Read Navajo EXODUS 24 Bible Online

EXODUS 24 - Navajo bible

EXODUS 24

¹Áko Diyin God éí Mózes áyidííniid, Hágo, Bóhólníihii bich'į' hasohkááh, ni lá índa Éran áádóó Néídab índa Abáíhu, áádóó Ízrel dine'é yiląąjį' naazíinii tsosts'idiin yilt'éego, áko t'áá nízaadę́ę́' shich'į' nidahohłáa doo.

²Nidi Mózes t'éiyá áháníjį' Bóhólníihii yich'į' nidoogááł, nidi ła'ígíí éí t'ááká áháníjį' yich'į' nookááh lágo, índa Mózes éí diné doo ła' hoł hadookah da.

³Áko Mózes nádzáago Bóhólníihii bizaad t'áá ałtso áádóó nidahodiist'áanii t'áá ałtso yee diné yił hoolne', áko dinéhígíí t'áá ła' bizhi'ee ádadííniid, Bóhólníihii bizaad ánínígíí t'áá ałtso bik'eh ádadii'nííł.

⁴Áko Mózes éí Bóhólníihii bizaad t'áá át'é bee ak'e'jishchį́, áádóó t'ah abínígo nízhdii'na'go dziłtsį́įgi bikáá' náá'iiniihí ájiilaa, áádóó ákwii tsé naakits'áadahgo yadazhdíníishinígíí Ízrel dine'é naakits'áadahígíí bá ájiilaa.

⁵Áko Ízrel dine'é bitahdóó dinééh ła' ákǫ́ǫ́ ayiis'a'; éí didlidgo nááhániihii náádayiisnii', índa náádahaaznii'ii hózhǫ́ǫ́jí nááhániihii át'éego béégashii éí Bóhólníihii yich'į' náádayiisnii'.

⁶Áko Mózes éí dił ałníí'dóó néidiiką́ągo łeets'aa' bee nidziizką́, áádóó dił ałníí'dóó yidziihígíí bikáá' náá'iiniihí bik'ídzístah.

⁷Áko ałha'deet'ą́ naaltsoos biká'ígíí nízhdii'ą́ągo diné áłah nilínígíí bich'į' jííłta', áko diné t'áá ałtso deidiizts'ą́ą'go ádadííniid, Bóhólníihii hahaasdzí'ígíí t'áá ałtso bik'eh ádadii'nííł áádóó bik'eh dahoniil'į́į doo.

⁸Áko Mózes éí diłígíí nízhdiiką́ągo diné áłah nilínígíí bik'ídzístahgo ájíní, Jó, kót'éego dił bee aha'deet'ą́; éí Bóhólníihii t'áá bí nihił aha'deet'ą́ągo díí saad t'áá át'é yee yaa yáłti'.

⁹Áko Mózes índa Éran áádóó Néídab índa Abáíhu áádóó Ízrel dine'é yiląąjį' naazíinii tsosts'idiin yilt'éego ákóde eekai.

¹⁰Áadi Ízrel dine'é biDiyin God dayiiłtsą́, nít'éé' dées'eezgi tséghádi'nídínii sikaad nahalin; t'áá yá'ąąshii nahalingo niłtólí.

¹¹Áko Ízrel bidine'é aghádahideezíinii t'áadoo yeiníst'įįd da, áádóó Diyin God dayiiłtsą́ągo da'ííyą́ą́' áádóó doodlį́įłii dayoodlą́ą́'.

¹²Áko Bóhólníihii éí Mózes yich'į' haadzíi'go áyidííniid, Dziłghą́ą'jį' shich'į' hasínáahgo ákwii shiba' nanináa doo; ákwii tsé bik'e'ashchínígíí áádóó bee haz'áanii índa bik'eh ó'oo'níiłii t'áá shí bee ak'e'shéłchínígíí naa dadeesįįł, áko éí bee na'nítin doo biniyé.

¹³Áko Mózes índa há naal'a'í Jáshowa bił dashdii'áázh áádóó Mózes éí Diyin God bidził góde dashdiigháahgo

¹⁴aląąjį' naazíinii ábizhdííniid, Nihaa nániit'áazhjį' t'áá kwe'é nihiba' nahísóotą́; jó, Éran índa Her bił naahkai; t'áá háiida baaní hwee hólǫ́ǫgo t'éiyá baa jiisíníbaad doo.

¹⁵Áko Mózes éí dziłghą́ą́'góó ajííyáago k'os éí dził bik'i diilkǫ'.

¹⁶Áko Bóhólníihii bee bits'ádi'nílíidii Dził Sáínai bik'i hoole', áádóó éí k'osígíí t'áá bik'i dilkǫǫhgo hastą́ą́h jį́ azlį́į́', áko tsosts'id jį́ aleeh góne' k'os biyi'dę́ę́' Diyin God éí Mózes yich'į' haadzíí'.

¹⁷Áko Bóhólníihii bee bits'ádi'nílídígíí dził bílátahdi kǫ' naanídoonałgo Ízrel dine'é éí deiníł'į́.

¹⁸Áko Mózes éí k'os biih jííyáago dziłghą́ą'jį' hajiyá áádóó Mózes éí dziłghą́ą'di nijigháago dízdiin jį́ áádóó dízdiin tł'éé' azlį́į́'.