Read Navajo EXODUS 6 Bible Online

EXODUS 6 - Navajo bible

EXODUS 6

¹Ákohgo Bóhólníihii éí Mózes áyidííniid, K'ad Féro áhodeeshłíłígíí dínííł'įįł, háálá yílá bidziilii bee béé'doolnih, índa ts'ídá yílá bidziilii bee bikéyahídóó ch'íhodínóołkał.

²Áko Diyin God éí Mózes áyidííniid, Shí Bóhólníihii nishłį́.

³Éíbraham áádóó Áízak índa Jéíkab shízhi' Diyin God Aláahgo Ayóó'ábóodziilii bee bich'į' ííshjání í'diishyaa, nidi Bóhólníihii shízhi' nilį́įgo t'áadoo bee bich'į' ííshjání í'diishyaa da.

⁴Áádóó ałdó' chánahgo bił ahadadi'nisht'ą́ągo Kéínan kéyah nihaa dideesh'ááł, bidííniid ni'; t'áá éí kéyah t'óó átsééd yikáá' naasdee'go dé'éyóní danilį́į́ nít'éé' yę́ę baa dideesh'áałgo bee haasdzíí'.

⁵Áádóó Ízrel dine'é éí Ííjip dine'é binaalte' dajílį́įgo nidazhdi'ni'go diséts'ą́ą́', nidi bił ahadadi'nisht'áanii bénáshniih.

⁶Éí bąągo Ízrel dine'é kóbididííniił, Shí Bóhólníihii nishłį́, áko Ííjip dine'é naanish yídanihiniłkadgo atídanihił'į́į́dóó ch'ínihideesh'ish, áádóó binaalte' danohłínídóó dah nihidideesh'ishgo ts'ídá bidziilgo índa ayóó át'éego baa nídéesht'įįłii bee nihik'é niná'deeshdlééł.

⁷Áko shidine'é danohłį́į doo áádóó shí nihiDiyin God nishłį́į doo índa shí Bóhólníihii nihiDiyin God éí Ííjip dine'é naanish yídanihiniłkadgo atídanihił'į́ yę́ędóó ch'ínihiní'eezhii nishłį́įgo nihił béédahodoozįįł.

⁸Áko kéyah biih nihideesh'ishígíí éí Éíbraham áádóó Áízak índa Jéíkab ts'ídá baa dideesh'áałgo bich'į' bee ádee hahidísdzíi'ii nihaa dideesh'áałgo nihíí' dooleeł. Shí Bóhólníihii nishłį́.

⁹Mózes éí kónááhá'ní níigo Ízrel dine'é yich'į' yáłti', nidi Mózes doo dayíists'ą́ą' da, háálá t'áá íiyisí bąąh nidahwiizkaadgo naalte' danilį́įgo naanish yąąh niikááh.

¹⁰Áko Bóhólníihii éí Mózes ánéidoo'niidgo ání,

¹¹Nihílááh, Ííjip dine'é aláahgo binanit'a'í Féro bił yah ooh'aashgo kóbidohní, Nikéyahdóó Ízrel dine'é béé'níłnííh.

¹²Mózes éí Bóhólníihii áyidííniid, Jó, Ízrel dine'é doo dashíists'ą́ą' dago haash yit'éego Féro shíists'ą́ą' doo, háálá saad doo sheiszįįd da?

¹³Nidi Bóhólníihii éí Mózes áádóó Éran áyidííniid, Ízrel dine'é índa Ííjip dine'é aláahgo binanit'a'í Féro bich'į' hadoohdzih, Ííjip kéyahdóó Ízrel dine'é ch'ídiit'ish, bididoohniił.

¹⁴Díí dabizhé'é yę́ę dabighandóó alą́ąjį' nidaakaii: Ízrel bá alą́ąjį' yizhchínígíí Rúben wolyéii biye'ké éí Héínak áádóó Pállu áádóó Hézran índa Kármai daolyé. Díí Rúben ba'áłchíní ádaat'į́.

¹⁵Símiyan biye'ké éí Jíímuwel áádóó Jéímin áádóó Óhad áádóó Jéíkin áádóó Zóhar índa Shéíyal daolyé. (Shéíyal bimá éí Kéínan dine'é asdzání nilį́.) Díí Símiyan ba'áłchíní ádaat'į́.

¹⁶Díí Líívai biye'ké náás ahoolchíłígíí kódaolyé: Gérshan áádóó Kóhath índa Miirárai, áko Líívai bíídíiską́ą́dóó neeznádiindóó ba'aan tádiindóó ba'aan tsosts'id binááhai.

¹⁷Gérshan biye'ké éí Líbnai índa Shímiyai wolyé.

¹⁸Kóhath biye'ké éí Ámram áádóó Ízxar áádóó Hííbran índa Azáíyel daolyé. Kóhath bíídíiską́ą́dóó neeznádiindóó ba'aan táá' binááhai.

¹⁹Miirárai biye'ké éí Málai áádóó Múshai wolyé. Díí Líívai ba'áłchíní náás ahoolchíłígíí ádaat'į́.

²⁰Ámram éí hazhé'é bilah Jákebed hwe'asdzą́ą́ ájiilaa, áko Éran áádóó Mózes yishchį́. Ámram bíídíiską́ą́dóó neeznádiindóó ba'aan tádiindóó ba'aan tsosts'id binááhai.

²¹Ízxar biye'ké éí Kórah áádóó Níífeg índa Zíkrai daolyé.

²²Azáíyel biye'ké éí Mísheiyel áádóó Élzefan índa Zítrai daolyé.

²³Amínadab bitsi' éí Néíshan bilah nilíinii Iiláísheba wolyéii Éran be'asdzą́ą́ silį́į́'. Áko Néídab áádóó Abáíhu áádóó Eliyéízar índa Íthamar díí Éran yá niyiishchį́.

²⁴Kórah biye'ké éí Áser áádóó Elkéínah índa Iibáíyasaf daolyé. Díí Kórah dine'é ba'áłchíní ádaat'į́.

²⁵Éran biye' Eliyéízar éí Pútiyel bitsi'ké ła' be'asdzą́ą́ áyiilaa, áko Fíniyas yishchį́; díí Líívai dabizhé'é yę́ę bighandóó alą́ąjį' nidaakaii ba'áłchíní ádaat'į́.

²⁶Éran áádóó Mózes lą́ą Bóhólníihii kóhodííniid, Ízrel dine'é t'áá dah deínéhígíí bik'ehgo Ííjip kéyahdóó bił ch'ídoohnééł.

²⁷Ííjip dine'é aláahgo binanit'a'í Féro Ííjipdę́ę́' Ízrel dine'é ch'ídoot'ishgo bee bich'į' yájííłti'ígíí éí díí Mózes áádóó Éran ájít'į́.

²⁸Ííjip kéyahdi Bóhólníihii éí Mózes yich'į' haadzíí' yę́ędą́ą́'

²⁹Bóhólníihii éí Mózes áyidííniid, Shí Bóhólníihii nishłį́; nich'į' hahásdzí'ígíí t'áá ałtso Ííjip dine'é aláahgo binanit'a'í Féro bee bił hólne'.

³⁰Nidi Mózes éí Bóhólníihii binááł ájíní, Shoo, shí éí saad doo sheiszįįd da, ákoshą' haash yit'éego Féro shíists'ą́ą' doo?