Read Navajo EXODUS 15 Bible Online

EXODUS 15 - Navajo bible

EXODUS 15

¹Ákohgo Mózes índa Ízrel dine'é díí sin yee Bóhólníihii yich'į' dahóótáál kódaaníigo, Bóhólníihii bich'į' hashtaał doo, háálá bí ayóó át'éego ak'eh deesdlį́į́'; łį́į́' áádóó bik'i dah nidzizdáii tónteel yiih hwiistł'ííd.

²Bóhólníihii éí bee shidziilii áádóó shiyiin nilį́, k'ad bee yisdééyáii silį́į́', bí shiDiyin God nilį́, áádóó baa hashniih doo; shizhé'é yę́ę biDiyin God nilį́; éí ayóó át'éego íínísin doo.

³Bóhólníihii éí diné anaa' yik'eh didlíinii nilį́, Bóhólníihii bee bi'dójí.

⁴Féro bitsindaabąąs bijáád naakiígíí áádóó bisiláo éí tónteel yiih yiyiistł'ííd, áádóó bisiláo binanit'a'í ts'ídá aláahgo dahayóí yę́ę Tónteel Łichíí' bii' tó bííghą́ą́'.

⁵Tó ditáanii bik'i diilkǫ'go tségi át'éego táłtł'ááh níídee'.

⁶Bóhólníihii nílíinii, níla' nish'náájí bee ayóó ánít'éego nidziil; Bóhólníihii nílíinii, níla' nish'náájí bee ana'í ahiih néíníghą́ą́'.

⁷Áko ayóó át'éego ts'ídá aláahdi ánít'éii beego nik'ijį' danilíinii bik'eh dínídlį́į́'; bich'į' náhóóchįįdgo tł'oh behégod nahalingo adíídeez.

⁸Níníí'dę́ę́' bee náhidíyoołii bee tó ahąh íinilaa; tó ałt'ah nehegeehgo nídiidzá; tó ditáanii bitł'áahjį'go tónteel yíníłtł'is.

⁹Ana'í danilíinii ádaaní, Bikéé' adii'nééł; bídiilnééł; bindaalye'é dadiilnéełgo ałts'ádadi'dii'nił; bídin daniidlíinii bee hwiih dadiidleeł; nihidiltłish bee ádahodiildįįł.

¹⁰Nits'ą́ą́dę́ę́' hááyolígíí bee tónteel hak'i dadiilkǫ'; béésh diłhį́hígi át'éego tó ayóó ábóodziilii bitł'ááshníídee'.

¹¹Bóhólníihii nílíinii, háishą' diyin dabidi'níinii bitahgóó nigi át'é? Háishą' nigi át'éego ayóó át'éego dílzin, t'óó bik'e'íyée'go baa ha'niih; t'óó bik'eda'ayóii áyoolííł?

¹²Ninish'náájí bee dah dinilnii'go nahasdzáán adabiisna'.

¹³Bee'aa a'ááh nínízinii bee diné ch'ííní'eezhígíí yisdéínínil; yí'ishígíí nihodiyingo haz'ą́ąjį' nidziil bee ííní'eezh.

¹⁴Ał'ąą dine'é da'diizts'ą́ą'go bitah dahoditłid doo; Filístiya kéyahdi kéédahat'íinii yínííł yiih dínóodah.

¹⁵Íídam dine'é binanit'a'í t'óó bił yéé' dahodooleeł; Mó'ab kéyahdóó diné ayóó ádaat'éii atah hoditłid yiih dínóodah; Kéínan kéyahdi kéédahat'íinii nisidookah.

¹⁶Yéé' índa náhádzid bik'iidooldoh; nigaan ayóó át'éii bik'ee tsé doo haamáasii nahalingo doo nidajii'náa da doo, Bóhólníihii nílíinii, nidine'é háíní'nilígíí tsé'naa niikaijį' ákót'ée doo.

¹⁷Éí yah ahodíí'ishgo t'áá ni nidził dooleełígi k'idahodidíílééł; Bóhólníihii nílíinii, kééhót'į́į doogo áhwiinilaagi, éí hodiyingo haz'ánígíí, Bóhólníihii nílíinii, t'áá ni níla' bee hasht'ehwiinilaagi bohoníłdzilgo k'idahodidíílééł.

¹⁸Bóhólníihii hool'áágóó bóhólníihgo ahóyéel'áa doo.

¹⁹Jó, Féro bilį́į́' áádóó bitsindaabąąs bijáád naakiígíí índa łį́į́' yee nidaabaahii éí tónteel yiih yíná áádóó Bóhólníihii éí tónteel hak'ijį' anáyííłk'ol, nidi Ízrel dine'é t'éiyá tónteel biyi' ni' yíłtseii bikáá' ha'naa niníná.

²⁰Áko Diyin God yá halne'ii Míriyam éí Éran bilah nilį́įgo ásaa' yilghaałígíí ła' néidii'ą́ągo asdzání t'áá ałtso ásaa' yilghaałígíí dayíjáahgo hoł da'ílzhíishgo hakéé' yikah.

²¹Áko Míriyam áhodííniidgo ání, Bóhólníihii bich'į' dahohtaał, háálá ayóó át'éego ak'eh deesdlį́į́'; łį́į́' áádóó bik'i dah nidzizdáii tónteel yiih hwiistł'ííd.

²²Áko Tónteel Łichíí' hoolyéédóó Mózes éí Ízrel dine'é dah yidii'eezhgo honoojí Shur hoolyéejį' niníná, áko honoojíí góne' tágí jį́ joonéełgo t'áadoo tó ła' bik'íjíkai da.

²³Áko Méírah hoolyéegi jinínáago ákwii tó bik'íjíkaigo ch'ééh bidazh'niidlį́į́h, háálá tó dích'íi'go bąą Méírah hoosye'.

²⁴Áádóó diné éí Mózes yich'į' saad dahasłį́į'go ádaaní, Ha'át'íishą' dadiidlį́į́ł?

²⁵Áko Mózes éí Bóhólníihii náyooskango Bóhólníihii éí tsin sikaadii ła' hach'į' ííshją́ą́ áyiilaago éí tó biih jííłt'e'go t'áá áko tó łikan ályaa. Ákwe'é Bóhólníihii yee nihoní'áanii índa bik'eh hoogáałii há áyiilaa, áádóó ákwe'é bee hwééhodoozįįłii yee hóneeztą́ą́',

²⁶kóníigo, Bóhólníihii nihiDiyin God biinéé' hazhó'ó deísółts'ą́ą'go áádóó yá'át'éehgo binááł ádaahníiłgo, áádóó bibik' eh ó'oo'níiłii índa yee nihwiiz'áanii t'áá ałtso deísółts'ą́ą'go bik'eh dahonoł'į́įgo naałniih éí Ííjip dine'é bik'ijį' kóshłaaígíí doo ła' nihik'ijį' kódeeshłíił da, háálá shí, Bóhólníihii hadaałt'é ánánihoodlíiłii nishłį́.

²⁷Áko Íílim kéyahgi jiníná; ákwii naakits'áadahgo tó hadaazlį́į́ lá; ákwii tsin páam wolyéii tsosts'idiingo naazkaad lá; ákwe'é tóogi nidajiizná.