Read Navajo EXODUS 25 Bible Online

EXODUS 25 - Navajo bible

EXODUS 25

¹Áko Bóhólníihii éí Mózes áyidííniid,

²Ízrel dine'é bich'į' hadíídzihgo ábididííniił, Bóhólníihii kóní, Náádahidoołnihii shaa dahidoohjih; diné t'ááłá'í nítínígo bił hóódlee'ii shich'į' nááhidoonihígíí naa deidiyoojih.

³Díí náádahidoonihígíí naa deidiyooniłgo nídidíínił: éí óola áádóó béésh łigaii áádóó béésh łitsoii

⁴áádóó yisdizii yá nahalingo dootł'izhii áádóó tsídídééh nahalingo łichí'ígíí áádóó łichxí'ígíí áádóó áłts'óózígo yisdizígíí bee na'at'ą́hí łigaii dits'idgo ályaii áádóó tł'ízí bighaa'

⁵áádóó deenásts'aa' bikágí daaldzą́ągo deilchii'ii áádóó nahashch'id bikágí áádóó tsin nitł'izii akéíshiya wolyéii

⁶áádóó ak'ah bee hool'in dooígíí áádóó spáis éí ak'ah ak'i yahiidzíidgo bee yilzį́į'ii biniyéhígíí áádóó spáis éí tsinbijeeh dilidgo łikání halchinii biniyéhígíí

⁷áádóó tsé ániks wolyéii áádóó tsé da'ílíinii, áko íífad wolyéii índa ayidgi dah siłtsooz dooígíí bikáa'gi éí tsé da'ílíinii bee nidooch'ąhii; éí t'áá ałtso Bóhólníihii baa dahidoohjih.

⁸Áádóó bíni'dii diyingo haz'ą́ągo shá ádeidoolííł, áko hatahgi kééhasht'į́į doo.

⁹Níbaal bii' hodílzinii ályaii bik'ehgo áádóó bee hahodít'éii dooleełii ályaii bik'ehgo éí nich'į' ííshją́ą́ áshłééh, áko ts'ídá t'áá ákót'éego ádadoohłííł.

¹⁰Áko tsin nitł'izii bee tsits'aa' ádeidoolííł; éí táá' ké siláádóó náhást'éí asdzoh áníłnéez doo áádóó naaniigo naakidi ké siláádóó táá' asdzoh áníłtéel doo índa dego naakidi ké siláádóó táá' asdzoh ánízah doo.

¹¹Áko biyi'dę́ę́' índa bikáá'dę́ę́' óola t'áá bízhání bik'ésti'go ádíílííł, áádóó bibąąhgóó óola ahééní'áago ádadoohłííł.

¹²Tsits'aa' bitł'ááhdóó t'áá dį́į́'góó naanídaaz'áhígi ałch'ijí naakigo óola názbąsgo bídadidííłhį́.

¹³Tsin nitł'izii níyizgo ádadoohłííł áádóó óola bik'ídadoołtih.

¹⁴Áko tsits'aa' booshk'iizhjí díí óola názbąs bąąh dah sinilígíí bee naat'áa doo biniyé tsin níyizii bighá dadoohtsih.

¹⁵Tsin níyizígíí éí óola názbąs bąąh sinil dooígíí t'áá áłahjį' bighá ní'áa doo; éí doo bąąh náá'dii'nił da doo.

¹⁶Áádóó neeznáago bik'eh ó'oo'níiłii bee bééhániihii naadeesh'niłígíí tsits'aa' dílzinii biih dadoohnił.

¹⁷Índa aa a'ááh hasinii bił haz'ánígi éí óola t'áá bízhání bee ádadoohłííł; éí táadi ké siláádóó náhást'éí asdzoh áníłnéez doo, índa naaniigo naakidi ké siláádóó táá' asdzoh áníłtéel doo.

¹⁸Áko óola t'áá bízhání bee diyingo naal'a'í naakigo béé'ályaago chérabim wolyéii ádadoohłííł; hasht'e'nibída'doołniiłgo aa a'ááh hasinii bił haz'ání nineel'ánígi t'áá ałch'ishdę́ę́' sizį́įgo ádadoohłííł.

¹⁹Łahjí nineel'ánígi chérab wolyéii t'ááłá'í sizį́į doo, áádóó náánáłahjí nineel'ánígi chérab t'ááłá'í náánásdzį́į doo; aa a'ááh hasinii bił haz'ánígi índa nineel'ą́ągi ałch'ishdę́ę́' chérabim sizínígíí bił t'áá ła' bizhi'ee ádadoohłííł.

²⁰Aa a'ááh hasinii bił haz'ání bik'ijį' chérabim bit'a' dah yoołbał doo; aa a'ááh hasinii bił haz'áníjį' ałch'ishdę́ę́' déez'į́į'go ałch'į' sizį́į doo.

²¹Áko tsits'aa' dílzinii bikáa' gi aa a'ááh hasinii bił haz'ání dań'dítį́įhgo ádadoohłííł; neeznáago bik'eh ó'oo'níiłii bee bééhániihii naa deesh'niłígíí éí tsits'aa' dílzinii biih dadoohnił.

²²Ákwii nił ahínéisht'ash doo, áádóó chérabim naakigo tsits'aa' dílzinii yikáa'gi dah sizínígíí bita'gi aa a'ááh hasinii bił haz'ánídóó bik'eh ó'oo'níiłii t'áá ałtso Ízrel dine'é bá naa dideesh'áłígíí ałch'į' baa yéiilti' doo.

²³Bikáá' adání ałdó' tsin nitł'izii bee ádadooh łííł; táadi ké silá áníłnéez doo, áádóó naaniigo t'ááłá'í ké siláádóó ná'áłníi'go áníłtéel doo, índa dego naakidi ké siláádóó táá' asdzoh ánízah doo.

²⁴Óola t'áá bízhání bik'ídííłtihgo ła' bibąąhgóó ahééhiníkaadgo ádadoohłííł.

²⁵Dį́į́' yílá bik'eh áníłtéelgo bináz'áa doogo índa óola éí bibąąh ahééhiníkaadgo ádadoohłííł.

²⁶Dį́į́'góó naanídaaz'áhígíí biyaagi bijáád éí óola nídaazbąsgo bídadidoołhį.

²⁷Ahééní'áhígíí bíighahgi tsin níyizii ii' ní'áago bee naat'áa doo biniyé óola názbąsii bąąh dah naaznil doo.

²⁸Tsin níyizii ła' ádadoohłííł, áádóó óola bik'ídadoołtih; éí bikáá' adání bee naat'áa doo biniyé ádadoohłííł.

²⁹Łeets'aa' niteelígíí áádóó tsin bijeeh dilidgo łikání halchinii bá łeets'aa' áádóó ásaa' índa bee ya'iyiidzídígíí éí óola t'áá bízhání bee ádadoohłííł.

³⁰Índa bikáá' adání bikáa'gi Diyin God bich'į' bááh nááhániihii t'áá áłahjį' shinááł sinilgo ádeínóhsin doo.

³¹Bee hool'iní bá yadaa'áhígíí éí óola t'áá bízhání bee ádadoohłííł. Óola hasht'e'nibí'dííłniiłgo bá si'ánígíí índa dego bá yadaa'áhígíí áádóó bílátah dah na'azką́ągo ak'ah biih náhádzídígíí áádóó éí bitł'ááh ní'deeskǫ'ígíí índa ch'ilátah hózhóón bee naashch'ą'ígíí éí t'áá ła' bizhi'ee ádadoohłííł.

³²Hastą́ągo ats'ádaaz'áa doo, éí bee hool'iní bá yadaa'áhígíí łahjí táá' bits'ání'áa doo; náánáłahjí ałdó' táá' bits'ání'áa doo;

³³t'ááłá'ígo ats'áz'áhígíí álman wolyéii bílátah yiigahígíí nahalingo táa'go ałkéé' honíką́ągo bee naashch'ąą' doo; bílátah haleehii áádóó yiigahígíí t'áá bił, bee hool'iní bá yaa'áhígíí hastą́ągo bits'ádaaz'áhígíí ákót'éego ádadoohłííł.

³⁴Bee hool'iní bá yadaa'áhígíí dį́į'go ałk'i honíką́ągo álman wolyéego ch'ilátah hózhóón nahalingo bee naashch'ąą' doo.

³⁵Naakigo ałts'ą́ąjį' dadeez'áhígíí t'áá táa'go bitł'áahgi ní'da'deezwodgo bił t'áá ła' bizhi'ee ádadoohłííł.

³⁶Ats'á daaz'áhígíí áádóó ałkéé' honíkánígíí éí bá yaa'áhígíí bił t'áá ła' bizhi'ee ádadoohłííł; bee hool'inígíí t'áá át'é óola t'áá bízhání hasht'e'nibída'doołniiłgo t'áá ła' bizhi'ee ádadoohłííł.

³⁷Áko bá bee dahool'inígíí tsosts'idgo ádadoohłííł, índa bikáá' yí'nilgo bidáahjį' haz'ánígi bee hool'in doo biniyé ádadoohłííł.

³⁸Kǫ' bee náhiniltsésígíí áádóó łeeshch'iih bee naakáhígíí óola t'áá bízhání bee ádadoohłííł.

³⁹Bee hool'iní bá yadaa'áhígíí índa beedí chodao'íinii t'áá ałtso éí óola t'áá bízhání t'ááłá'í tálent dah hidiidloh bíighahgo ádadoohłííł.

⁴⁰Áko díí t'áá ałtso ályaii bik'ehgo dziłghą́ą'di nich'į' ííshjání áshłaaígíí ts'ídá t'áá éí bik'ehgo baa honíyą́ągo ádadoohłííł.