Read Navajo EXODUS 16 Bible Online

EXODUS 16 - Navajo bible

EXODUS 16

¹Íílim kéyahdóó dah náádii'náago Ízrel dine'é yinéłígíí t'áá ałtso honoojí Sin nahós'a'gi éí Íílim kéyah áádóó Dził Sáínai bita'gi ákwii niníná; Ííjip kéyahdę́ę́' hajíínáádóó bik'ijį' naaki nídízííd binih ashdla'áadah jį́į́ góne' dashdiiná.

²Áko honoojíidi Ízrel dine'é yinéłígíí t'áá ałtso Mózes índa Éran yich'į' saad dahasłį́į́'.

³Áko Ízrel dine'é ádahodííniid, Bíni' lá, Ííjip kéyahdi Bóhólníihii bíla' yee nanihidoołtsił nít'éé'; áadi atsį' hadanigáahgo binaháaltą́ą łeh nít'éé' áádóó bááh deidą́ągo bee hwiih daniidlį́į łeh nít'éé'; jó, t'áá dah yii'nééł nít'éé' dichin bee nihidííghą́ą́ł biniyé díí honoojíijį' anihííní'eezh.

⁴Ákohgo Bóhólníihii éí Mózes áyidííniid, Jó, yá'ąąshdę́ę́' bááh nináłtį́įhgo nihá ádeeshłííł, áko diné ch'éédajikahgo t'áá hwíighahígo t'áá ákwíí jį́ nínádajiidlah doo, áádóó hahasíid doo, áko shibee haz'áanii daats'í bik'ehgo jookah doo, doo daats'í bik'ehgo jookah da doo.

⁵Áko kót'ée doo, hastą́ą́h jį́į́ góne' yah anídajiikáhígíí hasht'éédajiil'įįh doo, áko t'áá ákwíí jį́ nínádajiidlahígíí naakidi ákónánéelt'e'go nínádajiidlah doo.

⁶Mózes índa Éran éí Ízrel dine'é kwíidííniid, I'íí'ą́ągo ííshją́ą́ díí nihił béédahodoozįįł; jó, Bóhólníihii éí Ííjip kéyahdę́ę́' ch'éénihiní'eezhgo át'é,

⁷áko abínígo índa Bóhólníihii yee ayóó át'éii deidoołtsééł, háálá éí bich'į' saad dahonohłónígíí yidiits'a'. Nihíshą' ha'át'íí niidlį́įgo nihich'į' saad dahonohłǫ́?

⁸Áko Mózes ádííniid, Kót'ée dooleeł: Bóhólníihii éí e'e'áahgo atsį' nihaná'áltso' doo, índa abínígo éí bááh bee hwiih nídaahdleeh doo, háálá Bóhólníihii t'áá bí bich'į' saad dahonohłónígíí yidiits'a'; nihíshą' ha'át'íí niidlį́? Doo nihí nihich'į' saad dahonohłǫ́ǫ da, nidi Bóhólníihii bich'į' saad dahonohłǫ́.

⁹Mózes éí Éran áyidííniid, Ízrel dine'é yinéłígíí t'áá ałtso kóbidiní, Bóhólníihii bit'áhájį' dohkááh, háálá saad dahonohłónígíí yidiizts'ą́ą́'.

¹⁰Ákódzaago Éran éí Ízrel dine'é yinéłígíí t'áá ałtso yich'į' yáłti'go honoojíijigo dadéé'į́į́' nít'éé', shoo, Bóhólníihii yee ayóó át'éii k'os biyi'jį' yit'íní silį́į́'.

¹¹Áko Bóhólníihii éí Mózes yich'į' haadzíi'go kóní,

¹²Ízrel dine'é saad dahółónígíí diséts'ą́ą́', áko bich'į' handziihgo kóbidiní, E'e'áahgo atsį' nídaahdį́įh doo, índa abínígo éí bááh bee hwiih nídaahdleeh doo, áko shí, Bóhólníihii nihiDiyin God nishłį́įgo nihił béédahodoozįįł.

¹³Ákódzaago i'íí'ą́ągo dahwiiłkaahígi dééłdánii nánísą́, índa abínígo dah oonéłígíí binaagi dahtoo' hazlį́į́'.

¹⁴Áko dahtoo'ígíí dah diildogo, shoo, honoojíhígi ha'át'íí shį́į́ áłts'íísígo danímazgo shoh łibáhígi áníłtsogo ni'góó niheel'á.

¹⁵Áko Ízrel dine'é éí dayiiłtsą́ągo áda'ahidi'ní, Ha'át'íísh át'é? Háálá át'éii doo hoł béédahózin da. Mózes áhodííniid, Eii lá bááh dadoohsį́įłgo Bóhólníihii nihaidiní'ánígíí át'é ni.

¹⁶Díí Bóhólníihii yee haadzíí', Diné t'ááłá'í nítínígo haa néelt'e'go nídajidį́hígíí bik'ehgo áłah áńdaał'įįh; éí ómer bee í'neel'ąąhí bik'ehgo ádanéelt'e'go łá'í jinítínígo haníbaal yii' kéédahat'íinii bá ninádajiidlah doo.

¹⁷Áko Ízrel dine'é t'áá ákóda'iilaa: ła' t'áá atisígo, ła' éí t'áá a'ohígo áłah ádajiilaa.

¹⁸Áko ómer bee bí'néél'ąądgo lą'ígo nídajiizlá'ígíí doo ła' há ch'ínííłna' da, índa t'áá áłch'į́į́dígo nídajiizlá'ígíí doo hats'ą́ą́' bi'oh da; diné t'ááłá'í jinítínígo ajiyánígíí bik'ehgo nínádajiidlah.

¹⁹Áko Mózes áhodííniid, T'ááká diné ła' abíníjį' ádá áádzósįįh lágo.

²⁰Ákondi ła' Mózes doo dayíists'ą́ą́'góó ła' abíníjį' ádá áádeisįįd, áádóó ch'osh bitah dahazlį́į'go daniłchxon daazlį́į́', áko Mózes hach'į' báhóóchįįd.

²¹Áádóó t'áá abíní bik'eh diné t'ááłá'í jinítínígo t'áá da'jiyánígíí bik'ehgo nínádajiidlah, áko náhoniigahgo bi'oh nínáda'jiidlahígíí éí nídadiłhįh.

²²Nít'éé' ákódzaago hastą́ą́h jį́ aleeh góne' bááh naakidi ákódanéelt'e'go nídayiizláá': ómer bee í'neel'ąąhí naakidi ookááł bíighah hódáághah, áko dah oonéłígíí bitahdóó bídahólníihii t'áá ałtso Mózes yaa yíkaigo yił dahoolne'.

²³Áko áyidííniid, Díí Bóhólníihii yee haadzí'ígíí át'é; yiską́ągo Bóhólníihii bich'į' há'áyį́į́h jį́ át'éego dílzin; ła' daałt'eesígíí éí daałt'ees, índa daałbéézhígíí éí daałbéézh, áádóó yidziihígíí yiską́ągo biniyé ádá áádadoosįįł.

²⁴Áko Mózes ádííniidígi át'éego abíníjį' ła' áádadzisįįd, áko doo niłchxon silį́į' da; doo nidi ła' ch'osh bitah da.

²⁵Áko Mózes ádííniid, Eii díí jį́ daahsą́, háálá díí jį́ Bóhólníihii bich'į' háá'áyį́į́h jį́ át'é; díí jį́ éí daníláhgóó doo ła' bik'ídadoohkah da.

²⁶Hastą́ą́h jį́įjį' nínádahohdlah doo, nidi tsosts'id jínígíí éiyá háá'áyį́į́h jį́ át'é; ákóne'é éí ádin doo.

²⁷Nít'éé' ákódzaago tsosts'id jį́ azlį́į́' góne' diné ła' mána nídahizhdoolah biniyé ch'íjíkai, nidi t'áadoo ła' bik'íjíkai da.

²⁸Áko Bóhólníihii éí Mózes áyidííniid, Haa nízáágóoshą' shibik'eh ó'oo'níiłii índa shibee nahaz'áanii doo bik'eh dahonoł'į́į da doo?

²⁹Shoo, Bóhólníihii háá'áyį́į́h jį́ nihaidiní'ą́; éí bąą hastą́ą́h jį́ ná'ádleeh bik'eh bááh naaki jį́ bíighahgo nihaa néidi'ááh; nihá haz'ánígi hazhó'ó hasht'edínóht'é; bíni'dii tsosts'id jį́į́ góne' diné doo ła' nahgóó ch'ídoogáał da.

³⁰Áko tsosts'id jį́į́ góne' diné háádaasyį́į́'.

³¹Áko Ízrel dine'é éí mána yee dayíízhi'; ch'il kóriyander bináá' nahalingo łigai, áádóó tsés'ná bitł'izh bááh dá'áka'í nímazí bił ályaaígíí halniih.

³²Áko Mózes ádííniid, Díí Bóhólníihii yee haadzí'ígíí át'é; ómer bee í'neel'ąąhí hadeezbingo niha'áłchíní náás ahoolchíiłii bá nisoołką́ą doo; éí Ííjip kéyahdę́ę́' ch'ínihiní'eezhgo honoojíidi bááh nihaná'ástso' nít'éé' yę́ę deidoołtsééł.

³³Áádóó Mózes éí Éran áyidííniid, Ómer bee í'neel'ąąhí bee mána ásaa' biih nikaah; éí Bóhólníihii binááł niha'áłchíní náás ahoolchíiłii bá siką́ą doo.

³⁴Áko Bóhólníihii éí Mózes yich'į' yee haadzí'ígíí bik'ehgo neeznáago bik'eh ó'oo'níiłii bee bééhániihii bidáahgi siką́ą dooleełgo Éran hasht'e'niiníką́.

³⁵Áko Ízrel dine'é éí mána deiyą́ągo dízdiin nááhai; kéyah biyi' diné kéédahat'ínígíí yaa nínáajį' Kéínan kéyah hoodzo yitis yínáajį' mána deiyą́ągo nihoolzhiizh.

³⁶Ómer bee neeznáadi ha'ooką́ągo íífa bii' hadilbį́į́h.