Read Navajo EXODUS 19 Bible Online

EXODUS 19 - Navajo bible

EXODUS 19

¹Ííjip kéyahdę́ę́' Ízrel dine'é ch'ínínáádóó táadi hanííbą́ązgo t'áá éí bijį́ Sáínai honoojíijį' ííná.

²Jó, Réfidim hoolyéédóó dah diináago Sáínai honoojíijį' ííná, áko honoojíidi dziłtsį́įgi Ízrel dine'é t'óó áłtsééd niníná.

³Áádóó Mózes éí Diyin God yich'į' haayá, áko dziłghą́ą́'dę́ę́' Bóhólníihii hach'į' haadzíi'go kóní, Jéíkab bidine'é kóbidiní, Ízrel ba'áłchíní bił hólne'.

⁴Áko Ííjip dine'é ááł'įįdígíí áádóó atsá bit'a' bee náás hojoojihígi át'éego náás nihiníjaa'ígíí índa ádínihiish'nilígíí daołtsą́.

⁵Éí bąą k'ad t'áá aaníí shizaad bik'eh dahonoł'į́įgo índa nihił bee aha'di'nisht'áanii nihił danilį́įgo dadine'é t'áá ałtso bitahdóó t'áá shí shidine'é danohłį́į doo; jó, nahasdzáán éí t'áá át'é shí.

⁶Áko nááda'iiłniihii danohłį́įgo aláahgo nihinanisht'áa doo índa diyin dine'é shich'į'go danohłį́į doo. Díí saadígíí Ízrel dine'é bich'į' bee yáníłti' doo.

⁷Áko Mózes nádzáago diné aląąjį' naazíinii hágo yidííniidgo dabinááł díí saad t'áá át'é Bóhólníihii hach'į' yee haadzí'ígíí bił ch'íjiiz'ą́.

⁸Áko diné t'áá ałtso t'áá ahąąh ádaaní, Bóhólníihii nihich'į' yee haadzí'ígíí t'áá ałtso bik'eh ádadii'nííł. Áádóó Mózes éí diné hach'į' yee hadaasdzí'ígíí bee Bóhólníihii bił náhojoolne'.

⁹Áádóó Bóhólníihii éí Mózes áyidííniid, Shoo, k'os diłhił bee nich'į' ninishááh, áko nich'į' yáshti'go diné deididoots'į́į́ł áádóó hool'áágóó danoodlą́ą doo. Áádóó Mózes éí diné hach'į' yee hadaasdzí'ígíí bee Bóhólníihii bił náhojoolne'.

¹⁰Áko Bóhólníihii éí Mózes áyidííniid, Nílááh, diné bich'į' nídídáahgo díí jį́ áádóó yiską́ągo diyingo nidahodiyíí'aał, áádóó ha'éé' dazdoogis.

¹¹Díí jį́į́dóó naaki yiską́ąjį' ałtso hasht'e'ádazhdidoolnííł, háálá tágí jį́ aleeh góne' diné t'áá ádzíłtso hanááł Dził Sáínai bikáa'jį' Bóhólníihii hadadooleeł.

¹²Áko dziłtsį́į́góó diné bich'ą́ąhgi hoodzogo ádíílíiłgo ábididííniił, Ádaa ádahołyą́; t'ááká ła' dził bóohááh lágo; bibąąhgi nidi doo ła' bíhididooh'náał da; t'áá háiida dził yíhidéé'ná'ígíí t'áá aaníí hodi'yoolyééł.

¹³Doo ła' yididoolchił da, nidi yideelchidígíí tsé bee bił nizdoolniił, doodaii' bigházdoolkah; alį́į́', doodaii' diné éí doo t'áá hináa da doo; deenáts'aa' bidee' bee í'dílzoołí diists'ą́ą'go dził bitsį́įjį' hizhdookah.

¹⁴Áko Mózes éí dziłghą́ą́'dę́ę́' diné yich'į' hadanáádzáago diyingo diné ats'éidiní'ą́, índa dabi'éé' deizgis.

¹⁵Áádóó diné áyidííniid, Díí jį́į́dóó naaki yiską́ąjį' hasht'e'ádazhdidoolnííł; hwe'asdzą́ą́ t'áadoo bit'áahjį' nidajikaí doo.

¹⁶Ákódzaago tágí jį́ aleehgo abínígo da'di'ní áádóó nída'iilgęsh áádóó dził bąąhdóó k'os diłhił, índa deenásts'aa' bidee' bee í'dílzoołí ayóó íits'a'go diits'a', áko diné dah yinéłígíí t'áá ałtso éí yik'ee bitah dahoditłid.

¹⁷Áko Mózes éí Ízrel dine'é ninínáádóó Diyin God yaa dookah biniyé ch'íiní'eezhgo dził tsį́įdi áłah silį́į́'.

¹⁸Áko Dził Sáínai t'áá át'é łid bąąh hazlį́į́', háálá dzi ł bikáa'jį' Bóhólníihii éí kǫ' yił hadah hóóle', áko déédíljahdóó łidígíí nahalin, áádóó dził ayóó át'éego naha'ná.

¹⁹Áádóó deenásts'aa' bidee' bee í'dílzoołí nineezgo diits'a'ígíí t'óó náás áániiłgo t'áá íiyisí diits'a'go Mózes haadzíí', áádóó Diyin God biinéé' diists'ą́ą'go ánááhodoo'niid.

²⁰Áko Dził Sáínai bighą́ą'di t'áá dził bikáa'jį' Bóhólníihii hadahóóle', áádóó Mózes hágo yidííniidgo Mózes ákóde haayá.

²¹Áádóó Bóhólníihii éí Mózes áyidííniid, Hadáánídáahgo diné hazhó'ó bi'níłnííh, áko Bóhólníihii doo deidínóolgęsh da biniyé bá hoodzoígíí doo yitis dookah da, doodago éí lą́'í ádoodįįł.

²²Áko nááda'iiłniihii ałdó' Bóhólníihii yit'áahjį' dookahígíí bíni'dii dadiyingo ats'á'ádadidoot'ááł, áko Bóhólníihii doo nabidoołtsił da.

²³Áko Mózes éí Bóhólníihii áyidííniid, Diné doo Dził Sáínai yóokááh át'ée da, háálá t'áá íiyisí bee ánihidííníniidgo ádíní, Dziłtsį́įgi hoodzoígíí doo bitis na'adáágóó dził dílzingo nidinoh'aah.

²⁴Áko Bóhólníihii áhodííniid, Nílááh, hadáánídáahgo áádę́ę́' Éran bił hadíí'ash, nidi nááda'iiłniihii áádóó diné éí Bóhólníihii bit'ááh deeshááł danízingo bá hoodzoígíí t'ááká yitis wokááh lágo; ákódaadzaago Bóhólníihii nabidoołtsił.

²⁵Áko Mózes éí diné yich'į' hadanáádzáago yee yił hoolne'.