Read Navajo EXODUS 35 Bible Online

EXODUS 35 - Navajo bible

EXODUS 35

¹Mózes éí Ízrel dine'é t'áá ałtso áłah áyiilaago áyidííniid, Díí saad Bóhólníihii nihich'į' yee haadzí'ígíí bik'eh ádaaht'į́į doo.

²Hastą́ą́h jį́ t'éí na'anish dooleeł, nidi tsosts'id jínígíí éí háá'áyį́į́h jį́ át'éego dílzin; Bóhólníihii bich'į' dahodíínóhsingo háádahołyį́įh doo; éí bijį́į́ góne' ła' t'áá ha'át'éegoda nijilnishgo t'óó hodi'yoolyééł.

³Kéédahoht'ínígi t'áá ánółtso háá'áyį́į́h jį́į́ góne' t'áadoo déédadołjahí.

⁴Mózes éí Ízrel dine'é t'áá ałtso áyidííniid, Díí Bóhólníihii nihich'į' yee haadzíi'go ání,

⁵Nihitahgóó t'áadoo le'é Bóhólníihii baa dahidoh'aah; t'áá háiida bił hadlee'ii háni'dii díí Bóhólníihii bich'į' náádahizhdoołnihígíí nidajiijáah doo: éí óola, béésh łigaii, béésh łitsoii,

⁶yisdizii yá nahalingo dootł'izhígíí, tsídídééh nahalingo łichí'ígíí áádóó łichxí'ígíí áádóó áłts'óózígo yisdizígíí bee na'at'ą́hí łigaii dits'idgo ályaii áádóó tł'ízí bighaa',

⁷deenásts'aa' bikágí daaldzą́ągo deilchii'ii áádóó nahashch'id bikágí, tsin nitł'izii akéíshiya wolyéii,

⁸ak'ah bee hool'inígíí, áádóó ak'ah ak'i yahiidzíidgo bee alzį́įhii índa tsin bijeeh dilidgo łikání halchinii bá spáis wolyéii,

⁹tsé ániks wolyéhígíí índa tsé da'ílíinii éí íífad wolyéii áádóó ayidgi dah siłtsooz dooígíí bikáa'gi bee nidooch'ąhii Bóhólníihii baa dahidoh'aah.

¹⁰Háni'dii diné t'ááłá'í nítínígo naanish dayiichįįhgo nidaalnishii éí t'áá át'é ádazhdoolíiłgo Bóhólníihii hach'į' yee haadzí'ígíí ádazhdoolííł;

¹¹éí níbaal bii' hodílzinii índa bitis ahííkaad dooígíí áádóó éí bikáa'gi ałk'i sikaad dooígíí índa ahidahidiiłtsoozgi bił dah nídaatį́įh dooígíí, tsin neheeshjíí' ahééneelkáal dooígíí índa booshk'iizhjí tsin níyizii naaniigo bąąh daní'áa dooígíí áádóó tsin níyizii ííyah danii'áa dooígíí índa bitł'ááh naaznilgo t'ááłáhíjí biih dahasdzą́ą dooígíí,

¹²tsits'aa' dílzinii índa tsin níyizii bee naat'áa dooígíí, aa a'ááh hasinii bił haz'áanii dooleełígíí, ata'naníbaal dooleełígíí,

¹³bikáá' adání áádóó tsin níyizii bee naat'áa dooígíí áádóó beedí chodao'į́į dooleełígíí t'áá ałtso t'áá bił, Diyin God bich'į' bááh nááhániih dooleełígíí,

¹⁴bee hool'iní bá yadaa'áii ałdó', bił chodao'íinii índa bílátah dah na'azkánígíí áádóó ak'ah iih náhádzíidgo bee hool'in dooleełígíí,

¹⁵tsin bijeeh dilidgo łikání halchinii bá bikáá' náá'iiniihí, tsin níyizii bee naat'áa dooígíí t'áá bił índa ak'ah ak'i yahiidzíidgo bee alzį́įhii áádóó tsin bijeeh dilidgo łikání halchin dooígíí, níbaal bii' hodílzinii bich'é'étiingi dáádiníbaal dooígíí,

¹⁶bikáá' náá'iiniihí éí didlidgo nááhániihii bá ályaaígíí índa bá béésh łitsoii ałnáshizhoozh dooígíí áádóó tsin níyizii bee naat'áa dooígíí índa bił chodao'íinii t'áá ałtso t'áá bił, bii' tá'ádígisí índa bá si'ánígíí t'áá bił,

¹⁷níbaal bii' hodílzinii binaa haz'ánígi nídadilbał dooígíí índa tsin níyizii ííyah danii'áa dooígíí áádóó bitł'ááh naaznilgo t'ááłáhíjí biih dahasdzą́ą dooígíí, ahééneelkálígíí bich'é'étiingi dáádiníbaal dooleełígíí,

¹⁸níbaal bii' hodílzinii áádóó binaadi ahééneelkáalgo bąąh aníbaalii bá anídaalkał dooleełígíí índa bitł'óól bee dah nídahatł'óoh dooleełígíí,

¹⁹áádóó éé' ts'ídá yá'át'éehgo ádaalyaago náá'iiłniihii dabi'ée'go hodiyingo haz'ą́ągi nidaal'a' doo biniyéhígíí, éí éé' dílzinii Éran náá'iiłniihii nilíinii índa biye'ké nááda'iiłniihii danilį́įgo yiih nídaakahgo shá nidaal'a' doo biniyéhígíí t'áá ałtso ádazhdoolííł.

²⁰Áko Ízrel dine'é t'áá ałtso Mózes yits'ą́ą́' anáhaaskai.

²¹Áko nidahaaskaii t'ááłá'í nítínígo bijéí nidabiił'náago bii' naazíinii bił dahóódlee'ígíí éí Bóhólníihii yich'į' náádayiiłniihii nidayiizhjaa'; éí níbaal bii' dahozdísinii bee hadidoolnííł áádóó biyi' náá'iiłniihii chodayooł'į́į dooígíí t'áá ałtso índa éé' dadílzinii bii' astį́įgo na'al'a' dooígíí ádeidoolííł biniyé nidayiizhjaa'.

²²Ákohgo diné áádóó asdzání nidahaaskaigo, t'ááłá'í nítínígo t'áá bí lą́ daniizį́'ígíí bik'ehgo ił dah nátį́hí áádóó jaatł'óół áádóó yoostsah áádóó béésh k'eet'oh índa óola bee ádaalyaaígíí t'áá ał'ąą ádaat'éii nidayiizhjaa'; diné t'ááłá'í nítínígo óola bee dahólónígíí éí Bóhólníihii yich'į' náádayiiłniihgo nidayiizhjaa'.

²³Áádóó éí t'ááłá'í jinítínígo yisdizii yá nahalingo dootł'izhígíí, tsídídééh nahalingo łichí'ígíí, łichxí'ígíí, áłts'óózígo yisdizígíí bee na'at'ą́hí łigaii dits'idgo ályaii, tł'ízí bighaa', deenásts'aa' bikágí daaldzą́ągo deilchii'ii índa nahashch'id bikágí díí hwee dahólóonii nidajiizhjaa'.

²⁴T'ááłá'í jinítínígo éí béésh łigaii áádóó béésh łitsoii hwee dahólónígíí Bóhólníihii baa dahizdeez'ánígíí nidajiizhjaa', áko Bóhólníihii baa nídahizdeez'ą́. Áádóó t'ááłá'í jinítínígo tsin nitł'izii hwee dahólónígíí chodeidoo'įįł biniyé nidajiizhjaa'.

²⁵Asdzání adiz yéédahósinii éí yisdizii yá nahalingo dootł'izhígíí áádóó tsídídééh nahalingo łichí'ígíí áádóó łichxí'ígíí índa áłts'óózígo yisdizígíí bee na'at' ą́hí łigaii dits'idgo ályaii hadayiizdizígíí nidayiizhjaa'.

²⁶Asdzání t'áá ałtso adiz yéédahósinii adiih ádaat'į́įgo tł'ízí bighaa' hadayiizdiz.

²⁷Índída diné nida'a'eeshígíí éí tsé ániks wolyéhígíí áádóó tsé da'ílíinii éí íífad wolyéii índa ayidgi dah sił tsooz dooígíí bikáa'gi bee nidaach'ąąhii nidayiizhjaa',

²⁸áádóó ak'ah bee hool'in dooígíí áádóó ak'ah ak'i yahiidzíidgo bee alzį́įhii índa tsin bijeeh dilidgo łikání halchinii bá spáis wolyéii nidayiizhjaa'.

²⁹Áko Ízrel dine'é t'áá bí ádeiniizį́į'go Bóhólníihii yaa nídeidiyiiz'áanii nidayiizhjaa'; diné danilíinii áádóó asdzání danilíinii t'ááłá'í nítínígo bijéí nidabiił'náago naanish t'áá ał'ąą ádaat'éii t'áá ałtso yiniyé t'áadoo le'é deeshjih danízinígíí Bóhólníihii t'áá Bí éí Mózes binahjį' yee haadzíi'ii bik'ehgo nidayiizhjaa'.

³⁰Áádóó Mózes éí Ízrel dine'é áyidííniid, Shoo, Bóhólníihii éí Yúrai biye' Biizáliyel wolyéii yiyíízhi'go néidiiłtį́. Yúrai éí Her biye' jílį́įgo Júdah bidine'é bits'ą́ą́dóó jílį́.

³¹Áádóó Biizáliyel bíni' bíighahgo Diyin God biNíłch'i Diyinii bii' hólǫ́ǫgo hóyą́ągo áádóó ak'idi'yiitįįhgo áádóó bił ééhózingo índa naanish ał'ąą ádaat'éii yiyiichįįhgo áyósin.

³²Áko na'ach'ąąh yindoolnishii yinaha'áa doo; éí óola áádóó béésh łigaii índa béésh łitsoii bee ázhdoolííł.

³³Tsé da'ílíinii bee hazhdidoolííł áádóó tsin nijik'ęęhgo bee nizhdooch'ąh biniyé hasht'ezhdoolííł, áko naanish ał'ąą ádaat'éii jiichįįhgo binizhdoolnish.

³⁴Bóhólníihii éí Biizáliyel índa Ahóliyab t'áá ájíłah ahozhniiyąądgo nazh'ntin áhoolaa; Ahóliyab éí Ahísamak biye' jílį́įgo Dan bidine'é bits'ą́ą́dóó jílį́.

³⁵Diyin God éí Biizáliyel índa Ahóliyab bíni' bíighahgo iichįįhgo át'é hwiindzin bii' hólǫ́ǫgo áyiilaa, áko éí nidilt'éego naanish ał'ąą ádaat'éii íidoolíiłgo ts'ídá t'áá át'éegi bił bééhózin silį́į́': éí atsidjí lá, na'ach'ąąh áádóó yisdizii yá nahalingo dootł'izhígíí áádóó tsídídééh nahalingo łichí'ígíí índa łichxí'ígíí áádóó áłts'óózígo yisdizígíí bee na'at'ą́hí łigaii dits'idgo ályaii biyi'jį' yistł'ǫ́ǫgo naashch'ąą'go atł'óó lá, áko t'áá ha'át'íhída yindoolnishii yiyiichįįh áádóó yinaha'áago binaanish ííł'į́.