Read Navajo EXODUS 17 Bible Online

EXODUS 17 - Navajo bible

EXODUS 17

¹Áko Ízrel dine'é t'áá ałtso tádínéehgo Bóhólníihii ádííniidii bik'ehgo honoojí Sin hoolyéédóó dah náádii'ná, áádóó Réfidimgi niníná, nidi áadi tó dazhdoodlį́įłii ádin lá.

²Éí bąą diné éí Mózes nayíyádaałti'go kódaaní, Tó dadiidlį́łígíí nihaa diní'aah. Áko Mózes áhodííniid, Ha'át'íí biniinaa nashíyádaałti'? Ha'át'íí biniyé Bóhólníihii nibídanohtaah?

³Áko ákwii diné t'áá íiyisí dibáá' daazlį́į'go Mózes yich'į' saad dahółǫ́ǫgo ádaaní, Ha'át'éegoshą' nihí áádóó niha'áłchíní índa danihilį́į́' dibáá' bee nihidííghą́ą́ł biniyé Ííjip kéyahdę́ę́' ch'ínihííní'eezh?

⁴Áko Mózes éí Bóhólníihii náyookąąhgo kóní, Díí dinéshą' daa deeshłííł? K'adę́ę tsé yee shił nidadzíłne'.

⁵Áko Bóhólníihii éí Mózes áyidííniid, Nílááh, diné bilą́ąjį' ninínááh áádóó Ízrel dine'é aląąjį' naazíinii bił díkááh, índa nigish bee tooh nídííníłhaalígíí yítį́įłgo ákǫ́ǫ́ dínááh.

⁶Jó, Hórebdi tsé si'ánígíí bikáa'gi nidáahgi honishłǫ́ǫ doo; ákwii tsé nídidííłhałgo biyi'dę́ę́' tó hadoogohgo diné da'doodlį́į́ł. Áko Ízrel dine'é aląąjį' naazíinii binááł Mózes t'áá ákódziidzaa.

⁷Áko éí haz'ánígi Másah índa Méribah hoosye', háálá ákwe'é Ízrel dine'é nidaalteeh nít'éé', áádóó ałdó' Bóhólníihii yídaneeztą́ą'go ádaaní, Da' Bóhólníihiísh nihitahgi hólǫ́, dooda daats'í?

⁸Ákohgo Ámalek dine'é Réfidim hoolyéegi yíkaigo Ízrel dine'é yił da'ahoogą́ą́'.

⁹Áko Mózes éí Jáshowa áyidííniid, Diné bitah híláahgo nílááh Ámalek dine'é bił da'ahohgą́; yiską́ągo shí éí Diyin God bigish dah yishtį́įłgo wók'ą́ągi dah sézį́į doo.

¹⁰T'áá áko Jáshowa t'áá Mózes áhodííniidígi ádziidzaago Ámalek dine'é bił da'ahijoogą́ą́'. Áádóó Mózes áádóó Éran índa Her bił wók'ą́ą́góó hadziskai.

¹¹Ákódzaago Mózes dah doolnihgo Ízrel dine'é ak'eh dadidlį́, nidi bíla' yaa ánáyiil'įįhgo éí Ámalek dine'é ak'eh dadidlį́.

¹²Ákohgo Mózes bigaan nanííłna'go tsé ła' bá nízhdii'ą́ągo biyaa ajíí'ą́ągo yik'i dah neezdá, áko Éran áádóó Her ałts'ą́ą́hjí sizį́įgo hagaan dego yótą', áko hasht'e'dashdoolnihgo t'áá ákót'éego i'íí'ą́.

¹³Áko Jáshowa éí Ámalek índa bidine'é ałdó' diltłish bee bik'eh jideesdlį́į́'.

¹⁴Áko Bóhólníihii éí Mózes áyidííniid, Díí bééhániih doo biniyé naaltsoos bikáá' bee ak'e'íłchí, áádóó Jáshowa bich'į' bee yádííłtih, háálá Ámalek bééhániih dooígíí t'áá át'é nahasdzáán bikáa'gi nahjį' kódeeshłííł.

¹⁵Áko Mózes éí bikáá' náá'iiniihí áyiilaago Bóhólníihii éí shidah na'at'a' í nilį́, níigo yee yiyíízhi'.

¹⁶Háálá ádííniid, Bóhólníihii ádee hadoodzíí', Bóhólníihii éí oochííłdóó náás oochííłgóó Ámalek dine'é yił ana'ahil'į́į doo.