Read Navajo EXODUS 27 Bible Online

EXODUS 27 - Navajo bible

EXODUS 27

¹Bikáá' náá'iiniih dooígíí tsin nitł'izii bee ádadoohłííł; tsosts'id ké siláádóó ná'áłníi'go áníłnéez doo, áádóó naaniigo tsosts'id ké siláádóó ná'áłníi'go áníłtéel doo; dik'ą́ągo ádadoohłííł, índa dego éí dį́į́' ké siláádóó ná'áłníi'go ánízah doo.

²Dį́į'go naanáz'áhídóó bidee' hadaaz'áa dooígíí t'áá ła' bizhi'ee bidee' t'áá bił ádadoohłííł, índa béésh łitsoii bik'ídadoołtih.

³Ásaa' éí łeeshch'iih bii' yadahiikaah dooígíí, áádóó łeeshch'iih bee hadahakaahí, áádóó ásaa' dantsaaígíí, áádóó bíla'táa'ii danineezígíí índa tsííd bee naakáhí ádadoohłííł; bił chodao'íinii t'áá ałtso béésh łitsoii bee ádadoohłííł.

⁴Bikáá' náá'iiniihí bá béésh łitsoii ałnáshizhoozhgo tsííd dah yookáłí ádadoohłííł, áádóó éí dį́į'go naanídaaz'áhídóó béésh łitsoii názbąsgo bąąh dah naaznil dooígíí ádadoohłííł.

⁵Bikáá' náá'iiniihí bidáa'gi ahééní'áhídóó yaago ałníi'gi béésh łitsoii ałnáshizhoozhgo tsííd dah yookáłí dah si'ą́ągo ádadoohłííł.

⁶Áádóó bikáá' náá'iiniihí bee na'at'áhígíí tsin nitł'izii níyizgo béésh łitsoii bik'ésti'go ádadoohłííł.

⁷Tsin níyizii éí béésh łitsoii názbąsgo ádaalyaaígíí bii' ní'áago ályaa doo, áko bikáá' náá'iiniihí booshk'iizh t'áá ałch'ishjí tsin níyizii bąąh ní'áago éí bee naat'áa dooleeł.

⁸Dziłghą́ą'di nił ííshją́ą́ áshłaaígíí bik'ehgo tsin neheeshjíí' nitł'izígíí bee bikáá' náá'iiniihí dik'ą́ągo t'áá bighá hool'áago ádadoohłííł.

⁹Níbaal bii' hodílzinii binaagóó haz'ą́ągo ádaalyaa doo; shádi'ááhjígo t'ááłáhídi neeznádiindóó ba'aan ashdladiin ké silá ánízahgo, áádóó áłts'óózígo yisdizígíí bee na'at'ą́hí łigaii dits'idgo ályaii nídadilbałígíí bee ádaalyaa doo.

¹⁰Bá adaaz'áa dooígíí éí naadiingo áádóó bitł'ááh naaznilgo t'ááłáhíjí biih dahasdzą́ą dooígíí éí naadiingo béésh łitsoii bee ádaalyaa doo, bá adaaz'áago bąąh hada'azhah dooígíí índa bita'ndaaz'áa dooígíí éí béésh łigaii bee ádaalyaa doo.

¹¹T'áá ákónáánát'éego náhookǫsjí ałdó' t'ááłáhídi neeznádiindóó ba'aan ashdladiin ké silá ánízahgo aníbaal doo; bá adaaz'áa dooígíí éí naadiin doo; bitł'ááh naaznil dooígíí ałdó' naadiingo béésh łitsoii t'ááłáhíjí biih dahasdzą́ągo ádaalyaa doo, nidi bá adaaz'áii bąąh hada'azhah dooígíí índa bita'ndaaz'áa dooígíí éí béésh łigaii bee ádaalyaa doo.

¹²Níbaal bii' hodílzinii binaagóó haz'ánígíí e'e'aahjígo tsosts'idiindóó ba'aan ashdla' ké silá ánízahgo aníbaal doo, índa bá adaaz'áhígíí éí neeznáa doo; bitł'ááh naaznil dooígíí t'ááłáhíjí biih dahasdzánígíí ałdó' neeznáa doo.

¹³Níbaal bii' hodílzinii binaagóó haz'ánígíí ha'a'aahjígo tsosts'idiindóó ba'aan ashdla' ké silá áhoníłtéel doo.

¹⁴Ch'é'étiingi łahjí naadiin naakidóó ná'áłníi'go ké silá ánízahjį' aníbaal doo; bá ííyah danii'áii éí táá' índa bitł'ááh naaznil dooígíí t'ááłáhíjí biih dahasdzánígíí ałdó' táa' doo.

¹⁵Łahjígo naadiin naakidóó ná'áłníi'go ké silá ánízahjį' aníbaal doo; bá ííyah danii'áii ałdó' táá' índa bitł'ááh naaznil dooígíí t'ááłáhíjí biih dahasdzánígíí ałdó' táa' doo.

¹⁶Níbaal bii' hodílzinii binaagóó haz'ánígíí bich'é'étiingi dáádiníbaal dooígíí éí tádiin ké silá áníłnéez doo; yisdizii yá nahalingo dootł'izhígíí áádóó tsídídééh nahalingo łichí'ígíí índa łichxí'ígíí éí áłts'óózígo yisdizígíí bee na'at'ą́hí łigaii dits'idgo ályaii biyi'jį' yistł'ǫ́ǫgo naashch'ąą'go ályaa doo; bá adaaz'áa dooígíí dį́į́' índa bitł'ááh naaznil dooígíí t'ááłáhíjí biih dahasdzánígíí ałdó' dį́į' doo.

¹⁷Níbaal bii' hodílzinii binaagóó haz'ánígíí bá adaaz'áhígíí bita'nda'az'áa dooígíí béésh łigaii bee ádaalyaa doo; bąąh hada'azhah dooígíí béésh łigaii bee ádaalyaa doo, índa bitł'ááh naaznil dooígíí t'ááłáhíjí biih dahasdzánígíí éí béésh łitsoii bee ádaalyaa doo.

¹⁸Níbaal bii' hodílzinii binaagóó haz'ánígíí t'ááłáhídi neeznádiindóó ba'aan ashdladiin ké silá áníłnéez doo; naaniigo éí tsosts'idiindóó ba'aan ashdla' ké silá áníłtéel doo, índa dego éí tsosts'id ké siláádóó ná'áłníi'go ánízahgo ahééníbaal dooígíí éí áłts'óózígo yisdizígíí bee na'at'ą́hí łigaii dits'idgo ályaii bee ádaalyaa doo, áádóó bá adaaz'áhígíí bitł'ááh naaznil dooígíí t'ááłáhíjí biih dahasdzánígíí béésh łitsoii bee ádaalyaa doo.

¹⁹Níbaal bii' hodílzinii t'áá ałtsojį' bił chodao'íinii áádóó níbaal bii' hodílzinii áádóó binaagóó haz'ánígi bá anídaalkał dooígíí éí t'áá ałtso béésh łitsoii bee ádaalyaa doo.

²⁰Ízrel dine'é bich'į' hadíídzihgo éí tsin áliv bineest'ą' ník'íbí'níltłishgo bik'ah t'áá bízhání bee hool'in doo biniyé naa deidiyookááł; éí bee hool'in doo biniyé t'áá áłahjį' dook'ą́ął doo.

²¹Níbaal bii' dahozdísinii bii' neeznáago bik'eh ó'oo'níiłii bee bééhániihii bidááhjí ata'naníbaalídóó tł'óó' bich'į'go haz'ánígi Bóhólníihii binááł Éran áádóó biye'ké e'e'ááhdóó abíníjį' bee adinídíinii ninádei'nił doo. Díí hool'áágóó yee nihoní'áanii Ízrel dine'é náás da'ahideeshchį́į́góó yaa dahóyą́ągo yaa ádahalyą́ą doo.