Read Navajo EXODUS 13 Bible Online

EXODUS 13 - Navajo bible

EXODUS 13

¹Áko Bóhólníihii éí Mózes yich'į' haadzíi'go kóní,

²Ízrel dine'é bitahgi alą́ąjį' yizhchíinii t'áá át'é diyingo shá nihidí'aah; jó, diné áádóó alį́į́' éí daashí.

³Áko Mózes éí dine'é áyidííniid, Díí jínígíí béédaałniih: éí Ííjip kéyahdę́ę́' naalte' danohłį́ yę́ędóó ch'ínoonáa ni', háálá Bóhólníihii éí díí kéyahdóó bibee adziilii yee ch'éénihí'nil, áko díík'ǫsh bił bááh ályaii t'áadoo nídaohdį́hí.

⁴Éíbib yiziłígíí binih díí jį́į́ góne' ch'ínoonáa ni'.

⁵Áko Bóhólníihii éí Kéínan dine'é áádóó Het dine'é áádóó Ámor dine'é áádóó Háíva dine'é índa Jííbas dine'é bikéyahígíí; éí danihizhé'é yę́ę yich'į' yee ádee hadoodzíi'go kéyah nihaididoo'áłígíí, éí kéyah yá'áhoot'éehgi abe' índa tsés'ná bitł'izh bee áda'azįįdgo haz'ą́ąjį' anihíí'eezhgo, áadi díí yiziłígíí binih díí nahadlá nídaoł'aah doo.

⁶Tsosts'id jį́ éí díík'ǫsh t'áágééd bááh ályaii nídaohdį́įh doo, áádóó tsosts'id jį́ aleeh góne' Bóhólníihii bich'į'go dahodíínóhsingo áłah náhdleeh doo.

⁷Tsosts'id jį́ díík'ǫsh t'áágééd bááh ályaii nídaohdį́įh doo; díík'ǫsh bił bááh ályaii danihighandi nidi doo ła' si'ą́ą da doo; t'áá nihił nahaz'ánígóó nidi doo ła' díík'ǫsh si'ą́ą da doo.

⁸Áko éí bijį́ niye' bee bił hólne' doo; Ííjip kéyahdę́ę́' ch'éénísdzáago Bóhólníihii shá kódzaaígíí bąą díí kódeiit'į́.

⁹Áko díí bee ééhózinii níla' bikáa' doo, áádóó bee ééhániihii nítáa'gi bikáa' doo, áko Bóhólníihii bibee haz'áanii baa yáníłti' doo, háálá Bóhólníihii bibee adziilii yee Ííjip kéyahdę́ę́' háánihíí'eezh.

¹⁰Éí bąą díí bik'eh hoogáałii bik'eh dahonoł'į́įgo t'áá nináháhááh bik'eh nahadlá nídaoł'aah doo.

¹¹Áko Bóhólníihii éí Kéínan dine'é bikéyah yiih nihíí'eezhgo éí nihich'į' áádóó danihizhé'é yę́ę yich'į' yee ádee hadoodzí'ígíí bik'ehgo, áádóó éí kéyah nihaidiní'ą́ągo

¹²alą́ąjį' nidahachíhígíí t'áá ałtso Bóhólníihii bá ats'ádahidoh'aah doo, índa alį́į́' nihee dahólóonii alą́ąjį' deishchíinii a łdó' dabiką'ígíí t'áá ałtso Bóhólníihii bí doo.

¹³Áko télii alą́ąjį' nidahachíhígíí t'áá ałtso bitsásk'ehgi dibé yázhígo bee t'ą́ą́' nááhidííłnih, doodaii', Doo t'ą́ą́' nááhideeshnih da, nínízingo éí t'óó bik'os k'ídíítih, áádóó Ízrel dine'é alą́ąjį' haye'ké há nidahaazhchíinii t'áá ałtso éí dibé yázhí bee t'ą́ą́' náádahojiiłniih doo.

¹⁴Áko ííshją́ą́ háadida léi' niye' nanídééłkidgo kóníigo, Díishą' ha'át'íí biniyé kódaaht'į́? Áko kót'éego bich'į' hadíídzih, Bóhólníihii bibee adziilii yee Ííjip kéyahdi naalte' daniidlį́ yę́ędóó háánihíí'eezh.

¹⁵Ákódzaago Féro yistee'go k'asdą́ą́' t'áadoo nihéé'níłnii' da, áko Ííjip kéyahgi Bóhólníihii éí alą́ąjį' daazhchíinii ałtso íísdįįd; diné alą́ąjį' bá daazhchíinii índa alį́į́' alą́ąjį' deishchíinii ałtso íísdįįd; éí bąą alą́ąjį' nidahachíihii dabiką'ii t'áá ałtso Bóhólníihii bich'į'go náádahashniih, nidi shiye'ké alą́ąjį' nidahachíihii t'áá ałtso t'ą́ą́' náádahashniih.

¹⁶Áko díí bee ééhózinii níla' bikáa' doo, áádóó bee ééhániihii nítáa'gi bikáa' doo, háálá Bóhólníihii bibee adziilii yee Ííjip kéyahdę́ę́' háánihíí'eezh.

¹⁷Ákódzaago Féro éí Ízrel dine'é yéé'níłnii'go Diyin God éí Filístiya dine'é bikéyah góne' doo dahodii'eezh da, azhą́ áájí áhání nidi, háálá Diyin God ání, Éí doodaléi' anaa' hodooleeł yaa ákodaniizį́į'go łahgo át'éego tsíńdadookosgo Ííjip kéyahgóó t'ą́ą́' nihéédoo'nééł.

¹⁸Nidi Diyin God éí diné yoo'ishgo honoojíígóó Tónteel Łichíí' bich'į'go yiní'eezh, áko Ízrel dine'é éí anaa' yiniyé hasht'e'ádadólzingo Ííjip kéyahdę́ę́' ch'íníná.

¹⁹Áko Mózes éí Jóseph yę́ę bits'in yoojih, háálá Jóseph éí Ízrel dine'é hach'į' ádee hadadeesdzíi'go ájíní, Diyin God t'áá aaníí nihaa hodooleeł, índa kodóó dah doohnéehgo shits'in deínóhjáah dooleeł.

²⁰Áko Sákath hoolyéédóó dah náázhdii'náago Íítam hoolyéedi honoojí bibąąhgi nizhníná.

²¹Áádóó Bóhólníihii éí jį́įgo k'os níyizgo yee halą́ąjį' hool'ingo hoo'ish, índa tł'ée'go kǫ' níyizgo bee há hool'ingo hoo'ish, áko jį́įgo índa tł'ée'go éí bik'ehgo joonééł.

²²Áko jį́įgo k'os níyizígíí índa tł'ée'go kǫ' níyizígíí t'áadoo hats'áldoh da.