Read Navajo EXODUS 23 Bible Online

EXODUS 23 - Navajo bible

EXODUS 23

¹T'áadoo t'áá áhoodzaagóó ch'íhoyí'aahí. T'áá ádzaagóó hane' ííł'íní doo dííleeł da biniyé doo yá'áshóonii nilíinii t'áadoo bił ałch'oní'níní.

²Doo yá'át'éehii doo baa nanináa da doo biniyé dahasłą́ą́góó t'áadoo nanináhí; doo ákǫ́ǫ́ ádaat'į́į́góó índa t'áadoo haa deit'éii łahgo át'éego ádeile'go yee ádaa nidahalne'go aghá'ánéelą́'ígíí t'áadoo bikéé' ninánílwo'í.

³Diné bahojoobá'ígo ádihodiilt'i'go doo bich'oha'níigo ádíílíił da.

⁴Ni'ana'í bibéégashii, doodaii' bitélii yóó'iigháahgo bidááh yíníyáago ts'ídá t'áá baa nídíídlósí.

⁵Índa nijoołáii bitélii biyéél yiyaa sitį́įgo yiniłtsą́ągo t'óó bíighah ch'óoya'ígi át'ée nidi ts'ídá t'áá bíká adíílwołí.

⁶Nihidiné badahojoobá'ígíí bide áhoot'éego baa hwiinít'íinii t'áadoo nanigizgo baa yáníłti'í.

⁷T'áá ádzaagóó áhooníiłii ts'ídá bits'ąą ádaa áhólyą́, áádóó t'áadoo bee bik'ídahót'ahíii índa t'áá ákogi ádaat'éii doo diyííłhéeł da, háálá doo yá'áshónígi ááníiłii éí doo t'áá ákogi át'éego bá hadeesdzih da.

⁸Bee nani'diiniihii doo nídidííléeł da, háálá éí dahóyáanii bíni' ádeiłdįįh, áádóó t'áá ákogi ádaat'éii bizaad łahgo ádeile'.

⁹Náá'áłdó' dé'éyóní doo bide áhwíínísin da doo, háálá Ííjip kéyahdi nihí ałdó' dé'éyóní danohłį́į́ nít'é'ígíí bąą dé'éyóní bijéí át'éegi nihił béédahózin.

¹⁰Hastą́ą́h nínáhahjį' k'éédídléeh doo, áádóó nídant'į́įhii áłah ánéinil'įįh doo.

¹¹Nidi tsosts'id nínáhah góne' doo ná'ígish da doo, áko nidine'é badahojoobá'ígíí ch'iyáán bee hólǫ́ǫ doo áádóó nihihiniidee'ígíí naaldlooshii bich'iyą' doo. T'áá ákót'éego nich'il na'atł'o'ii yíl'áii bineest'ą' índa áliv naazkaadii bineest'ą' doo áłah ánéinil'įįh da doo.

¹²Hastą́ą́h jį́ t'éí ninánílnish doo, nidi tsosts'id jį́į́ góne' éí hááhílyį́įh doo, índa nibéégashii áádóó nitélii ałdó' háádaalyį́įh doo, áko asdzání ná naalte' biyáázh áádóó dé'éyóní nilíinii bik'éé dahwiitáah doo.

¹³Áko bee nihich'į' haasdzí'ígíí t'áá ałtso baa dahonohsą́, áádóó diyin dabidi'níinii dabízhi' t'áadoo bee hahídziihí; doo nidi baa yáníłti' da doo.

¹⁴Táadi shich'į'go dahodíínóhsingo áłah náhdleehgo nínáhah doo.

¹⁵Díík'ǫsh t'áágééd bááh ályaii binahjį' dahodíínóhsingo áłah náhdleeh doo; díík'ǫsh t'áágééd bááh ályaii tsosts'id néíłkáahjį' daohsą́ą doogo nihich'į' haasdzíi' ni'; Éíbib yiziłígíí binih ła'a jį́ bee nihoot'áníjį' ánáhwiilzhíishgo ákódaaht'į́į doo, háálá éí biyi' Ííjip kéyahdę́ę́' ch'ínoohkai ni', áádóó ła'da nááhániihii doo t'áágéedgo shich'į' nizhdoogáał da.

¹⁶Nihidá'ák'ehgi k'ééda'dohdléehgo bindashoołnishígíí bits'ą́ą́dóó aneest'ą' áłtsé nídant'į́įhii binahjį' dahodíínóhsingo áłah náhdleeh doo. Ałtso náhshį́įhgo nihidá'ák'ehdóó nídaohishígíí áłah áńdaoł'įįhgo dahodíínóhsingo áłah náhdleeh doo.

¹⁷Nínáhahjį' táadi nidiné t'áá ałtso Bóhólníihii Diyin God yich'į' ninákah doo.

¹⁸Shich'į' nááhániihii bidił éí t'ááká díík'ǫsh bił bááh ályaii bił náádahołniih lágo; shich'į' nááhániihígíí bik'ah abíníjį' doo ła' t'áá sinil da doo.

¹⁹Nihikéyahdóó ts'ídá átsé aneest'ą' nídant'į́įhii Bóhólníihii nihiDiyin God bikin góne' yah adahohjáah doo. Tł'ízí yázhí bitsį' t'áadoo bimá bibe' bee daałbézhí.

²⁰Jó, diyingo naal'a'í nihilą́ąjį' deesh'aałgo éí wohnééłgóó nihaa áhályą́ą doo, áádóó índa kéyah nihá hasht'ehooshłaaí góne' yah anihidoo'ish.

²¹Binááł ádaa ádahołyą́, áádóó bizaad bik'eh dahonoł'į́įgo t'áadoo bá nídahołchįįhí, háálá bee haz'áanii nidahisooti'ígíí doo nihá yóó'anéididoo'áał da, háálá shízhi' yee át'é.

²²Nidi t'áá aaníí bizaad bik'eh dahonoł'į́įgo áádóó bee hahasdziihígíí t'áá ałtso bik'eh ádaahníiłgo nihida'ana'í bi'ana'í nishłį́į doo, índa nihik'ijį' danilíinii bik'ijį' nishłį́į doo.

²³Jó, shidiyingo naal'a'í nihilą́ąjį' yigáałgo Ámor dine'é áádóó Hét dine'é áádóó Píírez dine'é áádóó Kéínan dine'é áádóó Háíva dine'é índa Jííbas dine'é yich'į' nihidoo'ish, áko éí ádahodeeshdįįł.

²⁴Bidiyin dabidi'níinii t'ááká bich'į' yaa áńdaaht'įįh lágo, doodaii' doo bich'į' nidahohłáa da doo, doodaii' áyoolíiłii t'áadoo bééda'ohdle'í, nidi bi'eda'alyaii t'áá át'é bits'ą́ą́' naa'adahidoołtł'iłgo ahiih nídahidoohtih.

²⁵Bóhólníihii nihiDiyin God bich'į' nidahohłáa doo, áko nihich'iyą' índa nihito' łą́ągo yee nihik'ijidlíi doo, áádóó naałniih nihiníí'dóó nahgóó kódeeshłííł.

²⁶Nihikéyahgi doo ła' bitsą́ ha'a'eeł da doo, nidi nida'iiłchíih doo, índa as'ahgóó dahinohnáago nihá ádeeshłííł.

²⁷Nihidáahdi kéédahat'ínígíí shik'ee bił dayée'go ádeeshłííł, áádóó diné t'áá baa dahohnéhígíí t'áá ałtso ádeeshdįįł, áádóó nihida'ana'í t'áá ałtso nihits'ą́ąjį' yóó'adahinichéeh doo.

²⁸Áko tsésnáłtsoí nihilą́ąjį' bi'deeshnih; éí Háíva dine'é áádóó Kéínan dine'é índa Hét dine'é nihilą́ąjį' hadeidínóołkał.

²⁹T'ááłá'í nááhaijį' doo t'áá hooshch'į' nihilą́ąjį' hadínéeshkał da, áko kéyah doo t'áá bíni'dii dadooleeł da, áádóó naaldlooshii dahashkéii doo t'áá íiyisí nihide dooląął da.

³⁰T'áá bihidijáahgo nihilą́ąjį' hahidínéeshkał; lą'í soolį́į'go índa kéyah nihíí' dooleeł.

³¹Tónteel Łichíi'ii siyínídóó Filístiya dine'é bitónteel siyíníjį', índa honoojíídóó tooh nílíníjį' nihá hodeeso; jó, kéyah yii' kéédahat'íinii nihílák'ee dideesh'áałgo ch'ídadínóołkał.

³²Éí diné, doodaii' bidiyin dabidi'níinii t'ááká bił ahada'dooht'ááł lágo.

³³Éí nihikéyah doo yii' kéédahat'į́į da doo, háálá áadi t'áá kéédahat'į́įgo shich'į' ádił nida'iyohsíihgo ádanihidoolííł; bidiyin dabidi'níinii bich'į' nidahohłáago łoh yee nihidoolohgo bizahohkáah doo.