Read Navajo EXODUS 11 Bible Online

EXODUS 11 - Navajo bible

EXODUS 11

¹Áko Bóhólníihii éí Mózes ánéidoo'niid, Díí t'éiyá ts'ídá akée'di Féro índa Ííjip dine'é atíshłéhígíí át'é, áko índa níláhgóó nihi'doołnihgo kodóó ts'ídá t'áá ánóht'é ch'ínihidínóołkał.

²K'ad díí Ízrel dine'é bee bił hodíílnih, Bíni' diné índa asdzání t'ááłá'í jinítínígo hoł kééhat'íinii t'áadoo le'é béésh łigaii índa óola bee yódí ádaalyaii bídeízhdóokił.

³Áko Bóhólníihii éí Ízrel dine'é bich'oha'néego Ííjip dine'é baa dajooba'go ábiilaa, índa t'ah nááyówehgo Féro bá nidaal'a'í áádóó bidine'é binááł Ííjip kéyahgi Mózes ts'ídá ayóó át'éii jílį́.

⁴Áko Mózes ádííniid, Bóhólníihii kóní, Tł'é'ííłníi'go Ííjip dine'é bitahgóó hadideeshááł.

⁵Áko Ííjip kéyahgi alą́ąjį' nidahaazhchíinii t'áá ałtso dadínóonééł; Féro dah sidáádóó índa ak'áán ál'íní bine'dóó asdzání á nidaal'a'í hwee nihool'áajį' alą́ąjį' nidahaazhchíinii, índa alį́į́' alą́ąjį' daazhchíinii t'áá át'é dadínóonééł.

⁶Áádóó Ííjip kéyahgi t'áá át'éé nít'éé' ayóó át'éego cha háá'áa doo; hádą́ą'da ákót'éii doo ánéeh da nít'éé', áko kodóó hool'áágóó doo ákónááhodoo'níił da.

⁷Nidi Ízrel dine'é bich'į'go éí łééchąą'í nidi doo ła' hashkénídzin da doo; diné índa alį́į́' bich'į' nidi dooda, áko díí nihił béédahodoozįįł: Bóhólníihii éí Ííjip dine'é índa Ízrel dine'é doo aheełt'éii át'ée daígíí ííshjání áyósin.

⁸Áko ná nidaal'a'í t'áá ałtso shich'į' hadadookah, áádóó shich'į' yaa ádadooníiłgo kódadidooniił, Akóóh yówehjį' ch'ínóhnééh; diné nikéé' tádíkáhígíí t'áá ałtso ałdó' t'áá bił, áádóó bik'ijį' índa akǫ́ǫ́ ch'ídeeshááł. Mózes éí Féro bits'ą́ą́' ch'ízhníyáago t'áá íiyisí háhóóchįįd.

⁹Áko Bóhólníihii éí Mózes áyidííniid, Féro doo níists'ą́ą' da doo, áko Ííjip kéyahgi shibik'ee t'óó ił adahayóii k'ee'ąą yilzhish doo.

¹⁰Mózes áádóó Éran díí bik'ee t'óó ił ahayóigo áhooníiłii t'áá ałtso Féro binááł ájiilaa, áádóó Bóhólníihii éí Féro bijéí nááyííłtł'isgo bikéyahdóó t'áadoo Ízrel dine'é yéé'níłnii' da.