Read Navajo EXODUS 12 Bible Online

EXODUS 12 - Navajo bible

EXODUS 12

¹Áko Bóhólníihii éí Mózes áádóó Éran kwííłníigo Ííjip kéyahgi yich'į' haadzíí',

²Díí yiziłígíí bee nihá hahodoolzhish; éí t'áá nináháhááh bik'eh alą́ąjį' nínádízi'ígíí nihá át'ée dooleeł.

³Ízrel dine'é dah yinéłígíí bich'į' haohdziihgo kódidoohniił, Díí yiziłígíí neeznáá jį́į́ góne' azhé'é jílíinii haghandóó danilíinii bá dibé yázhí ła' nízhdidoołtééł.

⁴Áko éí hooghanídóó dibé yázhí bitsį' halááh neel'ą́ągo ni'ąąjí bighanígíí bił ázhnéelt'e'ígíí índa haa néelą́ą́' nídajidį́hígíí bik'ehgo dibé yázhí bitsį' ałtaa dazhdooltsoł.

⁵Nidibé yázhí biką'ii ła' binááhaí hadaałt'éii; dibé éí doodaii' tł'ízí bitahdę́ę́' nídidoohdzį́į́s.

⁶T'áá éí yiziłígíí dį́į́'ts'áadah ayííłką́ąjį' baa ádahołyą́ą doo. Áko Ízrel dine'é t'áá ałtso i'íí'ą́ągo dibé yázhí nideidoołtsił.

⁷Haghan biyi' dazhdooyį́łígíí bich'é'étiin siláii ałts'ą́ą́hjí áádóó naadasitánígi dibé yázhí bidił bee dazhdoodlish.

⁸T'áá éí bitł'éé' atsį'ígíí tsííkáá' sit'éego dazhdooyį́į́ł, índa díík'ǫsh t'áágééd bááh ályaii áádóó ch'il dadích'í'ígíí bił dazhdooyį́į́ł.

⁹T'áá t'éehgo éí doo dadoohsį́įł da; shibéezhgo ałdó' dooda; bitsiits'iin áádóó bijáád índa bitsą́siláii t'áá át'é kǫ' bee daazt'éego t'éiyá dadoohsį́į́ł.

¹⁰T'ááká abíníjį' ła' ch'ínółnééh lágo; abíníjį' ła' ch'ínííłna'go t'óó dadidoohłił.

¹¹Kót'éego dadoohsį́į́ł: t'áá áká dasoołzaazgo, t'áá kééh nisoo'eezgo áádóó danihigish nihílák'ee naaztą́ągo dadoohsį́į́ł áádóó tsį́įłgo da'doohsį́į́ł; éí Bóhólníihii bi'atis'adeesdzá át'é.

¹²Háálá díí tł'éé' Ííjip kéyah biyi'góó ch'ídeeshááł, áko diné alą́ąjį' bá nidahaazhchíinii áádóó naaldlooshii alą́ąjį' nidahaazhchíinii ałtso ádeeshdįįł, índa Ííjip kéyahgi diyin dabidi'níinii ałtso t'áá óoshłe' góne' bá nihodiyeesh'ááł. Shí Bóhólníihii nishłį́.

¹³Kin bii' nahísóotáanii dił bee daashdlishii bee nihich'į' ééhózin doo, áko shí éí dił deiłtsą́ągo t'óó nihitis deeshááł, áko Ííjip kéyah bikáá' naałniih bee atí'ésh'íinii doo bee atínihideeshłíiłgo ánihideeshdįįł da.

¹⁴Áko éí t'áá ła'a jínígo néit'aahígíí nihá bééhániihii át'ée doo, áádóó Bóhólníihii bich'į'go hodílzingo áłah náhdleehígíí náás da'ahíínółchííhgóó nídaoł'aah doo; díí hodílzingo áłah náhdleeh nídaoł'aahígíí bik'eh hoogáałgo ahool'áa doo.

¹⁵Tsosts'id néílkáahjį' díík'ǫsh t'áágééd bááh ályaii nídaohdį́įh doo; baa ha'aldééh góne' éí danihighan biyi'dóó díík'ǫsh nahgóó kónídaał'įįh doo, háálá ła' éí hahoolzhiizhdóó tsosts'id jį́įjį' díík'ǫsh bił bááh ályaii jííyą́'ígíí éí Ízrel dine'é bits'ą́ąjį' hodi'yoolyééł.

¹⁶Átsé jínígíí áádóó tsosts'id jínígíí éí hodiyingo áłah ná'ádleeh baa niná'áldah doo; éí bijį́ doo ni'doonish da; t'áá hazhó'ó t'ááłá'í jinítínígo ha'át'íhída dajiyą́ą dooleełígíí éí t'éiyá hasht'éédajiil'įįh doo.

¹⁷Áádóó hodílzingo áłah náhdleeh baa nináhkahgi díík'ǫsh t'áágééd bááh ályaii nídaohdį́įh doo, háálá t'áá éí bijį́į́dą́ą́' Ííjip kéyahdę́ę́' nidine'é dah deínéehii ch'íní'eezh ni'. Éí bąą ła'a jį́ hodílzingo áłah náhdleeh góne' náás da'ahíínółchííhgóó bik'eh hoogáałgo ahool'áa doo.

¹⁸Átsé nídízídígíí dį́į́'ts'áadahgóó yoołkáałgo i'íí'ą́ągo díík'ǫsh t'áágééd bááh ályaii nídaodį́įh doo; éí naadiin ła'góó yoołkáałjį' i'íí'ą́ąjį' ákót'ée doo.

¹⁹Háálá tsosts'id néílkáahjį' danihighan góne' díík'ǫsh doo ła' si'ą́ą da doo, háálá t'áá háiida díík'ǫsh bił bááh ályaii jííyą́'ígíí éí Ízrel dine'é dah deínéehii bits'ą́ąjį' hodi'yoolyééł; dé'éyóní, doodaii' kéyahgi Ízrel dine'é nilį́įgo yizhchį́į nidi doo bił ho'dólta' da doo.

²⁰Ha'át'íhída díík'ǫsh bił ályaii doo nídaohdį́įh da doo; t'áá ałtsogóó kéédahoht'į́įgi díík'ǫsh t'áágééd bááh ályaii t'éí nídaohdį́įh doo.

²¹Mózes éí Ízrel dine'é yá aląąjį' naazíinii bíká ázhdííniidgo ábijiní, T'áá nihí dibé yázhí ádá áts'á dahohníiłgo atis'adeesdzá ádoolníłígíí biniyé niha'áłchíní ánéelt'e'ígíí bik'ehgo dibé yázhí nidadoołtsił.

²²Ch'il hísap wolyéhígíí nídadidoołjołgo łeets'aa' háámazí biyi'jį' dił yadahooziidígíí ch'é'étiin siláii ałts'ą́ą́hjí áádóó naadasitánígi bee daashdlish doo. Hoos'įįdjį' nihí t'áadoo tł'óó'góó nidaahkaí.

²³Háálá Bóhólníihii éí Ííjip dine'é bitahgóó hadidoogáałgo atíidoolííł, áko ch'é'étiin siláii ałts'ą́ą́hjí áádóó naadasitánígi bąąh Bóhólníihii éí dił yiyiiłtsą́ągo t'óó ch'é'étiin yitis doogááł, áádóó danihighan góne' na'ałtseedii nihił yah adoogáałgo ła' atínihidoolíłígíí doo yadi'doo'áał da.

²⁴Díí hodílzingo áłah náhdleeh nídaoł'aahígíí bik'eh hoogáałii nihá áádóó nihiye'ké bá át'éego ahool'áa doo.

²⁵Ákódzaago Bóhólníihii t'áá bí kéyah baa noohkaidi nihaididoo'áałgo yee nihoní'áanii áadi díí nahadlá nídaoł'aah doo.

²⁶Áko nihada'áłchíní yínídanihídíłkid doo, áko ádanihididoohniił, Ha'át'íísh biniyé kót'éego nidahohłá?

²⁷Áko ádabididoohniił, Díí náá'iiniihii éí Bóhólníihii bi'atis'adeesdzá bee bééhániihii át'é, jó, bí éí Ííjip kéyahgi Ízrel dine'é yitis deeyá; Ííjip dine'é t'éí íísdįįd yę́ędą́ą́' nihí dah yiikahgi éí deidzíí'. Áko diné yaa ádaadzaago nidahasá.

²⁸Ízrel dine'é dah diikaigo ákódaadzaa. Bóhólníihii éí Mózes áádóó Éran yich'į' yee haadzí'ígi ádaadzaa.

²⁹Áko tł'é'ííłníi'go Bóhólníihii éí Ííjip kéyahgi alą́ąjį' nidahaazhchíinii ałtso íísdįįd; Féro éí habikáá'dóó nahat'áii bikáá' dah dzizdáago há alą́ąjį' yizhchíinii bee hahool'áádóó yaago ná'áyaaí góyaa awáalyaa sidáhígíí bá alą́ąjį' yizhchíinii bee nihool'áajį' ałtso íísdįįd, índa alį́į́' ádaat'éii alą́ąjį' nidahaazhchíinii ałtso íísdįįd.

³⁰Áko t'áá éí bitł'éé' Féro áádóó bá nidaal'a'í índa Ííjip dine'é t'áá ałtso nídiijée'go ayóó íits'a'go Ííjip kéyahgi cha hááyá, háálá t'áá dahooghanígi ła' dazneezná.

³¹Áko t'áá éí bitł'éé' Féro éí Mózes áádóó Éran yíká áníigo ání, Nídoohjeehgo nihílááh; shidine'é bitahdóó nihí áádóó Ízrel dine'é bił dah doohnéehgo t'áá ádóhnínígi át'éego Bóhólníihii bich'į' nidahohłá.

³²Nihidibé áádóó nihibéégashii nidanołkaadígíí danóołkaad; ádadooniidígi át'éego ádaohnééh, áádóó shik'ijiidoohdliił.

³³Áádóó Ííjip dine'é honeetehee éí kéyahdóó t'óó hatsxį́įłgo diné yida'as'nii', háálá ádaaní, Nihí ałdó' t'áá áníiltso dadíníi'nééł, sha'shin.

³⁴Diné éí hataos'nii' t'ah doo díík'ǫsh bił álnéhígíí hééł ádajiilaago dah dazhdiijaa'; biyi' tááda'oo'nihí éí daha'éé' bee ałch'į' beda'astł'ǫ́ǫgo dah dazhdiiłjid.

³⁵Ízrel dine'é éí Mózes bizaad yik'eh dahóół'įįdgo béésh łigaii áádóó óola yódí ádaat'éii índa ée'da éí Ííjip dine'é bídajííkeed.

³⁶Áádóó Bóhólníihii éí Ízrel dine'é bich'oha'néego Ííjip dine'é baa dajooba'go ábiilaa, áko bídajííkeedígíí haa dayiiznil. Kódzaago Ííjip dine'é t'áá ákohígo ádajiilaa.

³⁷Áádóó Ízrel dine'é éí Rámsiiz hoolyéédóó Sákath hoolyéejį' jiníná; diné t'éiyágo éí hastą́ądi neeznádiindi mííl ánéelą́ą́'; áłchíní t'áadoo bił éélta'góogo.

³⁸T'óó ahojíyóí dine'é ał'ąą ádajít'éii ałdó' bił jiníná, áádóó dahalį́į́' t'óó adahayóigo dibé índa béégashii dazhnéełkaad.

³⁹Ííjip kéyahdóó taos'nii' dah dazhdiijaa'ígíí éí díík'ǫsh t'áágééd bááh ádajiilaa; taos'nii'ígíí doo díík'ǫsh bił ályaa da nít'éé', háálá Ííjip kéyahdóó t'áadoo t'ah ílíní ch'íhodi'neelkaad; t'áadoo yist'éí ádá ádajilnéhí.

⁴⁰Éí Ízrel dine'é Ííjip kéyahgi t'óó átsééd kéédahat'į́įgo dį́įdi neeznádiindóó ba'aan tádiin nááhai.

⁴¹Dį́įdi neeznádiindóó ba'aan tádiin náháhígíí ałtso nááhaigo Ííjip kéyahdóó Bóhólníihii bidine'é dah deínéehii ch'ídahaazná.

⁴²T'áá éí bitł'éé' Bóhólníihii éí Ííjip kéyahdóó ch'íhoní'eezh; t'áá éí bitł'éé' áhóót'įįdíjį' anáhwiilzhíishgo Ízrel dine'é náás da'ahílchííhgóó Bóhólníihii ch'íbiní'eezhígíí yéédaalniihgo hodílzingo áłah nádleeh nídayiil'aah doo.

⁴³Áko Bóhólníihii éí Mózes áádóó Éran áyidííniid, Díí atis'adeesdzá bééhániihii néit'aahígíí bik'eh hoogáałii át'é: dé'éyóní doo ła' atah adooyį́įł da.

⁴⁴Nidi diné t'ááłá'í jinítínígo hanaalte' éí béeso bee nidziisnii'ii bąąh náhidínóolgishgo índa atah ná'ádį́įh doo.

⁴⁵Náánáłahdę́ę́' naagháhígíí índa ideenáago naalnishii doo atah adooyį́įł da.

⁴⁶T'ááłá'í hooghaní góne' t'éí nídaahdį́įh doo; éí hooghandóó atsį' doo ła' ch'ídadooh'áał da; ts'inígíí nidi doo ła' k'ídadoohtih da.

⁴⁷Ízrel dine'é t'áá ádzíłtso t'áá ákónída'jiil'įįh dooleeł.

⁴⁸Dé'éyóní ła' nihił yikah ládą́ą́' Bóhólníihii bich'į' atis'adeesdzá bééhániihgo hodílzingo áłah ná'ádleeh néit'aahígíí yinízingo háni'dii bighandóó diné danilínígíí t'áá ałtso bąąh nídahidínóolgish áádóó bíni'dii yee atah níyáago hodílzingo áłah ná'ádleeh náyiił'aah doo, índa kéyahgi Ízrel dine'é bi'dizhchíiniigi ájít'ée doo, nidi doo bąąh nídahineeshgizhii éí doo ła' atah dazh'dooyį́įł da.

⁴⁹Kéyahgi Ízrel dine'é nilį́įgo ho'dizhchíinii índa nihitahgi dé'éyóní éí bee haz'áanii t'ááłá'íígíí bik'ehgo hodílzingo áłah ná'ádleeh níjiil'aah doo.

⁵⁰Áko Ízrel dine'é t'áá ałtso ákódaadzaa; Bóhólníihii éí Mózes áádóó Éran yich'į' yee haadzí'ígíí yida'iilaa.

⁵¹Áádóó t'áá éí bijį́ Bóhólníihii éí Ízrel dine'é dah deínéehii Ííjip kéyahdóó ch'íiní'eezh.