ naat'ááh Esther áyidííniid, Háísh át'į́ áádóó diné ákódooníiłgo tsídeezkézígíí háadishą' naaghá?

⁶Áko Esther ájíní, Díí Héíman doo yá'áshóonii nilį́įgo nihi'ana'í nilį́. Ákohgo aláahgo naat'áanii índa asdzą́ą́ naat'ááh nilíinii binááł Héíman ayóó át'éego násdzííd.

⁷Áko aláahgo naat'áanii éí báhóóchįįdgo wáin dajidlánídóó náhidiitahgo bighan binaagi hootso haz'ą́ą́ góne' ííyá, nidi Héíman éí Esther bich'į' hwe'iina' baa ná'iizhdookąął biniyé jiizį', háálá aláahgo naat'áanii binahjį' doo yá'át'éehii bá ninázhnítłizhgo baa ákozniizį́į́'.

⁸Áádóó aláahgo naat'áanii éí bighan binaagi hootso haz'ą́ą́dę́ę́' dah nídiidzáago wáin yoodlą́'ígi nádzá, áko Héíman éí Esther tsásk'eh yikáá' sitíníjį' naa'ajíítłizhgo aláahgo naat'áanii ádííniid, Da' t'áá shí shikin góne'ésh aláahgo naat'áanii be'asdzą́ą́ bił ninídeeł? Aláahgo naat'áanii t'ahdii yáłti'go Héíman binii'jį' yik'ída'asti'.

⁹Ákohgo naal'a'í ła' Harbóna éí aláahgo naat'áanii binááł ájíní, Shoo, Héíman bikingi tsin bąąh dah dahodi'yiidleehígíí tsosts'idiindóó ba'aan ashdla' ké silá áníłnéezgo áyiilaago nihidii'á. Éí Mórdiikai yá áyiilaa; jó, éí yá'át'éehgo aláahgo naat'áanii yá haadzíí' nít'éé'. Ákohgo aláahgo naat'áanii ádííniidgo ání, Éí bąąh dahodoohłeeh.

¹⁰Áko tsin bąąhjį' dah dahodi'yiidleehígíí Mórdiikai bá hasht'ejiilaaígíí bąąhjį' Héíman dahodiidlo'. Ákohgo aláahgo naat'áanii báhóóchįįdii bá náhoojǫǫd.