Read Navajo EXODUS 37 Bible Online

EXODUS 37 - Navajo bible

EXODUS 37

¹Biizáliyel éí tsin nitł'izii bee tsits'aa' dílzinii áyiilaa; éí táadi ké siláádóó náhást'éí asdzoh áníłnééz áádóó naaniigo naakidi ké siláádóó táá' asdzoh áníłtéél índa dego naakidi ké siláádóó táá' asdzoh ánízah.

²Biyi'dę́ę́' áádóó bikáá'dę́ę́' óola t'áá bízhání bik'ésti'go áádóó bibąąhgóó óola ahééní'áago áyiilaa.

³Tsits'aa' dílzinii bitł'ááhdóó t'áá dį́į́'góó naanídaaz'áhígi ałch'ijí naakigo óola názbąsii yídeidiyiiłhį́į́'.

⁴Tsin nitł'izii níyizgo áyiilaa áádóó óola yik'íísti',

⁵áko tsits'aa' dílzinii booshk'iizhjí éí óola názbąsii bąąh dah sinilígíí tsin níyizii bee naat'áa doo biniyé bighá nátsih.

⁶Áádóó aa a'ááh hasinii bił haz'ánígi éí óola t'áá bízhání yee áyiilaa; éí táadi ké siláádóó náhást'éí asdzoh áníłnéezgo índa naaniigo naakidi ké siláádóó táá' asdzoh áníłtéelgo áyiilaa.

⁷Óola t'áá bízhání diyingo naal'a'í naakigo béé'élyaago chérabim wolyéii áyiilaa; hasht'e'nibízhníłne'go t'áá ła' bizhi'ee áyiilaa; aa a'ááh hasinii bił haz'ání bikáa'gi nineel'ánígi t'áá ałch'ishdę́ę́' sizį́.

⁸Łahjí nineel'ánígi chérab wolyéii t'ááłá'í sizį́, áádóó náánáłahjí nineel'ánígi chérab t'ááłá'í náánásdzį́; aa a'ááh hasinii bił haz'ánígi índa nineel'ą́ągi ałch'ishdę́ę́' chérabim sizínígíí bił t'áá ła' bizhi'ee áyiilaa.

⁹Aa a'ááh hasinii bił haz'ání bik'ijį' chérabim bit'a' dah yoołbał; aa a'ááh hasinii bił haz'áníjį' ałch'į' déez'į́į'go ałch'į' sizį́.

¹⁰Bikáá' adání ałdó' tsin nitł'izii yee áyiilaa; táadi ké silá áníłnééz, áádóó naaniigo t'ááłá'í ké siláádóó ná'áłníi'go áníłtéél, índa dego naakidi ké siláádóó táá' asdzoh ánízah;

¹¹óola t'áá bízhání yik'íísti'go ła' bibąąhgóó ahééní'áago áyiilaa.

¹²Dį́į́' yílá bik'eh áníłtéelgo bináz'áago índa óola éí bibąąh ahééní'áago áyiilaa.

¹³Dį́į́'góó naanídaaz'áhígíí biyaagi bijáád éí óola nídaazbąsgo dį́į'go yídeidiyiiłhį́į́'.

¹⁴Bináz'áhígíí bíighahgi tsin níyizii ii' ní'áago bee naat'áa doo biniyé óola názbąsii bąąh dah naaznil.

¹⁵Tsin nitł'izii bee tsin níyizii áyiilaa áádóó óola yik'íísti'; éí bikáá' adání bee naat'áa doo.

¹⁶Beedí éí bikáá' adání yikáá' niyiiznilígíí éí łeets'aa' niteelígíí áádóó tsin bijeeh dilidgo łikání halchinii bá łeets'aa' dooleełígíí áádóó ásaa' índa ásaa' nímazí bee yah iyiizíid dooígíí óola t'áá bízhání yee áyiilaa.

¹⁷Bee hool'iní bá yadaa'áhígíí éí óola t'áá bízhání yee áyiilaa. Óola hasht'e'nibízhníłne'go bá si'ánígíí áádóó dego bá yadaa'áhígíí áádóó bílátah dah na'azką́ągo ak'ah biih náhádzíid dooígíí áádóó éí bitł'ááh ní'deeskǫ'ígíí índa ch'ilátah hózhóón bee naashch'ąą'ii éí t'áá ła' bizhi'ee áyiilaa.

¹⁸Hastą́ągo ats'áda'az'á; bee hool'iní bá yadaa'áhígíí łahjí táá' bits'ání'á; náánáłahjí ałdó' táá' bits'ání'á;

¹⁹t'ááłá'ígo ats'áz'áhígíí álman wolyéii bílátah yiigahígíí táa'go ałkéé' honíką́ągo bee naashch'ąą'; bílátah haleehii áádóó yiigahígíí t'áá bił bee hool'iní bá yadaa'áhígíí hastą́ągo bits'ádaaz'áhígíí ákót'éego áyiilaa.

²⁰Bee hool'iní bá yadaa'áii dį́į'go ałk'i honíką́ągo álman wolyéego ch'ilátah hózhóón nahalingo yee neizhch'ąą'.

²¹Naakigo ałts'ą́ąjį' dadeez'áhígi t'áá táa'go bitł'áahgi nída'deeskǫ'go bił t'áá ła' bizhi'ee áyiilaa.

²²Ałts'ádaaz'áhígíí áádóó ałkéé' honíkánígíí éí bá yadaa'áhígíí bił t'áá ła' bizhi'ee áyiilaa; bee hool'iní t'áá át'é éí óola t'áá bízhání hasht'e'niyí'níłne'go t'áá ła' bizhi'ee áyiilaa.

²³Bee hool'inígíí tsosts'idgo áádóó kǫ' bee náhiniltsésí índa łeeshch'iih bee naakáhí éí óola t'áá bízhání yee áyiilaa.

²⁴Bee hool'iní bá yadaa'áii índa beedí chodao'íinii t'áá ałtso éí óola t'áá bízhání t'ááłá'í tálent dah hidiidloh bíighahgo yee áyiilaa.

²⁵Bikáá' náá'iiniihí bikáa'jį' tsin bijeeh dilidgo łikání halchinii nááhániih doo biniyéhígíí tsin nitł'izii yee áyiilaa; t'ááłá'í ké siláádóó ná'áłníi'go áníłnééz áádóó naaniigo t'ááłá'í ké siláádóó ná'áłníi'go áníłtéél, áko dik'ą́ągo áyiilaa; dego éí táá' ké silá ánízah; bidee' hadaaz'áhígíí bił t'áá ła' bizhi'ee áyiilaa.

²⁶Óola t'áá bízhání yik'ídeisti'; bikáá'dę́ę́' áádóó booshk'iizh naaz'áhígíí índa bidee' hadaaz'áhígíí ákóyiilaa, áádóó ałdó' bibąąhgóó óola ahénálch'ahgo áyiilaa.

²⁷Índa biyaagi t'áá ałch'ishjí tsin níyizii ii' ní'áago bee naat'á biniyéhígíí bá óola názbąsgo bąąh dah sinilgo áyiilaa.

²⁸Tsin nitł'izii níyizii áyiilaaígíí óola bik'ésti'go áyiilaa.

²⁹Dílzingo ak'ah ak'i yahiidzíidgo bee alzį́įhii índa spáis łikání ts'ídá nizhóníii bee tsin bijeeh dilidgo łikání halchinii áyiilaa; bił bééhózinii ałtahgo ííł'ínígi át'éego áyiilaa.