Read Navajo EXODUS 1 Bible Online

EXODUS 1 - Navajo bible

EXODUS 1

¹Díí Ízrel haye'ké Ííjip kéyahgi yíkaígíí t'ááłá'í nítínígo dabighandóó danilíinii Jéíkab hoł nidahaaznánígíí kódaolyé:

²Rúben, Símiyan, Líívai, Júdah,

³Ísakar, Zébyulan, Bénjamin,

⁴Dan, Náftalai, Géed índa Ásher daolyé.

⁵Jéíkab bits'ą́ą́dóó ahii' háá'ahiyoolchíiłii tsosts'idiin yilt'éé lá; Jóseph éí t'áá íídą́ą́' Ííjip kéyahgi jiníyá.

⁶Áko Jóseph daaztsą́, áádóó bik'isóó índa íídą́ą́' da'ahílchíihii ałdó' ałtso daneezná.

⁷Nidi Ízrel ba'áłchíní náás da'ahideeshchį́įgo t'óó ahayóí silį́į́' áádóó ayóó át'éego k'ee'ąą deeshzhiizh, áko k'ee'ąą dínéest'ą́ągo t'áá íiyisí bidziil silį́į́'; éí kéyahgi k'ee'ąą náneest'ą́.

⁸Áko Ííjip kéyahgi Jóseph yę́ę doo yééhósinii aláahgo naat'áanii náánásdlį́į́'.

⁹Áko éí bidine'é áyidííniid, Shoo, Ízrel dine'é t'óó ahóóyóí áádóó nihiláahgo dabidziil daazlį́į́'.

¹⁰Haa'íshą' baa dahoniidzą́ągo át'ée dooleełgi baa nídadíit'įįł, doodago t'áá k'ee'ąą náánoot'į́įłgo áádóó nihich'į' anaa' hazlį́į'go nihida'ana'í yił ałch'odadoo' niiłgo nihik'iidoojah, sha'shin, áko kéyahdóó ałtso yóó'anídahidoo'nééł.

¹¹Éí bąą t'áá íiyisí naanish yídahoniłkadgo yee hade ádahósin doo biniyé naanish binanit'a'í hach'į' nideiznil, áko Páítham índa Rámsiiz hoolyéego Féro bá yódí biniyé kin hadaas'áago ádajiilaa.

¹²Azhą́ t'áá íiyisí atídajił'į́į nidi t'óó yówehda k'ee'ąą dínéest'ą́ áádóó t'ah yówehígo k'ee'ąą ní'deeshzhiizh. Áko Ííjip dine'é danilíinii Ízrel dine'é t'áá íiyisí yik'ee niseekai.

¹³Áko Ízrel dine'é naanish yídeiniłkadgo ádił nideílníísh.

¹⁴Áko naalte' dajílį́įgo ts'ídá yéego na'anish yee hoda'niighą́ą́'; hashtł'ish áádóó bis ádajile'go índa dáda'ak'ehgóó naanish t'áá ał'ąą baa nidajikai; ts'ídá yéego hondaanish yídahoniłkad.

¹⁵Áádóó Ííjip dine'é binanit'a'í éí Hííbrew dine'é asdzání ha'niyóodii léi' yich'į' haadzíí'; éí asdzání ła' Shífrah wolyé índa ła' éí Púwa wolyé.

¹⁶Áko ání, Asdzání ha'niyóodii nohłíinii, Hííbrew asdzání nida'iiłchíihgo ííshją́ą́ hadaohsíidgo ashkiigo éí nidaałtseed doo; at'ééd nilį́įgo t'áá dahináa doo.

¹⁷Nidi asdzání ha'niyóodii Diyin God yidísin, áko Ííjip binanit'a'í hach'į' yee haadzíi'ii t'áadoo bik'ehgo ádziidzaa da, áko ashiiké nidahachíhígíí t'áá dahináago ájiilaa.

¹⁸Ákohgo Ííjip binanit'a'í éí asdzání ha'niyóodii yíká i'ííł'a'go áyidííniid, Ha'át'éegoshą' kóhdzaa; ashiiké yázhí t'áá dahináago óohłaa lá?

¹⁹Asdzání ha'niyóodii Féro áyidííniid, Díí Hííbrew asdzání doo Ííjip asdzánígi ádaat'ée da, háálá éí dabiinéigo ha'niyóodii éí t'áadoo yílyeedí t'ahaa'go nida'iiłchííh.

²⁰Áko Diyin God éí asdzání ha'niyóodii yik'ijisdli' índa diné k'ee'ąą nídínéest'ą́ągo yéego bidziil silį́į́'.

²¹Áko asdzání ha'niyóodii éí Diyin God yidísinígíí biniinaa ha'áłchíní hólǫ́ǫgo áhoolaa.

²²Áko Féro éí bidine' é t'áá ałtso yich'į' haadzíi'go áyidííniid, Hííbrew ashkii nidahachíhígíí tooh biih dahołtł'iid doo, nidi at'éékégo éí bíni' dahináa dooleeł.