Read Navajo ESTHER 9 Bible Online

ESTHER 9 - Navajo bible

ESTHER 9

¹Íídą́ą́' naakits'áadah nídízídígíí Éídar wolyéii binih, táá'ts'áadahgóó yoołkáałgo, aláahgo naat'áanii yee haadzíi'ii áádóó bibee haz'áanii bi'doolnííł k'adę́ę baa hoolzhíishgo t'áá éí bijį́ Jew dine'é bi'ana'í danilíinii bee bidziilii yee ak'idiyaa dadooleełgo bił chodahoo'į́ (nidi t'áá éí bijį́ łahgo ályaago Jew dine'é bee bidziilii yee bi'ana'í dabijoołáhígíí yik'idiyaa daazlį́į́').

²Aláahgo naat'áanii Ahazawííras bee bóhólnííh bił nahaz'ą́ą́góó t'áá át'é Jew dine'é hakin hadaas'áagi hodadiilkaalii nidazdoołtsił biniyé áłah dzizlį́į́'. Áko doo ła'da hodiilkaal da; jó, t'óó hak'e'íyé'ígi át'éego diné bik'idiyaa dajílį́į́ nít'éé'.

³Áko bee óhólnííh bił nahaz'ą́ą́góó naat'áanii danilíinii áádóó akéé'dóó bídahólníihii áádóó aląąjį' naazíinii índa aláahgo naat'áanii yikéé' góne' naazíinii éí Jew dine'é yíká anájah nít'éé', háálá Mórdiikai éí ayóó át'éego yik'ee bił daayéé' nít'éé'.

⁴Háálá Mórdiikai éí aláahgo naat'áanii bikin góne' ayóó át'éii jílį́į́ nít'éé', áádóó bee óhólnííh bił nahaz'ą́ą́góó t'áá át'é hwéého'dílzin, háálá díí diné Mórdiikai nilíinii t'óó wózhǫ́ bidziil yileeł.

⁵Kót'éego Jew dine'é danilíinii bi'ana'í ałtso diltłish yee yił nidadziił haał índa nideiłtseedgo dabijoołáhígíí t'áá bí danízinígi ádayííł'įįd.

⁶Shúshan kin haal'áagi Jew dine'é bi'ana'í nideistseed índa ashdladi neeznádiingo ádeisdįįd.

⁷Héíman haye'ké neeznált'é éí Parshandéítha, Dálfan, Aspéítha,

⁸Poréítha, Adalíya, Arídatha,

⁹Parmáshta, Árisai, Arídai índa Vaizéítha, díí ałtso nidaho'diztseed.

¹⁰Hamiidéítha biye' Héíman, Jew dine'é bi'ana'í jílíinii éí haye'ké neeznált'é ałtso nidabi'diztseed, nidi binaalye'é t'áadoo yaa nídaast'įįd da.

¹¹Éí bijį́ Shúshan kin haal'áagi nidabi'diztseedígíí ánéelą́'ígíí aláahgo naat'áanii bił hóóne'.

¹²Áko aláahgo naat'áanii éí asdzą́ą́ naat'ááh Esther áyidííniid, Jew dine'é éí Shúshangi ashdladi neeznádiingo diné nideistseedgo ádeisdįįd índa Héíman biye'ké neeznált'éhígíí ałdó' dayííghą́ą́'. Ákohgo aláahgo naat'áanii bee bóhólnííh nahaz'ą́ą́góó haashą' dáát'įįd? K'adshą' ha'át'íí baa nínáá'iinikąąhgo éí naa didoot'ááł? Índa ha'át'íísh yííníkeedgo éí ná bihoolnííł dooleeł?

¹³Áko Esther ázhdííniid, Aláahgo naat'áanii bił hóshǫ́ǫ́ ládą́ą́', háni' Jew dine'é Shúshangi kéédahat'ínígíí díí jį́ bee haz'ánígíí bik'ehgo yiską́ągo ałdó' badi'díí'ááł, áádóó Héíman biye'ké neeznált'éhígíí bits'íís tsin bąąhjį' dah dahididoodloh.

¹⁴Ákohgo aláahgo naat'áanii Shúshangi t'áá ákódoolníiłgo yee haadzíí', áko Héíman biye'ké neeznált'éhígíí bits'íís tsin bąąh dah dahidiidlo'.

¹⁵Jó, Jew dine'é éí Shúshangi kéédahat'ínígíí Éídar yiziłígíí binih dį́į́'ts'áadahgóó yoołkáałgo áłah nilį́į́ nít'éé', áádóó Shúshangi táadi neeznádiingo diné nideistseed, nidi binaalye'é éí t'áadoo yaa nídaast'įįd da.

¹⁶Aláahgo naat'áanii bee bóhólníihgo bił nahaz'ą́ą́góó Jew dine'é áłah nídaadleehgo ádích'ą́ą́h nidaaldzil nít'éé', índa Jew dine'é bi'ana'í dabijoołxáii éí tsosts'idiindóó ba'aan ashdladi míilgo nideistseed, nidi binaalye'é éí t'áadoo yaa nídaast'įįd da.

¹⁷Éídar yiziłígíí binih táá'ts'áadahgóó yoołkáałgo ádahóót'įįd. Áko dį́į́'ts'áadah yoołkááł góne' t'óó háádaasyį́į́' áádóó éí bijį́ ída'azįįdgo índa bił dahózhǫ́ǫgo yaa naaskai.

¹⁸Nidi táá'ts'áadah índa dį́į́'ts'áadahgóó yoołkáałgo Jew dine'é éí Shúshan kin haal'áadi áłah daazlį́į́', índa ashdla'áadah yoołkááł góne' éí t'óó háádaasyį́į́' índa t'áá éí bijį́ ída'azįįdgo áádóó bił dahózhǫ́ǫgo yaa naaskai.

¹⁹Éí bąą kin dah naazhjaa'dóó Jew dine'é kintahgóó kéédahat'íinii Éídar yiziłígíí binih dį́į́'ts'áadahgóó yoołkáałgo bił dahózhǫ́ǫgo áádóó ída'azįįdgo yaa naaskai áádóó nizhónígo bee ida'az'ą́, índa ch'iyáán ahidiníłnáago ałch'į' ádayiilaa.

²⁰Áko Mórdiikai díí yee ak'e'ashchį́ áádóó aláahgo naat'áanii Ahazawííras bee bóhólníihgo bił nahaz'ą́ą́góó t'áá át'é Jew dine'é t'áá ałtso t'áá ákódígi áádóó danízaadiígíí bich'į' naaltsoos ájiilaa.

²¹Áko éí hatahgóó Éídar yiziłígíí binih dį́į́'ts'áadahgóó yoołkáałgo índa ashdla'áadahgóó yoołkáałgo t'áá nináháhááh bik'eh ts'ídá ákódaat'į́į dooleeł.

²²Éí yoołkáłígíí índa yiziłígíí binih Jew dine'é bi'ana'í nayídeisdįįdgo háádaasyį́į́' áádóó yíní yę́ę ił hózhǫ́ násdlį́į́' áádóó ída'azįįdgi bąąh yíníinii yę́ę hodiyin jį́ násdlį́į́', áko ída'azįįdgo áádóó bił dahózhǫ́ǫgo naakiiską́ áádóó éí bijį́ ch'iyáán ahidiní łnáago ałch'į' ádeił'į́įgo badahojoobá'íii t'áá jíík'eh baa da'jiiznil.

²³Ákohgo Jew dine'é t'áá ádaat'ínígi át'éego áádóó Mórdiikai hach'į' yee ak'e'ashchínígi át'éego ákódajit'į́įgo hodeeshzhiizh.

²⁴Háálá Éígag dine'é Hamiidéítha biye' Héíman éí Jew dine'é t'áá ałtso bi'ana'í jílį́įgo, Jew dine'é atízhdoolííł áádóó ázhdoołdįįł biniyé binahodziz'ą́ągo yáá'iilt'e' Pur wolyéii baa nijizh'eezh.

²⁵Nidi Esther éí aláahgo naat'áanii bidááhdóó nizhníyáago aláahgo naat'áanii díí yee haadzíi'go naaltsoos ádayiilaa: diné doo yá'áshǫ́ǫ́góó binahat'a' hólóonii, éí Jew dine'é atíidoolíiłgo yinahaz'áanii bik'ijį' nídoodleeł áádóó bída índa biye'ké tsin bąąhjį' dah dabidi'doodloh.

²⁶Éí bąą díí yoołkáłígíí éí yáá'iilt'e' Pur wolyéii Púrim náánáosye'. Áko díí naaltsoos biyi' saad t'áá át'é bee ak'e'ashchínígíí áádóó díí ádahóót'įįdígíí índa bich'į' ádahoodzaaígíí ałdó' dayiiłtsánígíí bąą,

²⁷Jew dine'é díí yee nidahaz'ą́ągo t'áá bí ádá áádóó bada'áłchíní índa hodahidiikáhígíí t'áá ałtso ałdó' bá át'é: éí bee ak'e'ashchínígíí bik'ehgo t'áadoo niit'éhí t'áá nináháhááh bik'eh naaki jį́ nída'ałeeh doo,

²⁸áádóó díí yoołkáłígíí náás oochííłgóó t'áá ałtso áádóó dahooghangóó t'áá át'é áádóó bee óhólníihgo bił nahaz'ą́ą́góó t'áá át'é áádóó kin hadaas'áágóó t'áá át'é, díí naaki jínígíí bééhániihgo bida'jił'į́į doo, áádóó éí díí naaki jį́ Púrim wolyéii éí Jew dine'é bitahgóó doo nidoot'ih da índa da'ahílchííhgóó bee bééhániihii doo yaa deidiyoonah da.

²⁹Ákohgo asdzą́ą́ naat'ááh Esther, Ábiheil bitsi' jílíinii, índa Mórdiikai éí Jew dine'é nilį́įgo t'áá ájíłah t'áá íiyisí bee hóhólníihgo, naakidi aleeh góne' naaltsoos bidziil doogo Púrim baa hojilne'go naaltsoos ánáájiidlaa.

³⁰Aláahgo naat'áanii Ahazawííras éí neeznádiindóó ba'aan naadiin tsosts'idgo bee bóhólnííh bił nahaz'ą́ą́góó, saad bee hasht'ehodít'éii áádóó t'áá aaníinii binahjį' Jew dine'é t'áá ałtso bich'į' naaltsoos ádajiilaa.

³¹Éí díí yoołkáłígíí Púrim wolyéii bi'é'él'į' doo biniyé néit'aah; éí Jew dine'é Mórdiikai áádóó asdzą́ą́ naat'ááh Esther t'áá yee hach'į' haadzíi'ii bik'ehgo áádóó t'áá hó índa ha'áłchíní ahoolchíiłii ałdó' bił ádá nidahozhdeet'ánígíí bik'ehgo t'áadoo adání índa atínáhodindleeh yaa ninákah doo.

³²Áko díí yoołkáłígíí Púrim wolyéii néit'aah dooleełgo asdzą́ą́ naat'ááh Esther éí bidziilgo yee haadzíí', áko naaltsoos biyi' t'áá ákót'éego bee ak'e'ashchį́.