Read Navajo EXODUS 2 Bible Online

EXODUS 2 - Navajo bible

EXODUS 2

¹Diné léi' Líívai dine'é nilį́įgo éí t'áá Líívai dine'é bitsi' ła' be'asdzą́ą́ áyiilaa.

²Éí asdzání i'niiltsąądgo ashkii yishchį́, áko awéé' t'áá íiyisí bíiyisgo jiiłtsą́ągo bąą táá' nídeezidjį' nízdees'į́į́'.

³Doo nahozh'nił'in le' át'éégóó t'óó teełts'aa' bá dziztł'ǫ́ǫgo łeejin dijé'ígíí áádóó tsin bijeeh bee jizhjéé', áko teełts'aa' biyi' góne' awéé' ajííłtį́įgo tooh nílínígíí tábąąhgi teeł bitahgi táłkáa'gi teełts'aa' bił nizhní'ą́.

⁴Áko bádí éí awéé' haa dashdoonííł nízingo t'áá nízaadę́ę́' sizį́.

⁵Nít'éé' Féro bitsi' nidoobeeł yiniyé tooh nílínídi níyá, índa at'ééké bá nidaal'a'ígíí ałdó' tábąąhgóó yił yikah, nít'éé' teełts'aa' teeł bitahgóó dah naa'eełgo yiyiiłtsą́, áko at'ééké ła' ábizhdííniid, Haa'íshą' wóshdę́ę́' táłts'ání'aah.

⁶Áko ąą áyiilaago awéé' jiiłtsą́ áádóó awéé' hááchago baa a'ááh jiniizį́į'go ájíní, Díí Hííbrew dine'é be'awéé' ła' át'į́į́ lá.

⁷T'áá áko awéé' bádí éí Féro bitsi' áyidííniid, Níláhgóósh deesháałgo Hííbrew asdzání ła' hágo bidideeshniił, áko éí awéé' ná yaa áhályą́ą doo.

⁸Áko Féro bitsi' áhodííniid, Nílááhánee'. T'áá áko ch'ikę́ę́h dah diilwodgo awéé' bimá hágo yidííniid.

⁹Áko Féro bitsi' éí asdzání áyidííniid, Díí awéé' nááłtééł; shá baa áhólyą́ą doo, áko bik'é nich'į' ni'iishłée doo. Áko asdzání éí awéé' dah néidiiłtį́įgo yaa áhályą́ą́ nít'éé'.

¹⁰Áádóó awéé' i'díít'óodgo Féro bitsi' yaa néiníłtį́įgo biyáázh dzizlį́į́', áko, Mózes joolyée doo, hodííniid, háálá ání, Jó, táyi'dę́ę́' táłts'áníłtį́.

¹¹Áádóó nízaad nihoolzhiizhgo Mózes jineeyą́, áko łah hadine'é baazhníyáago naanish bee bide ádahólzingo baa ákozniizį́į́'; nít'éé' Ííjip dine'é éí hodine'é ła' Hííbrew nilį́įgo néiniłhałgo jiiłtsą́.

¹²Áko ałts'ą́ą́' jidéé'į́į'go doo naagháhígóó Ííjip dinéhígíí jiisxį́ áádóó séí bii' nízhdees'į́į́'.

¹³Áko biiskání ch'ínáádzídzáago Hííbrew dine'é nidilt'éego ałk'iilwod lá, áko bik'is doo ákwii ííł'ínígíí ábizhdííniid, Ha'át'éegoshą' t'áá bił ałk'is nídlínígíí náníłhał?

¹⁴Áko áhodííniid, Háishą' naat'áanii índa ánihwii'aahii nihá ániilaa? Ííjip dine'é ła' síníłhínígi át'éegoósh shí ałdó' shidiyííłhééł? Áko Mózes t'óó hoł hóóyéé' áádóó ájíní, T'áá ga' aaníí bił béédahoozin lá! dziniizį́į́'.

¹⁵Áádóó Féro yaa hodiizts'ą́ą'go Mózes hodiyeeshxééł niizį́į́'. Nidi Mózes éí Féro bits'ą́ą́' yóó'ajoolwodgo Mídiyan kéyahgi kééhojit'į́į́ nít'éé', áko tó hahadleeh léi'gi dzineezdá.

¹⁶Áko Mídiyan hoolyéédóó náá'iiłniihii léi' bitsi'ké tsosts'id yilt'éé lá, áko éí tó hadeidiyoo'ááł yiniyé yíkai, áko bizhé'é bilį́į́' da'doodlį́į́ł biniyé tsin bii' dibé nída'adlį́hígíí yii' tó hadeidééłbįįd.

¹⁷Nida'niłkaadii ła' yíkaigo nahgóó adah honeeskaad, nidi Mózes hach'ą́ą́h nídiidzáago háká aalwodgo biniit'aa dahadibé da'oodlą́ą́'.

¹⁸Ákohgo nákaigo bizhé'é Rúwel ábidííniid, Ha'át'éegoshą' díí jį́ t'áadoo hodíína'í nánoohkai?

¹⁹Áko ádadííniid, Ííjip dine'é léi' éí nida'niłkaadii nihá yich'ą́ą́h naagháago tó nihá hayiiz'ą́, áko dibé da'oodlą́ą́'.

²⁰T'áá áko bitsi'ké áyidííniid, Áko háadishą' naaghá? Ha'át'éegoshą' diné t'áá áadigo t'óó nánoojéé'? Adooyį́į́ł biniyé hágo bidohní.

²¹Áádóó Mózes éí ákwe'é diné bighangi há hasih hoo'a', áádóó éí dinéhígíí bitsi' ła', Zipórah wolyéii Mózes yeiníłtį́.

²²Áko ashkii há yishchį́, éí Gérsham wolyée doo, jidííniid, háálá ájíní, Dé'éyóní nishłį́įgo kéyah doo ééhonisindi naashá!

²³Áádóó náás hodeeshzhiizhgo Ííjip kéyahdi aláahgo naat'áanii daaztsą́, áádóó Ízrel dine'é naalte' danilį́įgo yik'ee nidadi'ni'go áádóó choo'į́į́łká daachago, áko bich'į' nidahwii'nánígíí yik'ee daachago Diyin God bidiizts'ą́ą́'.

²⁴Áko Diyin God éí nidazhdi'ni'go hodiizts'ą́ą́', áko Diyin God éí Éíbraham áádóó Áízak índa Jéíkab yił ahada'deest'áanii yénálniih.

²⁵Áko Diyin God éí Ízrel dine'é yik'i déez'į́į'go ádajít'éegi yaa ákoniizį́į́'.