Read Navajo EXODUS 5 Bible Online

EXODUS 5 - Navajo bible

EXODUS 5

¹Áádóó bik'ijį' Mózes éí Éran yił Féro yaa ní'áazhgo áyidííniid, Bóhólníihii éí Ízrel biDiyin God kóní, Shidine'é béé'níłnííh; éí honoojíidi hodílzingo áłah nídaadleehgo shich'į' nidahodoołaał.

²Nidi Féro ání, Háishą' Bóhólníihii nilį́įgo bizaak'eh honish'į́įgo Ízrel dine'é béé'deeshnih. Bóhólníihii bidinínígíí doo bééhasin da, índa doo t'áá k'ad Ízrel béé'níłnii' da.

³Áko ázhdííniid, Hííbrew dine'é biDiyin God nihaa honíle', áko baa nániikąąh; niha'di'ní'aahgo honoojíígóó tágí jį́ oonééł ánízahjį' nidiikah, áadi Bóhólníihii nihiDiyin God bich'į' náádadi'yiilnih, doodago éí naałniih índa diltłish yee atínihidoolííł.

⁴Nidi Ííjip dine'é aláahgo binanit'a'í áháłní, Mózes índa Éran nohłíinii, ha'át'íísh biniyé diné naanish bits'áhóhnííł? Nihílááh, naałnish.

⁵Áko Féro ánáádoo'niid, Jó, k'ad kéyah biyi' diné t'óó ahóóyóí índa binaanish bits'ą́ą́' ni'kółééh.

⁶Áko t'áá éí bijį́ Féro éí naanish binanit'a'í danilíinii índa bik'ehgo nida'anishí yich'į' haadzíi'go ání,

⁷K'ad kodóó tł'oh naadą́ą́' bitsǫz bis bił ál'íní átséédą́ą́' ádaał'ínę́ęgi át'éego diné t'áadoo baa náádahołjoołí; bíni'dii t'áá bí tł'oh naadą́ą́' bitsǫz ádá ninádayiiłjooł.

⁸Nidi bis átséédą́ą́' ánéelt'e' yę́ę t'áá ákónéelt'e'go ádeile' doo; t'áá bich'į'go éí dooda, háálá yídadiiłgisgo kódaaní, NihiDiyin God bich'į' náádadi'yiilnih biniyé nihéé'níłnííh.

⁹Bíni'dii naanish bidziilii bich'į' diné bídaałnáago éí ts'ídá yéego nidaalnishgo ádeínóhsin. Áko saad t'áá ádzaaí doo yaa áńdahodílt'į́į da doo.

¹⁰Áádóó naanish binanit'a'í danilíinii índa bik'ehgo nida'anishí ch'íkaigo diné ádeidííniid, Féro kóní, Tł'oh naadą́ą́' bitsǫz doo nihaa náádeeshjoł da.

¹¹Nihílááh t'áá nihí tł'oh naadą́ą́' bitsǫz hádaaht'į́, nidi nihinaanishígíí doo nihá bi'oh áńdoolníił da.

¹²Áko Ííjip kéyahgóó t'áá át'éé nít'éé' diné nihinéést'e'go tł'oh naadą́ą́' bitsǫz bits'ásk'ehgi behégod áłah ánáádajidle'.

¹³Naanish binanit'a'í danilíinii yídahoniłkadgo ádaaní, Tł'oh naadą́ą́' bitsǫz nihaa dahiiljołgo bindashoołnish yę́ęgi át'éego nihinaanish ádaał'į́.

¹⁴Ízrel dine'é bik'ehgo nida'anishígíí éí Féro bá nidaal'a'í naanish bee bídahólníihgo nidahas'nilígíí nídahoneesxaalgo hach'adahashkéego ádahodííniid, Haa néelt'e'go bis áńdaa ł'įįh yę́ę ha'át'éegoshą' adą́ą́dą́ą́' áádóó jį́į́dą́ą́' t'áadoo ákónéelt'e' ádaohłaa da?

¹⁵Ákohgo Ízrel dine'é bik'ehgo nida'anishí Féro yaa yíkaigo ádeiłní, Ha'át'éegoshą' ninaal'a'í daniidlíinii kónihiinilaa?

¹⁶Ninaal'a'í daniidlíinii doo tł'oh naadą́ą́' bitsǫz nihaa haljooł da, nidi bis ádaahłe' danihiłní; jó, ninaal'a'í daniidlíinii nídanihidi'neesghaal, nidi t'áá ni nidine'é bada'át'e'ii ádaat'é.

¹⁷Nidi Féro ádííniid, Jó, bídadoołgis, bídadoołgis; éí bąągo ádadohní, Nihíni'dii nihéé'nółníihgo Bóhólníihii bich'į' náádadi'yiilnih.

¹⁸Nidi k'ad nihílááh, háálá tł'oh naadą́ą́' bitsǫz doo ła' nihaa náádadooljoł da, nidi bis t'áá ákódanéelt'e'go ádaahłe'.

¹⁹Ízrel bidine'é bik'ehgo nida'anishígíí bis t'áá ákwíí jį́ ádaahłe' nít'éé' yę́ę t'áadoo bi'oh ánéelt'e'go ádaahł e'í, hodoo'niidgo t'áá íiyisí hach'į' nidahwii'náago baa ákodazniizį́į́'.

²⁰Féro bits'ą́ą́' ch'ééjíkaigo Mózes áádóó Éran haba' sizį́įgo baa jíkai.

²¹Áko ádahodííniid, Bóhólníihii éí nihiníł'į́įgo nihá nihwii'aah, háálá Féro áádóó bá nidaal'a'í nihik'ijį' bá dahoołchįįd. K'ad t'óó diltłish yee nidanihidoołtsiłgo óołaa.

²²Áko Mózes éí Bóhólníihii bich'į' nínáádziisdzáago ábijiní, Bóhólníihii, ha'át'íishą' biniyé díí diné bich'į' nidahwii'náago íinilaa? Ha'át'íishą' biniyé kojį' ashííníł'a'?

²³Jó, Féro baa níyáago nízhi' binahjį' bich'į' hahásdzíí'dóó wóshdę́ę́' doo aaníinii yee diné atííł'į́įgo yaa nídiidzá, doo nidi nidine'é yisdáníníił da.