Read Navajo EXODUS 14 Bible Online

EXODUS 14 - Navajo bible

EXODUS 14

¹Áko Bóhólníihii éí Mózes yich'į' haadzíi'go kóní,

²Ízrel dine'é bich'į' handziih, naanáhkáahgo Páí-haháírath bich'į'gi nidoohnééł, éí Mígdol hoolyéédóó tónteel bich'ijígo Béíyal-zíífan bíighahgi tónteel bibąąhgóó nidoohnééł.

³Áko Féro ádidooniił, Ízrel dine'é éí kéyahgi tsístł'aaskai lá; honoojí yiniiłt'aaskai.

⁴Áko Féro bijéí náádeestł'isgo hakéé' nídidoojahgo hódoołnééł, índa Féro áádóó bisiláo biniinaa shaa hodoo'nih, áko shí, Bóhólníihii nishłį́įgo Ííjip dine'é bił béédahodoozįįł. Áko t'áá ákódadziidzaa.

⁵Áko Ííjip dine'é aláahgo binanit'a'í éí Ízrel dine'é yóó'íínánígíí bee hoł hóone', áko Féro índa há nidaal'a'í dabijéí yee diné yik'ijį' daazlį́į'go tsídadeezkéezgo ádadííniid, Díishą' haa deiit'įįd; Ízrel dine'é nihá nidaal'a' yę́ę bééda'siilnii' lá.

⁶Áko Féro bitsinaabąąs bijáád naakiígíí hasht'eyiilaago bidine'é yił dah diiná.

⁷Áko tsindaabąąs bijáád naakiígíí hastą́ądi neeznádiingo atah haasdláa'go áádóó Ííjip kéyahdi tsindaabąąs bijáád naakiígíí t'áá ałtso bee índa bik'ehgo nida'abaahígíí t'áá bił dashdiiná.

⁸Áko Bóhólníihii éí Féro Ííjip dine'é aláahgo yinanit'a'í yijéí yiyííłtł'isgo Ízrel dine'é yikéé' nídiibaa', jó, Ízrel dine'é t'áadoo náhoniyésí dah diiná.

⁹Áko Ííjip dine'é éí Féro bilį́į́' índa bitsindaabąąs bijáád naakiígíí áádóó łį́į́' yee nidaabaahii índa bisiláo t'áá ałtso yił hakéé' níná, áko tónteel bibąąhgi Páí-haháírath bich'į'gi Béíyal-zíífan bíighahdi nizhnínáago hóníłná.

¹⁰Áko Féro éí Ízrel dine'é yit'áahjį' yinéełgo dabiiłtsą́, jó, Ííjip dine'é hakéé' yinééł lá. Áko t'óó báhádzidgo Ízrel dine'é nídadzisdzíidgo éí Bóhólníihii yich'į' hadadeeshghaazh.

¹¹Áko Mózes ádayidííniid, Da' Ííjip kéyahdiísh łeehwii'nííł ádaadingo honoojíidi dadíníi'nééł biniyé nihíí'ish? Ha'át'éegoshą' Ííjip kéyahdóó hanihííní'eezhgo doodahági ánihiinilaa?

¹²Shą́ą́', Ííjip kéyahdi kódadii'níigo nich'į' hadasiidzíi' ni'. Nihíni'dii nideiikaigo Ííjip dine'é t'éí bá nideiil'a'. Jó, honoojíigi t'óó díníi'néłígíí biláahgo Ííjip dine'é bá nideiil'a'jígo nihá yá'át'éeh doo nít'éé'.

¹³Áko Mózes éí dine'é áyidííniid, T'áadoo nídaałdzidí; dziilí bee adahidíínóhsį́, áko Bóhólníihii bee yisdá'iildéehii deidoołtsééł; éí díí jį́ nihich'į' ííshjání íidoolííł, jó, Ííjip dine'é díí jį́ daoh'ínígíí hool'áágóó doo náádeidoołtséeł da.

¹⁴Bóhólníihii nihá naabaah doo; nihí éí t'óó hasht'edínóht'é.

¹⁵Áko Bóhólníihii éí Mózes áyidííniid, Ha'át'íísh biniyé náshiinikąąh? Ízrel dine'é, Bíni'dii náásgóó wohnééł, bidiní.

¹⁶Áko nigish nídiitįįhgo tónteel bikáa'jigo bił dah didiilníihgo ałts'ádoolk'oł, áádóó Ízrel dine'é éí tónteel biyi' ni' yíłtseii yikáá' ha'naa nidookah.

¹⁷Shí lą́ą, t'áá shí, Ííjip dine'é bijéí dadeestł'isgo nihikéé' adoonééł, áko Féro áádóó bisiláo áádóó bitsindaabąąs bijáád naakiígíí índa łį́į́' yee nidaabaahii bik'eh díshdlį́į'go bee shaa hodoo'nih.

¹⁸Ííjip dine'é éí shí Bóhólníihii nishłį́įgo hoł béédahodoozįįł. Féro áádóó bitsindaabąąs bijáád naakiígíí índa łį́į́' yee nidaabaahii bik'eh díshdlį́į'go bee shaa ha'niihgo ádeeshłííł.

¹⁹Áko Diyin God bidiyingo naal'a'í éí Ízrel dine'é dah yinéełii yoo'ishígíí dah diiyáago hakéédę́ę'go niníyá, áádóó k'os níyizígíí hadááhdóó dah diildogo hakéédę́ę'go niildo.

²⁰Áko Ííjip dine'é dah yinéełii índa Ízrel dine'é dah yinéełii bita' gónaa niildo, áko Ííjip dine'é bich'į'go éí k'os áádóó chahałheeł hazlį́į́', nidi łahjiígíí éí tł'ée'go bá adinídíín, ákohgo t'áadoo ałt'áahjį' dazdeeskaí yiską́.

²¹Áko Mózes éí tónteel yikáa'jigo dah didiilnii'go Bóhólníihii éí ha'a'aahdę́ę'go tł'éé' bíighah ayóó át'éego níyolgo áyiilaa; éí bee tónteel t'ą́ą́' anáálzhiizh; tónteelígíí ałts'á yííłk'olgo ni' yíłtseigo áyiilaa.

²²Áko Ízrel dine'é éí tónteel biyi' ni' yíłtseii yikáá' ha'naa deezná, áko honish'náájí índa honishtł'ají ałts'ą́ą́hjí tó nihidii'á silį́į́'.

²³Áko Ííjip dine'é éí tónteel biyi' góne' hakéé' dah diináago Féro bilį́į́' áádóó bitsindaabąąs bijáád naakiígíí índa łį́į́' yee nidaabaahii t'áá ałtso yee hakéé' ííná.

²⁴Ákódzaago yikáít'áahjį' ayííłką́ągo kǫ' éí k'os bił níyizgo yildohígíí biníkáádę́ę́' Bóhólníihii éí Ííjip dine'é siláo yinééł'į́į'go yich'į' hodiisnáá'.

²⁵Áko tsindaabąąs bijáád naakiígíí bijáád yits'ą́ą́' yeidiyiiníiłgo nidahidinikááh silį́į́'; éí bąą Ííjip dine'é ádadííniid, Bíni'dii Ízrel dine'é bits'ą́ąjigo t'ą́ąjį' dah didiijah, háálá Bóhólníihii éí Ííjip dine'é yich'į' anaa' ííł'į́.

²⁶Áádóó Bóhólníihii éí Mózes áyidííniid, Tónteel bikáa'jigo dah didiilnííh, áko Ííjip dine'é áádóó bitsindaabąąs bijáád naakiígíí índa łį́į́' yee nidaabaahii tó bik'i diilkǫǫh.

²⁷Áko Mózes éí tónteel bikáa'jigo dah didiilnii' áádóó hayííłką́ągo tónteel ałch'į' kónádzaago nídiilkǫ', áko Ííjip dine'é éí tónteel biyi' tsístł'aaskai, áádóó Bóhólníihii éí Ííjip dine'é bik'ijį' tó ahinéidiiłk'olgo íísdįįd.

²⁸Áko tóhígíí ałch'į' kónádzaago tsindaabąąs bijáád naakiígíí índa łį́į́' yee nidaabaahii áádóó Féro bisiláo t'áá ałtso tónteel biyi' góne' hakéé' íínáago tó bik'i diilkǫ'; t'ááłá'í nidi t'áadoo ła' yidzíi' da.

²⁹Nidi Ízrel dine'é éí tónteel biyi' ni' yíłtseii yikáá' ha'naa niníná, jó, honish'náájí índa honishtł'ají ałts'ą́ą́hjí tó nihidii'á.

³⁰Ákódzaago t'áá éí bijį́į́dą́ą́' Bóhólníihii éí Ííjip dine'é bits'ą́ąjį' Ízrel dine'é yisdáyíínil, áko Ízrel dine'é éí Ííjip dine'é daneeznáago tábąąhgóó nihidíl'áago dayiiłtsą́.

³¹Áko Ízrel dine'é éí Bóhólníihii ayóó át'éego Ííjip dine'é áyííł'įįdígíí dayiiłtsą́ągo Bóhólníihii deidísin silį́į́', áádóó Bóhólníihii índa bá naal'a'í Mózes dayoosdląąd.