Read Navajo EXODUS 26 Bible Online

EXODUS 26 - Navajo bible

EXODUS 26

¹Náá'áłdó' níbaal bii' hodílzinii bitis hííkaad dooígíí neeznáago ádadoohłííł; yisdizii yá nahalingo dootł'izhígíí áádóó tsídídééh nahalingo łichí'ígíí índa łichxí'ígíí éí áłts'óózígo yisdizígíí bee na'at'ą́hí łigaii dits'idgo ályaii biyi'jį' yistł'ǫ́ǫgo, diyingo nidaal'a'í chérabim wolyéii bee nidaashch'ąą'go daohchįįhgo ádadoohłííł.

²Éí t'ááłá'í níłtsoozígo dízdiindóó ba'aan naaki ké silá ádaníłnéez doo, áádóó t'ááłá'í níłtsoozígo hastą́ą́h ké silá ádaníłtéel doo; t'áá ałtso t'áá aheedaníłtso doo.

³Áko éí ashdla'go ahídahididoolchah, áádóó náá'ashdla'go t'áá ákónáánát'éego ahínáádahididoolchah.

⁴Áádóó áłtsé ahídahididoolchahígíí bibąąhgi na'at'ą́hí yá nahalingo dootł'izhígíí łoh ashdladiingo bąąh yí'nil dooígíí ádadoohłííł; naaki góne' ahídahididoolchahígíí t'áá ákónáánát'éego łoh ashdladiingo bąąh nááná'nil dooígíí ádadoohłííł.

⁵Ła' bibąąhgi łohígíí ashdladiingo bąąh yí'nil dooígíí ádadoohłííł, áádóó naaki góne' ahídahididoolchahígíí ła' bibąąhgi łohígíí ashdladiingo bąąh nááná'nil dooígíí ánáádadoohdlííł; łoh bąąh yí'nil dooígíí éí ałnaashii yí'nil doo.

⁶Áko óola ił dah nídaatį́įh dooígíí ashdladiingo ádadoohłííł, áko bitis hííkaad dooígíí ahihidiiłtsoozgi łoh bąąh yí'nilígíí óola ił dah nátį́hí yee da'ahótą'go ádadoohłííł; ákohgo níbaal bii' hodílzinii t'áá ła' bizhi'ee si'ą́ą dooleeł.

⁷Áádóó níbaal bii' hodílzinii bitis hííkaad dooígíí tł'ízí bighaa' bee yistł'ǫ́ǫgo ła'ts'áadahgo ádadoohłííł.

⁸Díí bitis hííkaad dooígíí t'ááłá'í níłtsoozígo dízdiindóó ba'aan ashdla' ké silá ádaníłnéez doo, áádóó t'ááłá'í níłtsoozígo hastą́ą́h ké silá ádaníłtéel doo; ła'ts'áadahgo bitis hííkaad dooígíí t'áá ahee daníłtso doo.

⁹Bitis hííkaad dooígíí ashdla'go t'áá sahdii ahídahidoołchah, áádóó hastą́ą́h bitis hííkaad dooígíí ałdó' t'áá sahdii ahínáádahidoołchah, índa hastą́ą́h góne'ígíí éí níbaal bii' hodílzinii bich'é'étiingi t'ą́ąjį' ahą́ą́h nániilyéehgo ádadooh łííł.

¹⁰Áádóó áłtsé ahídahidiilcha'ígíí bibąąhgi łoh ashdladiingo bąąh yí'nil dooígíí ádadoohłííł, índa naaki góne' ahídahidiilcha'ígíí t'áá ákónáánát'éego łoh ashdladiingo bąąh nááná'nil dooígíí ádadoohłííł.

¹¹Ahidahidiiłtsooz doo biniyéhígíí béésh łitsoii ił dah nídaatį́hí ashdladiingo ádadoohłííł, áko łoh bighá nídaatsihgo yee da'ahótą'go níbaal t'áá ła' bizhi'ee si'ą́ą dooleeł.

¹²Áádóó níbaal bii' hodílzinii bitis hííkaadii ch'íhííłtsooz dooígíí éí níbaal bikéédę́ę'go ła' t'áá ałní'ídóó ch'íhííłtsooz doo.

¹³Áádóó níbaal bii' hodílzinii bik'ínáltih doo biniyé bitis hííkaadii t'áá ałch'ijí booshk'iizhjį' ch'íhííłtsooz dooígíí éí t'ááłá'í ké siláádóó ná'áłníi'go áníłtéél ch'íhííłtsooz doo.

¹⁴Náá'áłdó' deenásts'aa' bikágí daaldzą́ągo deilchii'go índa nahashch'id bikágí daaldzą́ągo níbaal bik'ídooltih biniyé ánáádadoohdlííł.

¹⁵Tsin nitł'izii bee tsin neheeshjíí' ályaii níbaal bii' hodílzinii bá neelkáal dooígíí ádadoohłííł.

¹⁶Tsin neheeshjíí' t'ááłá'í nítánígo ashdla'áadah ké silá ádaníłnéez doo; t'ááłá'í nítánígo naaki ké siláádóó táá' asdzoh ádaníłtéel doo.

¹⁷Tsin neheeshjíí' neelkáalii t'ááłá'ígo biyaadóó naaznilígíí naaki bąąh ha'íí'áago ádadoohłííł; kót'éego níbaal bii' hodílzinii bá tsin neheeshjíí' t'áá ałtso ádadoohłííł.

¹⁸Níbaal bii' hodílzinii bá tsin neheeshjíí' éí shádi'ááhjí naadiingo noolkáal dooígíí ádadoohłííł.

¹⁹Áádóó dízdiingo béésh łigaii t'ááłáhíjí biih dahasdzánígíí tsin neheeshjíí' naadiingo bitł'ááh sinil doo biniyé ádadoohłííł; tsin neheeshjíí' t'ááłá'í nítánígo bitł'ááh sinil dooígíí naakigo ádadoohłííł.

²⁰Áádóó níbaal bii' hodílzinii bá tsin neheeshjíí' náhookǫsjí noolkáál dooígíí naadiingo ánáádadoohdlííł,

²¹índa dízdiingo béésh łigaii t'ááłáhíjí biih dahasdzánígíí tsin neheeshjíí' bitł'ááh sinil doo biniyé ałdó' ánáádadoohdlííł; tsin neheeshjíí' t'ááłá'í nítánígo bitł'ááh sinil dooígíí naakigo ánáádadoohdlííł.

²²Áádóó níbaal bii' hodílzinii bá e'e'aahjí tsin neheeshjíí' éí hastą́ągo ánáádadoohdlííł.

²³Índa níbaal bii' hodílzinii bikéé'jí naanáz'áhígi éí t'áá ałch'ijí bá tsin neheeshjíí' yaa'áa doo biniyé ádadoohłííł.

²⁴Áko bitł'áahdi t'éiyá t'óó ahiní'áa doo, nidi dego yaa'áhíjį' béésh názbąsii bąąh si'ą́ągo ałch'į' yótą'go t'áá ałch'ijí bee nástł'ahgi ákót'éego ádadoohłííł.

²⁵Ákohgo tsin neheeshjíí' tseebíigo áádóó bitł'ááh sinil dooígíí béésh łigaii t'ááłáhíjí biih dahasdzánígíí hastą́'áadahgo ádadoohłííł; tsin neheeshjíí' t'ááłá'í nítánígo naaki bitł'ááh naaznil doo.

²⁶Áádóó tsin nitł'izii bee tsin daníyizii ashdla'go níbaal bii' hodílzinii booshk'iizhjí naaniigo tsin neheeshjíí' bąąh daní'áa doo biniyéhígíí ádadoohłííł,

²⁷áádóó náánáłahjí booshk'iizhjí ałdó' ashdla'go naaniigo bąąh daní'áa doo biniyé índa náá'ashdla'go éí níbaal bii' hodílzinii e'e'aahjígo ałdó' naaniigo bąąh daní'áa doo biniyé ádadoohłííł.

²⁸Ałníí'góó tsin níyizii ní'áa dooígíí éí t'áá níléijį' ha'naa hadii'áa doo.

²⁹Tsin neheeshjíí' éí óola bik'ídaasti'go ádadoohłííł, áádóó óola názbąsgo bąąh yí'nilgo tsin níyizii naaniigo bąąh daní'áa dooígíí bii' nídaditsih dooígíí ałdó' ádadoohłííł, índa tsin níyizgo ii' nídaditsih dooígíí ałdó' óola bik'ídaasti'go ádadoohłííł.

³⁰Áko níbaal bii' hodílzinii binahosé'ą́ągo dziłghą́ą'di nił ííshjání áshłaaígíí bik'ehgo nidadooh'ááł.

³¹Áádóó ata'naníbaal dooígíí ádoolnííł; éí yisdizii yá nahalingo dootł'izhígíí áádóó tsídídééh nahalingo łichí'ígíí índa łichxí'ígíí éí áłts'óózígo yisdizígíí bee na'at'ą́hí łigaii dits'idgo ályaii biyi'jį' yistł'ǫ́ǫgo, diyingo nidaal'a'í chérabim wolyéii bee nidaashch'ąą'go dayiichįįhgo ádeidoolííł.

³²Áko ata'naníbaal dooígíí bá tsin nitł'izii dį́į'go ííyah danii'áa dooígíí óola bik'ídaasti'go ádadoohłííł, áádóó óola bąąh hadaazhahgo ádadoohłííł, índa dį́į'go bitł'ááh sinil dooígíí béésh łigaii t'ááłáhíjí biih dahasdzánígíí bee ádadoohłííł, áko ata'naníbaal dooígíí dadidoołbał.

³³Ił dah nídaatį́hí bąąh yí'nilígíí bee dadidoołbał, índa tsits'aa' dílzinii éí neeznáago bik'eh ó'oo'níiłii bee bééhániihii bii' sinilii éí ata'naníbaalígíí bine'jí náwóne'édi yah adadooh'ááł, áko ata'naníbaal dooígíí éí hodiyingo haz'ánídóó ts'ídá aláahgo hodiyingo haz' ánígíí bits'ąą nanihinil doo biniyé bita'ndadoołbałgo t'áá ał'ąą haz'ą́ą doo.

³⁴Aa a'ááh hasinii bił haz'áanii éí tsits'aa' dílzinii bidań'dítį́įhgo ádadoohłíiłgo ts'ídá aláahgo hodiyingo haz'ání góne' nidadooh'ááł.

³⁵Ata'naníbaalídóó tł'óó' bich'ijígo bikáá' adání nidadooh'ááł, índa bee hool'iní éí níbaal bii' hodílzinii bii' bikáá' adání si'ánígíí binaashiijí shádi'ááhjígo nidadooh'ááł; bikáá' adání éí náhookǫsjí si'ą́ą doo.

³⁶Níbaal bii' hodílzinii bich'é'étiingi dáádiníbaal dooígíí yisdizii yá nahalingo dootł'izhígíí áádóó tsídídééh nahalingo łichí'ígíí índa łichxí'ígíí éí áłts'óózígo yisdizígíí bee na'at'ą́hí łigaii dits'idgo ályaii biyi'jį' yistł'ǫ́ǫgo naashch'ąą'go bee ádadoohłííł.

³⁷Dáádiníbaal bá tsin nitł'izii ashdla'go ííyah danii'áa dooígíí bąąh hada'azhahgo ádadoohłíiłgo óola bik'ídadoołtih; éí bąąh hada'azhah dooígíí ałdó' óola bee ádadoohłííł, áádóó ashdla'go bitł'ááh sinil dooígíí béésh łitsoii t'ááłáhíjí biih dahasdzánígíí ádadoohłííł.