Read Navajo EXODUS 34 Bible Online

EXODUS 34 - Navajo bible

EXODUS 34

¹Áádóó Bóhólníihii éí Mózes áyidííniid, Átséédą́ą́' tsé dilkǫǫhgo naaki naa nínil yę́ęgi át'éego ła' hasht'e'nibí'dííłniił, áádóó tsé dilkǫǫhii síníłts'ilígíí saad bikáá' sinil nít'éé' yę́ęgi át'éego bikáa'gi bee ak'enáá'deeshchííł.

²Áko abínígo hasht'e'ádíínílzin doo, áádóó t'ah abíínídą́ą́' Dził Sáínai bíidíínáałgo dziłghą́ą'di shich'į' nidíínááł.

³Diné doo ła' ákóde nił doo'ash da; diné t'áadoo dziłghą́ą́'góó nidaakaí dooleeł; dibé áádóó béégashii t'áadoo dziłtsį́įjį' nidazh'niłkaadí dooleeł.

⁴Ákohgo Mózes éí tsé dilkǫǫhgo naaki áłtséhígíí nahalingo hasht'e'nibí'náázhníłne', áádóó t'ah abíínídą́ą́' nízhdii'na'go Dził Sáínai bighą́ą́'góó dashdiiyá; Bóhólníihii áhodííniidígíí bik'ehgo tsé dilkǫǫhii ákǫ́ǫ́ jiníjaa'.

⁵Áko Bóhólníihii éí k'os bił hadah hóóle'go hwíighahgi yiizį'go t'áá Bí bízhi' yee hoł hoolne'.

⁶Áádóó Bóhólníihii éí Mózes yą́ą́h deeyáago ání, Bóhólníihii, Bóhólníihii, éí Diyin God nilį́įgo aa a'ááh nízinii áádóó jooba'ii áádóó nízaadgóó ha'ólníinii áádóó ts'ídá łą́ągo bibee ajooba' índa bit'áá aaníinii hólóonii,

⁷ahóyéel'áágóó bibee'aa a'ááh hasinii éí miilgo ádazhnéelą́ą'go doo ákwii ádajit'ínígíí áádóó bee haz'áanii dajiitíhígíí índa ádił nida'jiilzíhígíí há yóó'anéidiyii'aahgo hak'ijidlí, nidi ádił oodzíí' bee bihodiit'i'ii yá naatłizh yę́ę doo yénálniih da doo; jó, da'azhé'é yę́ę doo ákwii ádajíít'įįdígíí hada'áłchíní náás ahoolchíiłii táadi índa dį́įdi ałk'i ná'ázhchį́įjį' bik'i hwiileehgo bá nináhwiish'nííł.

⁸Áádóó t'áá áko Mózes yaa ádziidzaago ni'jį' nitsidinígo'go nahodzisá.

⁹Áko ájíní, Bóhólníihii nílíinii, ajooba' bee shich'oha'néego shąąh tsídíníkééz ládą́ą́', Bóhólníihii nílíinii, nánooshkąąh, nihitah honílǫ́ǫ doo; azhą́ díí diné ák'eha'į́ bee doo nibída'didzilii danilį́į nidi, doo ákwii ádeiit'ínígíí índa ádił nida'ayiilzihígíí nihits'áhidí'aah áádóó níí' dadiidleeł biniyé nánihididíínił.

¹⁰Áádóó Bóhólníihii ádííniid, Jó, díí bee nihá hoosh'aah: nidine'é t'áá ałtso dabinááł t'óó bik'ee bił adahayóí ááshłíił doo; nahasdzáán bikáá'góó t'áá át'éé nít' éé', doodaii' ał'ąą dine'é bitahgóó t'ah doo ánéehii ááshłíił doo, áko diné bitah nanináhígíí éí Bóhólníihii binaanish deidoołtsééł. Jó, ninahjį' t'óó báhádzidígi át'éii baa nideeshaał.

¹¹Díí jį́ bee nihich'į' haasdzí'ígíí béédaałniihgo baa dahonohsą́; jó, nihilą́ąjį' Ámor dine'é, Kéínan dine'é, Het dine'é, Píírez dine'é, Háíva dine'é índa Jííbas dine'é ch'ídahoniishkaad doo.

¹²Ádaa honíyą́, doodaii' éí kéyahjį' díínéłígi kéédahat'ínígíí bił ahada'díínít'ą́ągo éí łoh nihąąh niit'ą́ nahalin dooleeł,

¹³nidi bibikáá' nááda'iiniihí bits'ą́ą́' nidahidoołchxǫǫł, áádóó bi'eda'alyaii bits'ą́ą́' naa'adahidoołtł'ił, índa bitsin naazkaadii yich'į' nidahałáhígíí nidahidoohtsił.

¹⁴Jó, diyin bidi'níinii doo ła' bich'į' nidahohłáa da dooleeł, háálá Bóhólníihii Łe'nízinii wolyéii, éí Diyin God nilíinii bidine'é yaa łe'nízinii nilį́.

¹⁵Áko kéyahgi kéédahat'ínígíí doo bił ahadadi'díít'áał da, áádóó éí diné bidiyin dabidi'níinii bił tł'éé' na'aldeehii áádóó bidiyin dabidi'níinii yich'į' náádayiiłniihii t'áá háiida áajį' hágo niłníigo nááyiisnii'ii dííyį́įłgo bił aha'dóót'ááł lágo.

¹⁶Náá'áłdó' dabitsi'ké danilíinii danihiye'ké bá nídahidoohnííł lágo, áko dabitsi'ké bidiyin dabidi'níinii bił tł'éé' na'aldeehii danihiye'ké ałdó' t'ááká yił tł'éé' naaldeeh yíila'.

¹⁷Béésh doolyį́'ígíí bee diyin dabidi'níinii doo ła' ádá ádíílníił da.

¹⁸Díík'ǫsh t'áágééd bááh ályaii yidą́ áńdaał'įįhgo béédaałniih doo. Tsosts'id jį́ díík'ǫsh t'áágééd bááh ályaii nídaahdį́įh dooleeł; bee nihich'į' haasdzíi'ii bik'ehgo Éíbib yiziłígíí binih ła'a jį́ bee nihoní'áníjį' anáhwiilzhíishgo ákódaaht'į́į doo, háálá Éíbib yiziłígíí binih Ííjip kéyahdę́ę́' ch'ínoohkai ni'.

¹⁹Alą́ąjį' nidaho'diizhchínígíí t'áá ádzíłtso shíí' dajílį́, índa danihilį́į'da, béégashii áádóó dibéda dabiką'go alą́ąjį' nidahachíhígíí t'áá ałtso daashí.

²⁰Nidi télii alą́ąjį' nidahachíhígíí bitsásk'ehgi dibé yázhígo bee t'ą́ą́' náádahidoołnih, doodaii' bitsásk'ehgi doo ła' nááhideeshnih da danohsingo éí t'óó bik'os dahohtíih doo. Nihiye'ké alą́ąjį' nidahachíhígíí t'áá ałtso éí dibé yázhí bee t'ą́ą́' náádahidoołnih. Áko nááhániihii t'áágéedgo doo ła' shich'į' nizhdoogáał da.

²¹Hastą́ą́h jį́ t'éí ninánílnish doo, nidi tsosts'id jį́į́ góne' hááhílyį́įh doo; azhą́ nahojiyółdlaad áádóó ajóyizhígi át'ée nidi t'óó hááhílyį́įh doo.

²²Atis'adeesdzá bééhániihgo néiit'aahdóó tsosts'idi Damį́įgo ná'ádleeh biiłkáhí tł'oh naadą́ą́' ts'ídá áłtsé bineest'ą' áłah ánál'įįhgo hodílzingo áłah ná'ádleehígíí béénílniih doo áádóó nídant'į́įhii ałtso nánígishgo hodílzingo áłah ná'ádleeh néił'aahgo nínáhah doo.

²³Nidinéhígíí t'áá ałtso Bóhólníihii Diyin God, t'áá éí Ízrel dine'é biDiyin God nilíinii yich'į' nináhákáahgo táadi ná'ádleehgo nínáhah doo.

²⁴Jó, dadine'é danilíinii nihilą́ąjį' ch'ídahoniishkaad doo, índa nihikéyah nihá bínáhiish'aah doo, áádóó ákóde Bóhólníihii nihiDiyin God nilíinii bich'į' nináhkahgo táadi ná'ádleehgo nínáhahgo diné doo ła' nihikéyahígíí yidádínóolnih da.

²⁵T'ááká shinááhániihii bidił éí díík'ǫsh t'áá biłgo nááhółniih lágo; atis'adeesdzá bee bééhániihii dibé yázhí bitsį' bi'oh da'oodą́'ígíí t'áadoo abíníjį' ła' t'áá ch'íhiniłnéhí.

²⁶Ts'ídá áłtséedi nihikéyahdóó áłtsé aneest'ą' nídahadleehígíí Bóhólníihii nihiDiyin God bikin góne' nidahohjáah doo. T'ááká tł'ízí yázhí bimá bibe' bee daołbéézh lágo.

²⁷Áko Bóhólníihii éí Mózes áyidííniid, Díí saad bee ak'e'íłchí; ni áádóó Ízrel dine'é díí saad bik'ehgo nihił ahadadi'nisht'ą́.

²⁸Áko Mózes éí Bóhólníihii bił hojílǫ́ǫgo dízdiin jį́ áádóó dízdiin tł'éé' azlį́į́'; t'áadoo ajiyání áádóó t'áadoo ajidlání. Áádóó tsé dilkǫǫhii bikáa'gi saad bee aha'deet'áanii bee ak'e'jishchį́; éí neeznáago bik'eh ó'oo'níiłii át'é.

²⁹Áádóó índa Dził Sáínaidę́ę́' Mózes éí tsé dilkǫǫhii naakigo bikáa'gi neeznáago bik'eh ó'oo'níiłii bee bééhániihii joojihgo dziłghą́ą́'dę́ę́' hadah níjoodáałgo hanii' bits'ádi'nílídígíí doo baa ákoznízingóó nídzídzá; jó, Diyin God bił ałch'į' yájíłti' nít'éé'.

³⁰Ákohgo Éran áádóó Ízrel dine'é t'áá ałtso Mózes dayiiłtsą́ągo, shoo, hanii' bits'ádi'nílííd, áko hwéédaaldzidgo hat'áahjį' doo dadikáah da.

³¹Nidi Mózes bíká ádííniidgo Éran áádóó áłah ílínígi diné nida'a'eeshígíí t'áá ałtso haa náhaaskai, áko Mózes hach'į' haadzíí'.

³²Áádóó bik'ijį' Ízrel dine'é t'áá ałtso haa haaskai, áko Dził Sáínai bighą́ą'di bik'eh ó'oo'níiłii éí Bóhólníihii hach'į' yee haadzí'ígíí t'áá át'é bee bił hojoolne'.

³³Áádóó índa Mózes éí diné yich'į' ałtso yááłti'go binii'jį' yik'é'ésti'.

³⁴Nidi Bóhólníihii binááł Mózes yah aníjídáahgo hanii'jį' bik'ésti'ígíí nahjį' aníjíłtsosgo bił ałch'į' yájíłti' łeh, áádóó ch'ééjiidáahgo hanii' bik'ínínáá'jíłtihgo Ízrel dine'é bił náhojilnih; éí Bóhólníihii hach'į' yee haadzíi'ii bik'ehgo ákójít'į́.

³⁵Ízrel dine'é éí Mózes binii' dayiiłtsą́ągo Mózes binii' t'áá íiyisí bits'ádi' nílííd lá, áko Bóhólníihii bił ałch'į' yájíłti' doo biniyé yah anáázhdoodáałjį' hanii' bik'íníjíłtih łeh.