Read Navajo EXODUS 4 Bible Online

EXODUS 4 - Navajo bible

EXODUS 4

¹Áko Mózes ánáádoo'niidgo ání, Nidi shoo, doo dashoodlą́ą da doo; doo dashíists'ą́ą' da doo, áko ádadidooniił, Bóhólníihii yee' doo nich'į' yit'íní í'diilyaa da.

²Bóhólníihii áhodííniid, Ha'át'íísh dah yítį́į́ł? Áko ázhdííniid, Gish át'é.

³Áko ánááhodoo'niid, Ni'jį' aniłt'e'. Ákohgo ni'jį' ajííłt'e', nít'éé' tł'iish silį́į'go bits'ą́ąjį' Mózes yáájiiltáál.

⁴Nidi Bóhólníihii éí Mózes áyidííniid, K'ídílchíidgo bitsee' yiiłtsóód. T'áá áko yiyiiłtsoodgo bílák'eejį' gish násdlį́į́'.

⁵Áko danihizhé'é yę́ę biBóhólníihii Diyin God, Éíbraham biDiyin God áádóó Áízak biDiyin God índa Jéíkab biDiyin God nich'į' yit'íní í'diilyaago deidoodląął.

⁶Náá'áłdó' Bóhólníihii ánááhodoo'niid, Nijéíts'iinjį' át'adílnííh. Áko hajéíts'iinjį' át'azhdoolnii' áádóó háázhdoolnii' nít'éé'; łóód ats'íís yiyáanii naałdzidii bee hála' yas nahalingo yiigaii lá.

⁷Áádóó Diyin God ánááhodoo'niid, Nijéíts'iinjį' át'anáádílnííh. Áko át'anáázhdoolnii' áádóó hanínáázhdoolnii', nít'éé' t'áá hatsį' yę́ęgi át'é násdlį́į́' lá.

⁸Diyin God ánáádoo'niid, Doo danoodlą́ą́góogo, doodaii' átsé bee ééhózinii doo dayoodlą́ą́góó akée'di bee ééhózinii deizhdoodląął.

⁹Díí naakigo bee ééhózinii íinilaa nidi, doo dayoodlą́ą́góó índa doo daníists' ą́ą́'góó toohdę́ę́' tó ła' nídííkáałgo ni' hóółtseijį' yeidííził. Áko toohdę́ę́' tó nídinikánígíí hóółtseijį' yeiniziidígíí éí dił dooleeł.

¹⁰Nidi Mózes éí Bóhólníihii áyidííniid, Shoo, Bóhólníihii, t'áá shiidą́ą'dii shí doo ayóogo yáshti' da; ts'ídá átsé ná naal'a'í nishłíinii shich'į' háínídzíí' yę́ędóó nidi ch'ééh haasdziih; saad shił nantł'a.

¹¹Áko Bóhólníihii ánááhodoo'niid, Háishą' éí diné bizéé' áyiilaa? Háishą' diné doo yádaałti'góó, doodaii' bijédaahkałgo, doodaii' da'oo'į́įgo, doodaii' doo da'oo'į́į́góó ádeile'? Jó, shí Bóhólníihii nishłíinii ákó'eeshłííł.

¹²Éí bąą k'ad nílááh, ákǫ́ǫ́ dínááh; nił honishłǫ́ǫgo yániishti' doo, áko bee hahidíídzihígíí bínaninishtin doo.

¹³Nidi ázhdííniid, Shoo, shiBóhólníihii nílíinii, nánooshkąąh, t'áá háiidago díł'á.

¹⁴Áko Bóhólníihii éí Mózes yich'į' báhóóchįįdgo ání, Shą́ą́', Éran, Líívai dine'é nilíinii nínaaí nilį́; éí shił bééhózingo yá'át'éehgo yáłti'go bizaad nizhóní; jó, áádę́ę́' nidááh doogááł, áko niiłtsą́ągo t'áá íiyisí nąąh bił hózhǫ́ǫ doo.

¹⁵Áko bich'į' hadíídzihgo saad yee hahidoodzihígíí baa dadíísįįł, áko éí yee hahidoodzih; nizaad índa bizaad bił honishłǫ́ǫ doo, áko baa naah'aash dooleełígíí bínanihinishtin doo.

¹⁶Hó diné bich'į' ná yájíłti' doo, áko azéé' ná jílį́į doo áádóó ni éí Diyin God nahalingo há sínízį́į doo.

¹⁷Áko díí gish yítį́į́ł; bee éédahózinii bee áníł'į́į doo.

¹⁸Mózes dah nízdiidzá áádóó baadaaní jílíní Jéthro baa nidzídzáago ábizhdííniid, Baa nánooshkąąh, Ííjip kéyahdi shik'éí kéédahat'íinii bich'į' nídeeshdááł; t'ah daats'í dahiná shił bééhodoozįįł. Áko Jéthro éí Mózes áyidííniid, Nílááh hózhǫ́ǫgo yínááł.

¹⁹Áko Bóhólníihii éí Mídiyan hoolyéedi Mózes áyidííniid, Ííjip kéyahgóó nihéénídááh, háálá diné nida'niiłhį́į́ nít'éé' yę́ę ałtso daneezná.

²⁰Ákohgo Mózes hwe'asdzą́ą́ bił áádóó haye'ké éí télii dabíyeehgo Ííjip kéyahgóó dashdiikai. Mózes éí Diyin God bigish jootį́į́ł.

²¹Áko Bóhólníihii éí Mózes áyidííniid, Ííjip kéyahdi néínídzáago bik'ee t'óó ayóigo áhooníiłii nílák'edíí'ánígíí Féro binááł ádadííliił, nidi Féro bijéí deestł'isgo diné doo yéé'doołnih da.

²²Áko Féro ábididííniił, Bóhólníihii kóní, Ízrel shiye' alą́ąjį' yizhchíinii jílį́.

²³Áko ándishní, Shiye' shich'į' nahałáa doo biniyé béé'níłnííh; doo béé'níłnííhgóó, jó, niye' alą́ąjį' yizhchíinii nits'ą́ą́' diyeeshxééł.

²⁴Níjookahgo nída'njahgi jíkaigo Bóhólníihii haa honíle'go hodiyeeshxééł, hó'ní.

²⁵Ákohgo Zipórah éí tsé deeníinii nízhdii'ą́ągo hayáázh yee alizhígíí bikágí bílátah ahéézhníłgizhgo Mózes bikétsį́įjį' ajiyííłhan, áko ázhdííniid, Ni éí shá ahastiin diłii nílį́.

²⁶Áko Diyin God éí Mózes t'óó yik'i deeyá áádóó ąąh náhinilgish biniinaa hwe'asdzą́ą́ ání, Ni éí shá ahastiin diłii nílį́.

²⁷Bóhólníihii éí Éran áyidííniid, Nílááh honoojíidi Mózes bidááh nínááh. Áko dashdiiyáago Diyin God bidziłdi Mózes bidááshníyáago dzizts'ǫs.

²⁸Áádóó Mózes éí Bóhólníihii bizaad t'áá ałtso yił honíł'a'ígíí índa bee ééhózinii t'áá ałtso áálíił doo hodííniidígíí bee Éran bił hojoolne'.

²⁹Áko Mózes éí Éran bił dashdii'áazhgo Ízrel dine'é yá aląąjį' naazíinii t'áá ałtso áłah ájiilaa.

³⁰Áko Éran éí Bóhólníihii bizaad t'áá át'é Mózes yich'į' yee hahaasdzíi'ii bee hadziisdzíí', áádóó bee éédahózinii diné binááł ííshją́ą́ ádajiilaa.

³¹Áko diné da'oosdląąd, áádóó Bóhólníihii éí Ízrel dine'é yaa honíle'ígíí índa ti'dahooníihgo yaa ákoniizį́'ígíí yaa dahodiizts'ą́ą́', ákohgo yaa ádaadzaago yich'į' nidahasá.