Read Navajo EXODUS 29 Bible Online

EXODUS 29 - Navajo bible

EXODUS 29

¹Daho'didoolzįh biniyé kót'éego ádahodoohłííł, áko nááda'iiłniihii dajílį́įgo shá nidajil'a' doo. Dóola yázhí hadaałt'éii índa deenásts'aa' naakigo hadaałt'éii,

²índa díík'ǫsh t'áágééd bááh ályaii áádóó díík'ǫsh t'áágééd łees'áán ak'ah bił ályaii, índa bááh dá'áka'í nahalinígíí ak'ah bee yistłahgo ályaii shóidííłt'eeł. Tł'oh naadą́ą́' ak'áán bee ádadííliił.

³Éí ts'aa' t'ááłá'í biih dííniłgo bee dííkááł, índa dóola yázhí áádóó deenást'aa' naakigo díí'ish.

⁴Níbaal bii' dahozdísinii bich'é'étiinjį' Éran áádóó biye'ké nidíí'ishgo tó bee táádahodíígis.

⁵Éé' nídidííniłgo éé' nineezígíí áádóó éé' agod ta'jį' nineel'ánígíí áádóó íífad wolyéii índa íífad bikáa'gi ayidgi dah siłtsooz dooígíí Éran bee hadidíílííł, áádóó sis íífad bąąh nít'i'go baa nahodeesgį'go yistł'ónígíí bee áká hodíílzis,

⁶áádóó ch'ah dijoolí bee ál'ínígíí hatsiinídííłt'ih, índa átáa'gi dah sitą́ą dooígíí hátáa'gi dah díítį́į́ł.

⁷Áko ak'ah ak'i yahiidzídígíí nídidííkááł, índa hatsii'káa'gi yeidííziłgo bee ho'doolzį́į' doo.

⁸Áko índída haye'ké ałdó' nídidíí'ishgo íífad biyaadi éé' nineezígíí bee hadahodidííliił;

⁹sis bee áká dahodíílzis índa ch'ah dijoolí dahach'ahgo ádahodííliił; náá'iiłniihii binaanishgo ahóyéel'áágóó yee nihoní'áanii át'ée doo. Éran áádóó biye'ké diyingo bits'ąą hasti'ii dajílį́įgo áhodíílííł.

¹⁰Áko níbaal bii' dahozdísinii bich'éédą́ą'gi dóola yázhí díílóosgo Éran áádóó biye'ké éí dóola yázhí bitsii'káa'gi dah dahizhdilníih doo,

¹¹índa níbaal bii' dahozdísinii bich'éédą́ą'gi Bóhólníihii binááł diyííłhééł,

¹²áádóó dóola yázhí bidił łahjį' nídidííkáałgo níla' bee bikáá' náá'iiniihí bidee' hadaaz'áhígíí dadíídlish, índa yidziihígíí bikáá' náá'iiniihí bitsį́įjį' yeidííził.

¹³Bitsą́ siláii bąąh ak'ahígíí áádóó azid bíighahgi ak'ahígíí índa atsą́ áshk'azhí bąąh ak'ahígíí t'áá bił nídidííniłgo bikáá' náá'iiniihí bikáa'gi didííłił.

¹⁴Nidi dóola yázhí bitsį' áádóó bikágí índa bichaan éí níbaal haal'áhídóó bits'áhwiiní'ą́ądi didííłił; ádił ni'iidzííhjí nááhániihii át'é.

¹⁵Ákohgo deenásts'aa' ła' nínáádidíídlóosgo Éran áádóó biye'ké éí deenásts'aa' bitsii'káa'gi dah dahizhdilníih doo.

¹⁶Áádóó deenásts'aa' diyííłhéełgo bidił nídidííkáałgo bikáá' náá'iiniihí t'áá ałtsodę́ę́' bik'ídííłtah.

¹⁷Áko éí deenásts'aa' nihidííłgishgo bitsą́ siláii índa bijáád ałdó' táádadíígis, áádóó nihíníłgizhígíí índa bitsii' t'áá bił t'ááłáhígi nidííniłgo

¹⁸bikáá' náá'iiniihí bikáa'gi deenásts'aa' t'áá át' é didííłił; éí Bóhólníihii bich'į' didlidgo nááhániihii át'é; Bóhólníihii bich'į' didlidgo nááhániihii łikání halchinii át'é.

¹⁹Áko deenásts'aa' ła'ígíí nínáádidíídlóosgo Éran áádóó biye'ké éí deenásts'aa' bitsii'káa'gi dah náádahididoolnih,

²⁰áádóó deenásts'aa' náádiyííłhééł, áko bidił łahjį' nídidííkáałgo Éran bijaa' nish'náájíígíí bílátahgi bee díídlish, índa biye'ké dabijaa' nish'náájíígíí bílátahgi ałdó' bee dadíídlish, áádóó Éran índa biye'ké dabílátsoh nish'náájíígíí dadíídlish, áádóó dabikétsoh nish'náájíígíí ałdó' dadíídlish, índa yidziihígíí bikáá' náá'iiniihí t'áá ałtsodę́ę́' bik'ídííłtah.

²¹Dił éí bikáá' náá'iiniihí bik'ísíníłtahii t'áá bíí'ohígíí áádóó ak'ah ak'i yahiidzíidgo bee alzį́hígíí ła' nídidííkáałgo Éran áádóó bi'éé' bik'ídííłtah, índa haye'ké áádóó dabi'éé' ałdó' bik'ídadííłtah, áko hó índa ha'éé' dadiyin doo; haye'ké áádóó dabi'éé' ałdó' dadiyin doo.

²²Éí deenásts'aa' bik'ah áádóó bitsee' neesk'ahígíí áádóó bitsą́ siláii bąąh ak'ahígíí áádóó azid bíighahgi ak'ahígíí, áádóó atsą́ áshk'azhí bąąh ak'ahígíí índa ajáád nish'náájíígíí bił nídidíínił, háálá diyingo bits'ąą hasti'go deenásts'aa' há nááhániihii át'é.

²³Náá'áłdó' bááh áádóó ak'ah bił bááh ályaii índa díík'ǫsh t'áágééd bááh ályaii Bóhólníihii binááł ts'aa' bee siką́ągo t'áá daałá'ígo nídidíínił,

²⁴áko éí t'áá ałtso Éran áádóó biye'ké bílák'ee dííniłgo náásee bił nídi'dilnihgo nááhániihii át'éego Bóhólníihii binááł náásee bił nídabidiyíłnih doo.

²⁵Áko índa dabilák'eedóó nídidííniłgo bikáá' náá'iiniihí bikáa'jį' Bóhólníihii bich'į' łikání halchinii át'éego didlidgo nááhidííłnih; éí Bóhólníihii bich'į' didlidgo nááhániihii át'é.

²⁶Deenásts'aa' bijéíts'iin bee Éran diyingo bibits'ąą hasti'go há náásee bił nídi'dilnihgo nááhániihii Bóhólníihii binááł ajéíts'iin náásee bił didíílnih; ajéíts'iinígíí éí ni doo.

²⁷Ajéíts'iin náásee bił nídi'dilnihgo áádóó ajáád bił dah nídi'diilnihgo nááhániihii dílzingo ádíílííł; deenásts'aa' bee diyingo hats'ąą haasti'go éí Éran áádóó biye'ké bá át'é.

²⁸Éran áádóó biye'ké éí Ízrel dine'é náádayiiłniihii hóó' neheleehgo yee nihoní'ą́ągo ahool'áa doo; jó, bił dah nídi'diilnihgo nááhániihii át'é; Ízrel dine'é bihózhǫ́ǫ́jí nááhániihii bits'ą́ą́dóó Bóhólníihii bich'į'go bił dah nídi'diilnihgo náádayiiłniihii át'é.

²⁹Éran bikéé' áhásdįįdgo bi'éé' dadílzinii biye'ké baa daalzįįhgo yąąh noonéeł doo; t'áá bí bi'éé' yileehígíí yii' sitį́įgo ak'ah bee bi'dilzįh áádóó diyingo bits'ąą hasti'ii ábi'diil'įįh.

³⁰Haye' hatsásk'ehgi náá'iiłniihii dooleełígíí éí éé' bee hazhdít'éego tsosts'id yidoołkáałgo níbaal bii' dahozdísinii hodiyingo haz'ání góne' nijil'a' doo biniyé yah aníjídáah doo.

³¹Diyingo hats'ąą hasti'go há deenásts'aa' bitsį' nááhaaznii'ii hodiyingo haz'ą́ągi náníłbish doo,

³²áko Éran áádóó biye'ké éí deenásts'aa' bitsį' índa ts'aa' bee bááh sikánígíí nídeidį́įh doo; níbaal bii' dahozdísinii bich'é'étiingi ákódaat'į́į doo.

³³Éí nídeidį́įhgo bee á k'énáhoodǫǫłii anídayiil'įįhgo diyingo bits'ąą hasti'ii índa dadiyingo ádayósin doo. Diné t'áá azlį́'ígíí éí doo yidooyį́įł da, háálá dólzinii át'é.

³⁴Ats'áhwííníłtínígíí há nááhaaznii'ii atsį' áádóó bááh ła' abínígo ch'ínííłna'go didííłił; éí doo doodį́įł da, háálá nááhániihii dólzinii át'é.

³⁵Áádóó Éran índa biye'ké bá bee ádííniidígíí t'áá át'é bik'ehgo ádíílííł; tsosts'id jį́ diyingo hats'ąą hasti' doo.

³⁶T'áá ákwíí jį́ ádił ni'iidzííhjí nááhániihii dóola yázhí nááhíłniih doo áádóó bikáá' náá'iiniihí doo bąąh chinígóó áníléehgo bikáa'gi bee k'ééhoodǫǫłii nááhíłniih doo índa bikáa'jį' ak'ah yeidííziłgo dólzingo ádíílííł.

³⁷Tsosts'id jį́ bee k'ééhoodǫǫłii ánéinil'įįhgo bikáá' náá'iiniihí bá náhíłniihgo dólzingo ádíílííł; bikáá' náá'iiniihí aláahgo dólzinii át'ée doo; ha'át'íhígíida bíhidéé'náa'go dólzin doo.

³⁸Bikáá' náá'iiniihí bikáa'gi nááhíłniih dooígíí éí díí: dibé yázhí ła' binááhaii naakigo t'áá ákwíí jį́ nááhíłniihgo hoolzhish doo.

³⁹Dibé yázhí ła' abínígo nááhíłniih doo; éí e'e'áahgo ła'ígíí nááhíłniih doo;

⁴⁰áłtséhé góne' dibé yázhí nááhíłniihgo ómer bee í'neel'ąąhí bee ak'áán t'ááłáhídi haaką́ągo éí kwáart bee í'neel'ąąhí bee áliv sikaadii bineest'ą' ník'íbí'neeshtłishii bik'ah haaką́ągo bił ałtahgo nááhíłniih doo, índa yanáadzi'go nááhániihii biniyé kwáart bee í'neel'ąąhí bee wáin hadookááł.

⁴¹Dibé yázhí ła'ígíí éí e'e'áahgo nááhíłniih doo; abínígo nááhíłniihígi át'éego ak'áán nááhidoonihii índa yanáadzi'go nááhidoonihii bił nááhíłniih doo; Bóhólníihii bich'į' łikání halchingo didlidgo nááhániihii át'é.

⁴²Díí t'áá ákwíí jį́ didlidgo nááhániihii éí náás da'ahíínółchííhgóó níbaal bii' dahozdísinii bich'éédą́ą'gi Bóhólníihii binááł náádahoołniih doo; áadi nich'į' hanásdzih doo biniyé nił ahínéisht'ash doo.

⁴³Áadi Ízrel dine'é bił áłah náshdleehgo ayóó ánísht'éego shits'ádi'nílídígíí bee ákwii haz'ánígíí dílzingo ályaa doo.

⁴⁴Níbaal bii' dahozdísinii índa bikáá' náá'iiniihí dílzingo ádeeshłííł, áádóó Éran índa biye'ké diyingo nihodideesh'áałgo shá nidaal'a'go nááda'iiłniihii danilį́į doo.

⁴⁵Áko Ízrel dine'é bitah kééhasht'į́įgo biDiyin God nishłį́į doo.

⁴⁶Áko díí hoł béédahózin doo: Bóhólníihii haDiyin God nishłį́įgo hatah kééhasht'į́į doo biniyé Ííjip kéyahdę́ę́' ch'íhoní'eezhígíí ásht'į́ ni; Bóhólníihii haDiyin God nishłį́.