Read Navajo EXODUS 30 Bible Online

EXODUS 30 - Navajo bible

EXODUS 30

¹Bikáá' náá'iiniihí áníléehgo éí bikáa'jį' tsin bijeeh dilidgo łikání halchinii nááhániih doo biniyé tsin nitł'izii bee ádíílííł.

²T'ááłá'í ké siláádóó ná'áłníi'go áníłnéez doo, índa naaniigo t'ááłá'í ké siláádóó náá'áłníi'go áníłtéel doo; dik'ą́ą doo, nidi dego éí táá' ké silá ánízah doo; bidee' hadaaz'áa dooígíí bił t'áá ła' bizhi'ee ádíílííł.

³Óola t'áá bízhání bik'ídadííłtih; bikáá'dę́ę́' áádóó booshk'iizh naaz'áhígíí índa bidee' hadaaz'áa dooígíí ákódíílííł, áádóó ałdó' bibąąhgóó óola ahénálch'ah dooígíí ádíílííł.

⁴Índa biyaagi t'áá ałch'ishjí tsin níyizii ii' ní'áago bee naat'á biniyéhígíí bá óola názbąsgo bąąh dah sinilgo ádíílííł.

⁵Tsin nitł'izii níyizgo íinilaago óola bik'ésti'go ádíílííł.

⁶Áko tsits'aa' dílzinii éí neeznáago bik'eh ó'oo'níiłii bee bééhániihii bii' sinilii bidáahgi ata'naníbaalígíí éí bitsį́įgi nidíí'ááł; éí neeznáago bik'eh ó'oo'níiłii bee bééhániihii bikáa'gi aa a'ááh hasinii bił haz'ánígi t'áá ákwii nił ahínéisht'ash doo.

⁷Áko Éran éí t'áá ákwíí ábíní bikáá' náá'iiniihí bikáa'jį' tsin bijeeh dilidgo łikání halchinii jidiłid doo; bee dahool'inígíí baa áhojilyą́ągo éí łikání halchinii jidiłid doo,

⁸índa t'áá iná'át'ááh bik'eh Éran éí bee dahool'inígíí nízhdiiłtłi'go tsin bijeeh dilidgo łikání halchinii jidiłid doo, áko t'áá ákwíí jį́ tsin bijeeh dilidgo łikání halchinii éí Bóhólníihii binááł náádahołniihgo náás da'ahíínółchíih dooleeł.

⁹Tsin bijeeh dilidgo łikání halchinii doo dílzinígíí áádóó didlidgo nááhániihii áádóó ak'áán nááhániihii díí bikáá' náá'iiniihí bikáa'gi ts'ídá doo didoodlił da, índa yanáadzi'go nááhániihii doo bik'i yeidooził da.

¹⁰Áádóó Éran éí ádił ni'iihdzíihii bee k'ééhoodǫǫłgo biniyé nááhániihii bidiłígíí bee díí bikáá' náá'iiniihí bidee' hadaaz'áhígíí níjiidlish; t'áá nináháhááh bik'eh bee á k'ééhodǫǫłii ánáyiil'įįhgo bikáá' náá'iiniihí bidee' dił yee náyiidlishgo náás da'ahíínółchíih dooleeł, áko Bóhólníihii bich'į' ts'ídá aláahgo dílzinii át'é.

¹¹Bóhólníihii éí Mózes áyidííniid,

¹²Nizaad k'ehgo Ízrel dine'é ánéelt'e'gi bééhodoozįįłgo bi'déélta'ígíí t'ááłá'í jinítínígo t'áá hó Bóhólníihii bich'į' ádá nináhályéii nizhníláhígíí hoł da'éélta' doo, áko dahwííníłta'ígíí hatahgóó naałniih doo bee hach'į' nidahwii'náa da doo.

¹³Daho'déélta'ígíí t'ááłá'í jinítínígo nidahizhdoojihígíí éí díí: shékel wolyéii hodiyingo haz'ą́ą́ góne' choo'íinii bik'ehgo ałníí'dóó nidajiijáah doo; shékel wolyéii naadiin gíírah bíighah; díí shékel éí Bóhólníihii bich'į' nááhániih doo.

¹⁴Íighah dah dahizhdiikáahgo daho'déélta'ígíí naadiin hwéédááhaidóó degoígíí t'áá ádzíłtso éí Bóhólníihii díí baa dahizhdidoo'ááł.

¹⁵Ádá nináhályéii nijiléego nihitahgóó da'jit'íinii béeso shékel ałníí' biláahgo, doodaii' hadahojoobá'ígíí ałdó' ałníí' t'áá bi'ohgo, doo Bóhólníihii baa nídahizhdi'aah da doo; éí bee nihá k'ééhoodǫǫłii át'é.

¹⁶Ízrel dine'é bits'ą́ą́dóó béeso bee á k'ééhojooldǫǫłii nídidííniłgo níbaal bii' dahozdísinii bii' choo'į́į doogo ats'ádíínił; éí bee Ízrel dine'é yénálniihgo Bóhólníihii binááł ákót'ée doo; éí nihá bee k'ééhoodǫǫłii át'é.

¹⁷Bóhólníihii éí Mózes áyidííniid,

¹⁸Bii' tá'ádígisí bii' tá'ádazdigis doo biniyé índa bá si'ánígíí béésh łitsoii bee ádíílííł, áádóó níbaal bii' dahozdísinii índa bikáá' náá'iiniihí bita'gi nidíí'áałgo tó bee nidííkááł.

¹⁹Ákwii Éran áádóó biye'ké dabíla' índa dabikee' tánínádeigis doo.

²⁰Níbaal bii' dahozdísinii góne' yah anídaakahgo átsé tá'ánídadigisgo, áko doo dadínóonéeł da, doodaii' bikáá' náá'iiniihí yich'į' ninádaakahgo shá nidaal'a'go Bóhólníihii yich'į' didlidgo nááhániihii náádayiiłniih doo biniyé,

²¹áko dabíla' áádóó dabikee' tánínádeigis doo, áko doo dadínóonéeł da; éí yee nihoní'áanii ahóyéel'áágóó bá át'ée doo; bí áádóó biye'ké bits'ą́ą́dóó náás ahoolchíiłii bá át'ée doo.

²²Náá'áłdó' Bóhólníihii éí Mózes áyidííniid,

²³Spáis ts'ídá yá'ádaat'éehii nídidíínił: ak'ah ílíinii mir wolyéii ashdladi neeznádiin shékel bíighahgo áádóó sínaman wolyéego łikání halchinii ashdladi neeznádiin ałníí'dóó; éí naakidi neeznádiindóó ba'aan ashdladiin bíighahgo, áádóó akaz łikání halchinígíí kálamas wolyéii naakidi neeznádiindóó ba'aan ashdladiin bíighahgo

²⁴índa kásha wolyéhígíí ashdladi neeznádiin bíighahgo nídidíínił, éí shékel hodiyingo haz'ánígi choo'íinii bik'ehgo, índa áliv bineest'ą' bik'ah t'ááłáhídi yikááł bíighahgo éí t'áá ałtso nídidíínił.

²⁵Ak'ah ak'i yahiidzíidgo bee alzį́įhii éí bił bééhózinii ałtahgo ííł'ínígi át'éego ádíílííł; dílzingo ak'ah ak'i yahiidzíidii át'ée doo.

²⁶Áko éí bee níbaal bii' dahozdísinii índa tsits'aa' dílzinii éí neeznáago bik'eh ó'oo'níiłii bee bééhániihii bii' sinilii bik'ídííłtah;

²⁷bikáá' adání áádóó bibeedí t'áá ałtso índa bee hool'iní bá yadaa'áhígíí áádóó bił chodao'íinii t'áá ałtso índa bikáá' náá'iiniihí éí tsin bijeeh dilidgo łikání halchinii bá ályaaígíida

²⁸áádóó bikáá' náá'iiniihí éí didlidgo nááhániihii bá ályaaígíí índa bił chodao'íinii t'áá ałtso, áádóó bii' tá'ádígisí áádóó bá si'ánígíida bik'ídadííłtah;

²⁹éí dílzingo ádadííliił, áko ts'ídá aláahgo dadílzin doo, áko t'áá ha'át'íhída bíhidéé'ná'ígíí éí dílzin dooleeł.

³⁰Éran áádóó biye'ké ak'ah bik'i yadeidííziłgo diyingo bits'ąą dahasti'go shá nidaal'a'go náá'iiłniihii danilį́į doo.

³¹Áko Ízrel dine'é ábididííniił, Díí ak'ah dílzingo ak'i yahiidzíidii shá ats'ádeet'ą́ągo náás da'ahíínółchííhgóó nihá át'ée doo.

³²Diné t'áá azlį́'ígíí doo bits'íís bik'i yeidooził da; t'ááká spáis ałtahgo ál'ínígi át'éego éí ak'ah bił aheełt'éhígíí ánáádaohdle' yíila'; dílzinii át'é, áko nihich'į'go dílzingo nideet'áanii át'é.

³³T'áá háiida díí bił aheełt'éego ájiilaago índa t'áá háiida doo Ízrel dine'é nilíinii bik'i yadziiziidgo éí hadine'é bits'ą́ąjį' hodi'yoolyééł.

³⁴Áádóó Bóhólníihii éí Mózes áyidííniid, Spáis łikání dahalchinii nídidíínił: éí stáktii wolyéhígíí áádóó ánika wolyéhígíí índa gálbanam wolyéhígíí áádóó tsin bijeeh dilidgo łikání halchinii fránkinsens wolyéii bił t'áá bízhání nídidíínił; t'áá ahidaałt'éego dah dahidiidloh doo,

³⁵áko tsin bijeeh dilidgo łikání halchin dooígíí éí áshįįh bił ałtahgo t'áá bízhánígo índa dílzingo bił bééhózinii ííł'ínígi át'éego ádíílííł.

³⁶Ła' áłts'íísígo dadidííséigo łahjį' níbaal bii' dahozdísinii biyi' góne' éí tsits'aa' dílzinii bidááhjí ła' nidííjih; áadi nił ahínéisht'ash doo; éí nihich'į'go ts'ídá aláahgo dílzinii át'é.

³⁷Tsin bijeeh dilidgo łikání halchinii t'áá bee haz'ą́ągo ál'ínígíí bik'ehgo ádíílíłígíí éí doo t'áá nihí ádá ádadoohłíił da, háálá nihich'į'go Bóhólníihii dílzingo bá ats'át'áanii át'é.

³⁸T'áá háiida éí łikání halchin doo biniyé bił aheełt'éii ádá ájiilyaago éí hadine'é bits'ą́ąjį' hodi'yoolyééł.