Read Navajo EXODUS 10 Bible Online

EXODUS 10 - Navajo bible

EXODUS 10

¹Áko Bóhólníihii éí Mózes áyidííniid, Féro bił yah anáánídááh, háálá bijéí yíłtł'is, áádóó bá nidaal'a'í ałdó' dabijéí dááłtł'is, áko shibee éédahózinii binááł ádeeshłíí ł.

²Áádóó niye' nilíinii índa biye' náánídlíinii díí bee bił hólne' doo: Ííjip kéyahgi baa niséyáhígíí índa bee éédahózinii hatahgóó ádaashłaaígíí, áko éí bee shí Bóhólníihii nishłį́įgo nił bééhózin doo.

³Áko Mózes áádóó Éran éí Féro bił yah anáájoot'áazhgo ábizhdííniid, Bóhólníihii Hííbrew dine'é biDiyin God kóní, Haa nízáagishą' shich'į' síníltee'go doo shich'į' ayáhígo í'dílnéeh da doo? Shidine'é béé'níłnííh, áko shich'į' nidahałáa doo.

⁴Éí doodaii', shidine'é doo béé'níłnííhgóó, jó, yiską́ągo nihił hahoodzojį' nihik'ijį' nahachagiitsoh bi'deesh'nih.

⁵Áko kéyahgi t'áá át'éé nít'éé' nídooséełgo ni'ígíí doo yit'į́į da doo, áádóó ha'át'íhída t'áá daadzí'ígíí deidooyį́į́ł; éí nílótsoh yi'oh ni'nítseedígíí áádóó dahootsogóó tsin naazkaadígíí deidooyį́į́ł.

⁶Áko danihighan áádóó ná nidaal'a'í t'áá ałtso dabighan índa Ííjip dine'é t'áá ałtso dabighan góne' hadadidoobį́į́ł; hádą́ą'da ákót'éii doo ánéeh da nít'éé'. Danihizhé'é áádóó dabizhé'é dahiná yę́ędóó díí jį́įjį' t'áadoo dayiiłtsą́ą da. Áko Féro bits'ą́ąjį' nídzízyizgo ch'éédzídzá.

⁷Áko Féro bá nidaal'a'í ádabidííniid, Haa nízáagishą' díí diné łoh yee nihidoolohgo bizahiikaah doo? Diné béé'níłnííh, áko biDiyin God Bóhólníihii yich'į' nidahałáa doo. Da' Ííjip kéyahgi hóóchxǫ'ígíísh t'ahdoo nił bééhoozįįh da?

⁸Féro bidááhdę́ę́' Mózes índa Éran nináádeizh'eezhgo ábidííniid, Nihílááh, Bóhólníihii nihiDiyin God bich'į' nidahohłá, nidi háidíígíishą' ákǫ́ǫ́ dah didoonééł?

⁹Áko Mózes ádííniid, Ániid nidaakaígíí áádóó hadaastihii áádóó danihiye'ké áádóó danihitsi'ké áádóó danihidibé dah danéelkaadii índa danihibéégashii t'áá bił nihidii'nééł, háálá hodílzingo áłah nídeiidleehgo Bóhólníihii bich'į' nidahwiidláa doo.

¹⁰Áko ánááhodoo'niid, Bóhólníihii nihił hólǫ́ǫgo áádóó nihí índa niha'áłchíní ádaałts'íísígíí bił nihi'nishníihgo doo bohonéedzą́ą́góó át'é. Ádaa ádahołyą́, háálá doo yá'át'éehii nihíni' danilį́.

¹¹Dooda lą́ą! Nihílááh, diné danohłínígíí t'éiyá Bóhólníihii bich'į' nidahohłá, jó, éí t'éí danohsingo ádadohní. Áko Féro sidáhídóó ch'ídahoneeshchą́ą́'.

¹²Áko Bóhólníihii éí Mózes áyidííniid, Nahachagiitsoh bíká Ííjip kéyah bikáá'góó dah didiilnííh, áko Ííjip kéyah bikáá'góó hadooldahgo kéyah bikáa'gi nanise' éí nílótsoh yi'oh ni'nítseedígíí ałtso deidooyį́į́ł.

¹³Áko Mózes bigish Ííjip kéyah yik'ijį'go yił dah didiilnii', áko Bóhólníihii éí ha'a'aahdę́ę'go shá bíighah áádóó tł'éé' bíighah kéyah bikáá'góó níyolgo áyiilaa, áko hoos'įįdgo ha'a'aahdę́ę'go nahachagiitsoh bił deeyol.

¹⁴Áko Ííjip kéyahgi t'áá át'éé nít'éé' nahachagiitsoh níłnii', áko Ííjip t'áá nahaz'ą́ą́ nít'éé' bikáa'gi hazlį́į́'; hádą́ą'da doo ákót'éego nahachagiitsoh haleeh da nít'éé', áádóó doo ákónáádoo'níił da.

¹⁵Háálá kéyah bikáá' t'áá át'éé bee yíłhéél, áko kéyah bikáa'gi nílótsoh éí nanise' áádóó tsin naazkaadii bineest'ą' yi'oh niinítseedígíí ałtso dayííyą́ą́', índa Ííjip kéyah bikáá' t'áá át'éé nít'éé' ch'il áádóó tsin naazkaadii índa nanise' daditłée'ii doo ła' yidzíi' da.

¹⁶Ákohgo Féro éí Mózes áádóó Éran tsį́įłgo yíká i'ííł'a'go ádííniidgo ání, Bóhólníihii nihiDiyin God bich'į' índa nihí nihich'į' ádił asésiih.

¹⁷Éí bąą k'ad íít'įįdii shá yóó'anídidíí'áałgo baa nánooshkąąh; ádił lá asésiih ni, áádóó Bóhólníihii niDiyin God díí t'éiyá shá baa néidííkąął: díí aninéhígíí shits'ą́ąjį' nahgóó kwíidoolííł.

¹⁸Áko Féro bits'ą́ą́dóó ch'ízhníyáago Bóhólníihii níjooskan.

¹⁹Áko Bóhólníihii éí e'e'aahdę́ę'go níyol ayóó ábóodziilgo níyolgo áyiilaago Tónteel Łichíi'ii biyi' góne' nahachagiitsoh ałtso bił ííyol, áko Ííjip haz'ą́ągi nahachagiitsoh doo ła' yidzíi' da.

²⁰Nidi Bóhólníihii éí Féro bijéí yiyííłtł'isgo t'áadoo Ízrel dine'é yéé'níłnii' da.

²¹Áko Bóhólníihii éí Mózes ánéidoo'niid, Yá bich'į'go yadidiilnííh, áko Ííjip kéyah bikáa'gi chahałheeł diłhiłii hak'iildoh nahalingo chahodoołhił.

²²Áko Mózes yá bich'į'go yadidiilnii'go Ííjip kéyahgi t'áá át'éé nít'éé' tágí jį́ t'áá íiyisí chahodinoolyéél.

²³Doo da'ahijoot'į́į da; t'áadoo nidi nídazhdii'néhí táá' yiską́, nidi Ízrel dine'é dabighan góne' t'éí dahool'in.

²⁴Áko Féro éí Mózes yíká anáá'ííł'a'go ádííniid, Nihílááh, Bóhólníihii bich'į' nidahohłá, nidi nihidibé nidanilkaadii índa nihibéégashii bíni' t'áá da'akǫ́ǫgo nihada'áłchíní t'éiyá bił wohnééł.

²⁵Áko Mózes ádííniid, Náádahidiilnihígíí índa didlidgo náádahidiilnihígíí t'áá bił nihi' níłnííh, háálá éí Bóhólníihii nihiDiyin God bich'į' náádahidiilnih.

²⁶Danihilį́į́' t'áá bił yii'néeł doo; t'ááłá'í nidi doo ła' bits'ą́ą́' dah didii'néeł da, háálá éí bee Bóhólníihii nihiDiyin God bich'į' nidahwiidlá. Bóhólníihii bich'į' náádahidiilnihígíí doo nihił béédahózin da; áadi niikaigo índa nihił béédahodoozįįł.

²⁷Nidi Bóhólníihii éí Féro bijéí yiyííłtł'isgo doo hwéé'ółnííh át'ée da.

²⁸Áko Féro áhodííniid, Níwohjį' shits'ánínááh; hazhó'ó ádaa áhólyą́; doo nááshiidííltséeł da, háálá nááshiiniltsą́ bijį́ dadíítsaał.

²⁹Áko Mózes ádííniid, T'áá ákóne' háínídzíí'; shí doo náániideestséeł da.