Read Navajo EXODUS 32 Bible Online

EXODUS 32 - Navajo bible

EXODUS 32

¹Ákohgo dziłghą́ą́'dę́ę́' Mózes doo hah níjídááhgóó diné haa ákodaniizį́į'go Éran yaa áłah silį́į'go ádeidííniid, Haa'íshą', diyin nihilą́ąjį' hoo'į́į dooleełígíí nihá ádíílííł, háálá díí diné éí Mózes joolyéii Ííjip kéyahdę́ę́' ch'ínihiní'eezhígíí háájí shį́į́ dzizlį́į'go doo nihił béédahózin da.

²Áko Éran áhodííniid, Nihida'asdzą́ą́ áádóó danihiye'ké índa danihitsi'ké éí óola bijadaatł'ólígíí baa dahidoohníiłgo shaa dahidoohjih.

³Ákohgo diné t'áá ałtso óola dabijaatł'ólígíí hadeidiyii'nilgo Éran yaa dayiizhjaa'.

⁴Áko óola jaatł'óół nízhdiinil áádóó jidííłhį́į'go nijik'ęęhgo béégashii yáázh béé'jiidlaa, áko ádadííniid, Ízrel dine'é danohłíinii, díí nihidiyin át'éii Ííjip kéyahdę́ę́' ch'ínihiní'eezh!

⁵Ákohgo Éran éí béégashii yáázh be'elyaaígíí yiyiiłtsą́ągo bidááhdóó bikáá' náá'iiniihí áyiilaa, áádóó kójíníigo diné bił hojoolne', Yiską́ągo Bóhólníihii bich'į'go dahodíínóhsingo áłah náhdleeh doo.

⁶Áko t'ah abíínígo nízhdiijée'go didlidgo náádahaniihígíí áádóó hózhǫ́ǫ́jí náádahaniihígíí náádadziisnii', áádóó diné dineezbingo da'ííyą́ą́' áádóó da'oodlą́ą́', índa nídiijée'go tsi'deeskaigo be'elyaii yich'į' nidahałáago ida'niilzhiizh.

⁷Áko Bóhólníihii éí Mózes áyidííniid, Nílááh, adáánídááh, háálá nidine'é Ííjip kéyahdę́ę́' ch'ííní'eezhígíí t'áá bí ádadoolchxǫ';

⁸bee bich'į' haasdzí'ígíí t'áadoo hodina'í yits'áhaaskai; t'áá bí óola deidííłhį́į'go béégashii yáázh ádá ádayiilaa áádóó yich'į' nidahałáago nááda'iiłniih, áko ádaaní, Ízrel dine'é danohłíinii, díí nihidiyin Ííjip kéyahdę́ę́' ch'ínihiní'eezhii át'é.

⁹Áko Bóhólníihii éí Mózes ánéidoo'niid, Díí diné béédahasin; jó, ák'eh dahal'į́įgo t'áá íiyisí doo nibída'didzil da;

¹⁰éí bąą k'ad, t'áadoo shiníníłtł'aaí díí diné hach'į' t'áá íiyisí hashké nísdzingo áhodeeshdįįł, áádóó nits'ą́ą́dóó diné ayóó át'éego náás ahoolchíiłgo ádeeshłíí ł.

¹¹Ákohgo Mózes éí Bóhólníihii haDiyin God níjookąąhgo ájíní, Bóhólníihii nílíinii, ha'át'éegoshą' Ííjip kéyahdę́ę́' ayóó át'éego nibee adziilii áádóó níla' bidziilii bee nidine'é ch'ííní'eezhígíí bich'į' hashké ninidzį́į́'?

¹²Ííjip dine'é ha'át'íidashą' dadidooniił? Doo yá'át'ééhgóó honahaz'ą́ągo dziłghą́ą'di nahodoołtsiłgo nahasdzáán bikáa'jį' áhodoołdįįł biniyé ch'íhoní'eezh lá. T'óó báhádzidgo hashké ninidzį́'ígíí bits'ą́ąjį' ánání'nééh, áádóó nidine'é doo yá'át'éehii bee bich'į' nitsíníkeesígíí łahgo át'éego bąąh tsíńdíkees.

¹³Éíbraham áádóó Áízak índa Ízrel ninaal'a'í danilį́į́ nít'éé' yę́ę béénílniih; éí bich'į' ádee hahidíínídzíi'go ádabidííníniid, Yádiłhił biyi'di sǫ'ígi ánéelą́ą'go niha'áłchíní ts'ídá t'óó ahayóigo nídínéesht'į́į́ł, áádóó díí kéyah t'áá át'é niha'áłchíní baa dideesh'ááł, diníigo bee háínídzíí', áko éí hool'áágóó bíí' dadooleeł.

¹⁴Áko Bóhólníihii bidine'é doo yá'át'ééhgóó yąąh tsídeezkééz yę́ę łahgo át'éego yąąh tsíńdeezkééz.

¹⁵Áko Mózes níjiiyáago tsé dilkǫǫhii naakigo bikáa'gi neeznáago bik'eh ó'oo'níiłii bee bééhániihii joojihgo dziłghą́ą́'dę́ę́' hadah nihéédzídzá; éí tséhígíí t'áá ałch'ishdę́ę́' bik'e'ashchį́.

¹⁶Áádóó tsé dilkǫǫhgo ályaaígíí éí Diyin God binaanish át'é, áádóó bik'i na'ashk'aazhgo Diyin God t'áá bí ak'e'ashchį́įgo bikáá'.

¹⁷Ákohgo diné hahóół'áago dadilwoshgo éí Jáshowa yidiizts'ą́ą'go Mózes áyidííniid, Níbaal naaznilígi diné nidáahgo anaa' yiits'a'.

¹⁸Áko ájíní, Ak'eh dazhdeesdlį́į'go bąą dazhdilwoshígíí doo la' ákwíits'a' da; haa dahoneeznáago biniinaa hahojííł'áhígíí ałdó' dooda, nidi dahataałgo diists'a'.

¹⁹Áádóó Mózes éí níbaal naaznilígíí bit'áahjį' nizhníyáago béégashii yáázh be'elyaii áádóó azhish baa na'aldeehígíí dziiłtsą́, áko Mózes éí bik'ee háhóóchįįdgo hoł hazhchihgo biniinaa tséhígíí nahjį' adziistł'ííd, áko dził bitsį́įdi nidziizti'.

²⁰Áko béégashii yáázh be'elyaii ádayiilaaígíí nízhdiiłtį́įgo jidííłid áádóó jíík'ą́ągo táłkáá'góó tajoozghaz, índa Ízrel dine'é bízhníłkadgo éí tóhígíí dayoodlą́ą́'.

²¹Nít'éé' Mózes éí Éran áyidííniid, Díí dinéshą' ha'át'íí daniłníigo biniinaa ayóó át'éego ádił ni'iidzííh biih yínínil?

²²Áko Éran ájíní, Shinanit'a'í, t'áadoo náháchį'go nił halchí'í; díí diné át'éii nił bééhózin; éí doo yá'át'éehii t'éí deidiniidzį́į́'.

²³Háálá ádashidííniid, Diyin nihilą́ąjį' hoo'į́į dooleełígíí nihá ádíílííł, háálá díí diné, Mózes joolyéii, Ííjip kéyahdę́ę́' ch'ínihizhní'eezhígíí háájí shį́į́ dzizlį́į'go doo nihił béédahózin da.

²⁴Áko ábidishní, T'áá háiida óola bee dahólónígíí háni'dii hadahizhdii'níił le', ákohgo shaa dayiizhjaa'go tsídzáháłkaad, nít'éé' béégashii yáázh be'elyaii silį́į́' lá.

²⁵Mózes éí diné t'áá bí danízinígíí yaa naakaigo baa ákozniizį́į́', jó, Éran éí diné bida'ana'í dabinááł t'áá bí danízinígíí yaa naakai doogo yich'į' yi'níłnii'go t'óó baa yádahóósįįd,

²⁶áko níbaal naaznilígíí bich'į' yah ahóót'i'ígi Mózes dzizį́įgo ázhdííniid, Háishą' Bóhólníihii yich'ijí danilį́? Hágo, shaa hohkááh. Áko Líívai dine'é t'áá ałtso haa áłah silį́į́'.

²⁷Áko ábizhdííniid, Ízrel dine'é biDiyin God Bóhólníihii kóní, T'ááłá'í nootínígo nihidiltłish bił áká daałzisgo níbaal haal'áhígíí bich'éda'atiingóó dahidohkáahgo t'ááłá'í nootínígo nihik'is nidadoołtsił, áádóó ahíłk'isii índa nihił kéédahat'íinii ałdó' nidadoołtsił.

²⁸Ákohgo Mózes bizaad k'ehgo Líívai dine'é ákódaadzaa, áko éí bijį́ diné éí hastóí áádóó tsíłkéí danilínígíí táadi mííl daats'í nidaaztseed.

²⁹Háálá t'áá íídą́ą́' Mózes áhodííniid, Diyingo bits'ąą hasti'go díí jį́ Bóhólníihii bich'į' ni'ádidooht'ááł; jó, t'ááłá'í nootínígo nihiye'da áádóó nihik'isda doo ákǫ́ǫ́ ádaadzaaígíí ádasoołdįįd, áko díí jį́ Bóhólníihii nihik'ijidlíi doo.

³⁰Ákódzaadóó biiskání Mózes éí diné áyidííniid, Ts'ídá ayóó át'éego ádił da'soołziihgo át'é, áko k'ad Bóhólníihii bich'į' déyá; bee nihá k'ééhodoodǫǫłii nihá ádeeshł íiłgo t'ah nít'ée'da ádił da'soohsiihígíí nihá yóó'anéididoo'ááł.

³¹Ákohgo Mózes éí Bóhólníihii yich'į' anáádzáago áadi ádííniid, Dooládó' ayói da; díí diné ayóó át'éego ádił da'asiihgo óola dabidiyingo ádá ádayiilaa.

³²Nidi k'ad íinínízin ládą́ą́' ádił da'asiihígíí bá yóó'anídí'aah, doodaii' ninaaltsoos bii' shízhi' sínízohígíí k'éé'dííłchxǫǫłgo baa nánooshkąąh.

³³Nidi Bóhólníihii éí Mózes áyidííniid, T'áá háiida shich'į' ádił asiihígíí éí t'éí shinaaltsoos biyi' házhi' k'éé'deeshchxǫǫł,

³⁴nidi k'ad nílááh, kéyah binahjį' nich'į' hahásdzí'ígíí éí diné biih ni'éésh; jó, shidiyingo naal'a'í nihilą́ąjį' hooleeł doo, ákondi ánihodeesh'ááł bijį́įdi ádił da'asiihii bik'i hwiideeshłeełgo atídahodeeshłííł.

³⁵Áádóó Bóhólníihii yee atí'é ł'íinii yee atíhoolaa, háálá diné danilíinii dayókeedígíí bik'ehgo Éran éí béégashii yáázh be'elyaii áyiilaa.