Read Navajo EXODUS 3 Bible Online

EXODUS 3 - Navajo bible

EXODUS 3

¹Ákohgo Mózes baadaaní jílíní Jéthro wolyéii bilį́į́' bá baa áhojilyą́; éí Mídiyan hoolyéédóó náá'iiłniihii nilį́įgo bilį́į́' dashdíníiłkaadgo e'e'aahjigo honoojíígóó Diyin God biDził Hóreb hoolyéejį' izh'nííłkaad.

²Áko Bóhólníihii bidiyingo naal'a'í hach'į' yit'íní í'diilyaa; dówózhii biyi'dóó kǫ' dah nídína'go jiníł'į́įgo dówózhii doo adik'ą́ą́hgóó diltłi' lá.

³Áko Mózes ání, Haa'íyee' bich'į' nideeshááł; díí ayóó át'éii nísh'ínígíí haléit'éego doo adik'ą́ąh da.

⁴Éí bich'į' nizhníyáago jinééł'į́į'go Diyin God hoołtsą́ągo dówózhii diltłi'ígíí biyi'dę́ę́' áhá łní, Mózes, Mózes. Áko ázhdííniid, Kǫ́ǫ́ sézį́.

⁵Áádóó áhodííniid, T'áadoo wóshdę́ę́' hidínáhí; nikee' hadiidlé, háálá sínízínígi hodiyingo haz'ą́.

⁶Áko ánáádí'ní, Danizhé'é yę́ę biDiyin God ásht'į́: Éíbraham biDiyin God áádóó Áízak biDiyin God índa Jéíkab biDiyin God nishłį́. Áko Mózes hanii' bich'ą́ą́h nizhdeelnii', háálá Diyin God bik'izhdooghał yę́ę béédzísdzííd.

⁷Áko Bóhólníihii ání, T'áá aaníí Ííjip kéyahdi shidine'é ti'dahooníihgo yiiłtsą́, áádóó naanish binanit'a'í danilíinii yik'ee daachago ałdó' diséts'ą́ą́', háálá yik'ee ti'dahooníhígíí shił bééhózin.

⁸Éí bąą Ííjip dine'é bílák'ee hááhodeesh'nił biniyé hadahóóle' áádóó kéyahdóó yá'áhoot'éehjį' áádóó hótsaa haz'ą́ąjį' ch'íhodeesh'ish; éí kéyah yá'áhoot'éehgi abe' índa tsés'ná bitł'izh bee áda'azįįdgo haz'ą́ąjį', Kéínan dine'é áádóó Het dine'é áádóó Ámor dine'é áádóó Píírez dine'é áádóó Háíva dine'é índa Jííbas dine'é dabikédaayahjį' yah ahodeesh'ish.

⁹Éí bąą k'ad, shoo, Ízrel dine'é shich'į' daachago diséts'ą́ą́', áko Ííjip dine'é bide ádeinízingo ti'dabiyoołníihgo t'áá íiyisí bide ádahósingo yiiłtsą́.

¹⁰Éí bąą k'ad tį', Féro bich'į' nihééndeesh'aał, áko shidine'é Ízrel dine'é danilíinii Ííjip kéyahdę́ę́' ch'ídíí'ish.

¹¹Áko Mózes éí Diyin God ábizhdííniid, Hádą́ą́' lá shígi át'éii Féro yich'į' deeyáago Ííjip kéyahdę́ę́' Ízrel dine'é ch'íiní'eezh!

¹²Diyin God ánááhodoo'niid, T'áá aaníí nił honishłǫ́ǫ doo, áko díí bee nich'į' ééhózin doo; éí shí nííł'aadgo Ííjip kéyahdóó diné ch'ínéíní'eezhgo díí dził bighą́ą'di Diyin God bich'į' nidahohłáa doo.

¹³Áko Mózes éí Diyin God ánéidoo'niid, Shoo, Ízrel bidine'é baa níyáago ko daats'í ábidideeshniił, Danihizhé'é yę́ę biDiyin God nihaa shiníł'a', dííniidgo ádashididooniił, Haashą' wolyé? Áko ha'át'íishą' bidideeshniił?

¹⁴Diyin God éí Mózes áyidííniid, Ásht'ínígíí t'áá éí ásht'į́. Áko ánáádoo'niid, Ízrel dine'é kóbididííniił, Ásht'į́ nínígíí t'áá éí nihaa shiníł'a'.

¹⁵Áko Diyin God éí Mózes ánááyidoo'niidgo ání, Díí Ízrel dine'é kóbididííniił, Danihizhé'é yę́ę biBóhólníihii Diyin God, Éíbraham biDiyin God áádóó Áízak biDiyin God índa Jéíkab biDiyin God nihaa shiníł'a'. Díí shízhi'go ahool'áa doo, índa náás adideezhchį́į́góó ts'ídá bee shééhániih doo, ní.

¹⁶Nílááh, Ízrel dine'é yá aląąjį' naazíinii áłah áníléehgo ádabididííniił, Danihizhé'é yę́ę biBóhólníihii Diyin God, Éíbraham áádóó Áízak índa Jéíkab biDiyin God, éí shich'į' ííshjání í'diilyaago kóní, Nihí índa Ííjip kéyahgi nihich'į' ádahóót'įįdígíí baa ákoniizį́į́', ní.

¹⁷Áko haasdzíi'go bee nihoní'áanii; éí Ííjip kéyahdi ti'hoo'nííh bits'ą́ą́dóó ch'ínihideesh'ishgo Kéínan dine'é áádóó Het dine'é áádóó Ámor dine'é áádóó Píírez dine'é áádóó Háíva dine'é índa Jííbas dine'é bikédaayahjį', kéyah yá'áhoot'éehgi abe' índa tsés'ná bitł'izh bee áda'azįįdgo haz'ą́ąjį' ánihideesh'ish.

¹⁸Áko daníists'ą́ą' dooleeł, áádóó ni índa Ízrel yá aląąjį' naazíinii bił Ííjip dine'é binanit'a'í baa noohkaigo ádabididoohniił, Bóhólníihii éí Hííbrew dine'é biDiyin God nihaa honíle', áko k'ad nídaniikąąh, háni'dii honoojíígóó tágí jį́ oonééł ánízahjį' nihéé'dííłnihgo áadi Bóhólníihii nihiDiyin God bich'į' náádadi'yiilnih.

¹⁹T'áá aaníí díí shił bééhózin: Ííjip kéyahdóó aláahgo naat'áanii doo nihéé'doołnih da; ts'ídá yílá bee adziilii t'éiyá yee nihéé'doołnih.

²⁰Áádóó hak'ijį' k'ídideesh'nihgo Ííjip dine'é bikéyahgi ayóó át'éego áhooníiłii t'áá ałtso bee atíhodeeshłííł, áko índa nihéé'doołnih.

²¹Áko díí Hííbrew dine'é bich'oha'néego Ííjip dine'é haa dajooba'go ádeeshłííł, áko dah doohkáahgo doo t'áá ákohígo dah didoohkah da.

²²Nidi asdzání t'ááłá'í jinítínígo bił kéédahojit'íinii índa haa dahakáhígíí éí yódí béésh łigaii áádóó óola índa éé'da bídeízhdóokił; éí danihiyáázh índa danihich'é'é bee hadadidoohłííł, ákohgo éí Ííjip dine'é t'áá ákohígo ádadoohłíiłgo bits'ą́ą́' dah didoohkah.