Read Navajo EXODUS 7 Bible Online

EXODUS 7 - Navajo bible

EXODUS 7

¹Áko Bóhólníihii éí Mózes ánéidoo'niid, Jó, Féro bich'į'go diyin bidi'níinii ániishłaa áádóó Éran nik'is éí ná halne'ii nilį́į doo.

²Bee nich'į' haasdzí'ígíí t'áá ałtso bee yáníłti' doo índa Éran nik'is éí Féro yich'į' yáłti'go hakéyahdóó Ízrel dine'é béézh'doołnih.

³Nidi shí éí Féro bijéí deestł'is áádóó shibee éédahózinii índa shibik'ee t'óó ił ahayóii Ííjip kéyahgi k'ee'ąą yilzhishgo ádeeshłííł.

⁴Féro doo nihíists'ą́ą' da doo, áko Ííjip dine'é bik'ijį' dah deesh'nihgo áádóó shidine'é dah deínéehii t'áá éí shidine'é, Ízrel dine'é danilíinii biniinaa ts'ídá ayóó át'éego haa nídéesht'įįłgo bee Ííjip kéyahdóó ch'ídeesh'ish.

⁵Shí Bóhólníihii nishłį́įgo Ííjip dine'é hoł béédahodoozįįł biniyé Ííjip kéyah bik'ijį' dah didiish'nii'go hatahdę́ę́' Ízrel dine'é ch'ídeesh'ish.

⁶Áko Mózes áádóó Éran éí Bóhólníihii hach'į' yee haadzí'ígíí bi'jiilaa.

⁷Ákohgo Mózes tseebídiin binááhai; Éran éiyá tseebídiindóó ba'aan táá' binááhai; íídą́ą́' Féro bich'į' hadziisdzíí'.

⁸Áádóó Bóhólníihii éí Mózes áádóó Éran áyidííniid,

⁹Féro ánihididooniił, Haa'íyee' t'áá nihí álílee ayóó át'é ááníiłii óhłééh, ákohgo Éran kóbididííniił, Nigish nídiitįįhgo Féro biyaajį' aniłt'e', áko tł'iish dooleeł.

¹⁰Mózes éí Éran bił dashdii'áazhgo Féro baazhní'áázh, áko Bóhólníihii t'áá hach'į' yee haadzí'ígíí bi'jiilaa, áko Éran bigish éí Féro áádóó bá nidaal'a'í biyaajį' ayííłt'e'go tł'iish silį́į́'.

¹¹Ákohgo Féro éí diné dahóyáanii índa álíleego áda'ooł'įįłii hágo yidííniid; éí Ííjip kéyahdóó ayóó át'éego álílee k'ehgo ída'oolíiłii danilį́, áko éí na'adlo'go álílee k'ehgo ída'ooł'įįłii ałdó' ákóda'iilaa.

¹²Háálá diné t'ááłá'í danítínígo dabigish ni'jį' ádayiist'e'go tł'iish ninádahaasdlį́į́', nidi Éran bigish éí dahagish ałtso ayiis'na'.

¹³Nidi Bóhólníihii éí Féro yijéí yiyííłtł'isgo Féro doo hwíists'ą́ą' da; Bóhólníihii ádííniidígi ádziidzaa.

¹⁴Áko Bóhólníihii éí Mózes áyidííniid, Féro bijéí yítł'isgo diné doo yéé'doołnihgóó yee nidooltih.

¹⁵Nílááh, t'ah abínídą́ą́' gish éí tł'iish silį́į́' nít'éé' yę́ę yítį́įłgo Féro baa díínááł; éí tóógóó deeyá, áko toohgi jiníyáajį' tooh bibąąhgi biba' sínízį́į doo.

¹⁶Áko ábididííniił, Bóhólníihii, Hííbrew dine'é biDiyin God nilíinii, nich'į' shiníł'a' kóníigo, Shidine'é béé'níłnííh, áko éí honoojíidi shich'į' nidahałáa doo, jó'akon, nidi t'ahdii doo shíísíníłts'ą́ą' da.

¹⁷Bóhólníihii kóní, Kót'éego Bóhólníihii nishłį́įgo nił bééhodoozįįł: jó, gish dah yishtį́łígíí bee tooh nídideeshxałgo dił dooleeł.

¹⁸Áko tooh bii' łóó' dínóonééł, áádóó tooh niłchxon dooleeł, áko Ííjip dine'é tó yidlánígíí deidoo'įį ł.

¹⁹Áko Bóhólníihii éí Mózes áyidííniid, Éran ábididííniił, Ííjip haz'ą́ągi tó dadeezlínígíí áádóó tooh danílínígíí áádóó be'ak'id dah naazyínígíí índa tó naazyínígíí dił dadooleeł biniyé bikáá'góó nigish bił dah didiilnííh, áko Ííjip kéyahgi t'áá át'éé nít'éé' dił hólǫ́ǫ doo; azhą́ tsin łeets'aa' índa tsé łeets'aa' tó dabiyi'ígíí t'áá át'é dił dadooleeł.

²⁰Mózes áádóó Éran hach'į' Bóhólníihii haadzí'ígíí bi'jiilaa. Táłkáá'góó gish yił dah didiilnii'go Féro áádóó bá nidaal'a'í dabinááł tooh néidííłhaal, áko ałtso dił silį́į́'.

²¹Áko tooh biyi' łóó' daneezná áádóó tooh niłchxon silį́į́', áko Ííjip dine'é toohdóó tó doo dayódlą́ą́' át'ée da, índa Ííjip kéyahgi tó ałtso dił daazlį́į́'.

²²Nidi Ííjip kéyahdóó álíleego áda'ooł'įįłii be'álííl yee t'áá ákóda'iilaa, ákohgo Bóhólníihii ádííniidígi áhoodzaa. Féro bijéí t'ahdii nitł'izgo doo hwíists'ą́ą' da.

²³Áko Féro názyizgo t'óó yah anáádzá; díigi ádzaago t'áadoo nidi bijéí bidiisnáa' da.

²⁴Áko Ííjip dine'é t'áá ałtso tooh bibąąhgóó tó doodlį́įłii yíka'da'ageed, háálá tooh nílínígíí doo dayódlą́ą́' át'ée da.

²⁵Bóhólníihii éí tooh néidííłhaaldóó bik'ijį' tsosts'id yiską́.