Read Navajo EXODUS 33 Bible Online

EXODUS 33 - Navajo bible

EXODUS 33

¹Bóhólníihii éí Mózes yich'į' haadzíi'go ádííniid, Nihílááh, dah doohnééh; ni lá áádóó Ííjip kéyahdę́ę́' diné ch'ííní' eezhígíí éí Éíbraham áádóó Áízak índa Jéíkab bich'į' kéyah bee ádee hahidísdzíi'go, Niha'áłchíní baa dideesh'ááł, bidííniidígíí ákóde nídidooh'nééł.

²Áádóó diyingo naal'a'í nihilą́ąjį' deesh'aał, áko Kéínan dine'é, Ámor dine'é, Het dine'é, Píírez dine'é, Háíva dine'é índa Jííbas dine'é ch'ídahidínéeshkał.

³Kéyahgi yá'áhoot'éehgi abe' índa tsés'ná bitł'izh bee áda'azįįdgo haz'ą́ąjį' nídidooh'nééł, nidi shí éí doo ákóde nihitah déyáa da, háálá nihí éí diné ák'eha'į́ bee doo nibída'didzilii danohłį́; jó, nihitah yisháałgo éí ánihideeshdįįłgoda át'é.

⁴Ákohgo diné díí hane' doo yá'át'éehii deidiizts'ą́ą'go yaa yínííł daazlį́į́', áko biyódí doo ła' yee háádadiit'įįh da hazlį́į́'.

⁵Háálá t'áá íídą́ą́' Bóhólníihii éí Mózes áyidííniid, Ízrel dine'é kóbididííniił, Nihí éí diné ák'eha'į́ bee doo nibída'didzilii danohłį́; jó, t'óó nihitah honishłǫ́ǫgo t'óó ánihideeshdįįł. Éí bąą k'ad, nihiyódí bee nida'ádóhch'ąąhígíí ádaa dahidooh'nííł, áko ánihideeshłíiłgi bee hasht'e'nitsídeeskos.

⁶Éí bąą Ízrel dine'é éí Dził Hóreb hoolyéegi biyódí yee háádadiit'įįhígíí hadeidiyii'níiłgo hodeeshzhiizh.

⁷Áko Mózes éí níbaal néidiiłtsoozgo níbaal haal'áhídóó t'áá nízaadi níbaal niiní'ą́, áko, Éí níbaal bii' dahozdísinii wolyée doo, dííniid. Áádóó t'ááłá'í jinítínígo Bóhólníihii bich'į' nída'jookąąhígíí éí níbaal bii' dahozdísinii éí níbaal haal'áhídóó t'áá sahdii nízaadi si'áníjį' ałnáádajikah.

⁸Áko Mózes éí níbaal bii' hodílzinii si'ánígóó t'áá dashdiighááh bik' eh diné t'ááłá'í nítínígo nídiijah áádóó t'ááłá'í danítínígo dabiníbaal bich'é'étiindóó naazį́įgo, Mózes éí níbaal bii' hodílzinii si'ání góne' yah ajigháahjį' dahoníł'į́į łeh.

⁹Áádóó Mózes éí níbaal bii' hodílzinii góne' t'áá yah aníjídááh bik'eh k'os níyizgo níbaal bii' hodílzinii bich'é'étiinjį' análdohgo Bóhólníihii éí Mózes yich'į' yáłti' łeh.

¹⁰Áko diné t'áá ałtso éí k'os níyizgo níbaal bii' hodílzinii bich'é'étiinjį' análdohígíí nídayiiltsééh bik'eh diné t'áá ałtso nídiijahgo t'ááłá'í nítínígo dabiníbaal bich'é'étiingi nidahałáa łeh.

¹¹Áko diné éí bik'is yił yáłti' łeeígi át'éego Bóhólníihii éí Mózes t'áá binii'jį' yich'į' yáłti' łeh. Ákohgo Mózes éí níbaal haal'áhígóó anáhádáahgo bá naal'a'í, Nán biye' Jáshowa dinééh nilį́įgo níbaal bii' hodílzinii doo yits'ágháah da.

¹²Mózes éí Bóhólníihii áyidííniid, Shoo, áshidiníí lá, Díí diné ákóde díí'ish. Nidi háí ákǫ́ǫ́ shił dííł'aałígíí t'áadoo shił bééhózingo áshiinilaa da. Ákondi kóshidííníniid lá, Nízhi' bee nééhasin áádóó ajooba' bee nich'oha'néego nąąh tsídíkééz.

¹³Éí bąą k'ad, baa nánooshkąąh, ajooba' bee shich'oha'néego shąąh tsídíníkééz ládą́ą́'; ánít'éii shił ííshjání ánílééh, ákót'éego nééhasin doo. Áádóó ałdó' ajooba' bee shich'oha'néego shaa nitsíníkees doo. Díí dine'é t'áá ni nidine'é át'éego baa nitsíníkees le'.

¹⁴Áko Bóhólníihii ání, Shí honishłónígíí nił honishłǫ́ǫ dooleeł, áádóó háánílyį́įhgo ándeeshłííł.

¹⁵Áko ábijiní, Honílóonii bee doo nihił honílǫ́ǫ́góogo kodóó doo ákóde nihidíí'ish da lá.

¹⁶Háálá shí índa nidine'é ałdó' ajooba' bee nihich'odaha'néego nihąąh tsídíníkézígíí haash yit'éego bééhózin doo? Nihił honílónígíí bee shí índa nidine'é ałdó' nahasdzáán bikáá'góó náádaała' dine'é t'áá ałtso bił ał'ąą ádaniit'éego bééhózin.

¹⁷Áko Bóhólníihii éí Mózes áyidííniid, Díí baa yáníłti'ígíí bik'ehgo ádeeshnííł, háálá ajooba' bee nich'oha'néego nąąh tsídíkéezgo nízhi' bee nééhasin.

¹⁸Áko Mózes ájíní, Nánooshkąąh, bee ayóó ánít'éii shił ííshją́ą́ ánílééh.

¹⁹Áko Bóhólníihii áhodííniid, Bee yá'ánísht'éhígíí t'áá ałtso ninááł ádeeshłííł, áádóó Bóhólníihii shízhi' nilíinii bee nił hodeeshnih, áádóó t'áá háiida baa jiideeshbaałii éí baa jooshba' doo, índa t'áá háiida baa a'ááh dínéesįįłii éí baa a'ááh nisin doo.

²⁰Nidi ánáádí'ní, Shinii' éí doo nóół'į́į́' át'ée da, háálá diné ła' shinééł'į́į'go doo hináa da doo.

²¹Áko Bóhólníihii ánááhodi'ní, Shoo, shíighahgi haz'ánígi tsé'éłkáa'gi yiizįįh,

²²áko índa bee ayóó ánísht'éii bee ną́ą́h dideeshááł biniyé tsék'iz góne' nindeeshtééł, áádóó ną́ą́h díyáago nich'ą́ą́ díínísh'nii' doo.

²³Áádóó índa nahjį' anídeesh'nii'go shine'dę́ę́' t'éí yidííłtsééł, nidi shinii' éí doo yidííłtséeł da.