Read Navajo EXODUS 8 Bible Online

EXODUS 8 - Navajo bible

EXODUS 8

¹Ákohgo Bóhólníihii éí Mózes áyidííniid, Nílááh, Féro bił yah anináahgo ábidiní, Bóhólníihii kóní, Shidine'é béé'níłnííh, áko shich'į' nidahałáa doo.

²Nidi doo béé'níłnííhgóó, jó, nihił hahoodzojį' ch'ał deeshłąął.

³Tooh biyi'dóó ch'ał t'óó ahayóí hadoołnihgo nikin góne' áádóó nítééh góne' índa nitsásk'eh bikáa'jį' adooldah; ná nidaal'a'í dabighan góne' yah adooldah, áádóó dine' é bik'iidooldah; danihibááh bighan góne' índa nihibii'tááda'oo'nihí biyi' góne' ahidooldah.

⁴Ch'ał nihik'iidooldah; nidine'é índa ná nidaal'a'í t'áá ałtso bik'iidooldah.

⁵Áko Bóhólníihii éí Mózes áyidííniid, Éran kóbidiní, Tooh danílínígíí áádóó tó dadeezlínígíí índa beda'ak'id bich'į' nigish bił dah didiilnííh, áko Ííjip kéyah bikáá'góó ch'ał dooląął.

⁶Ákohgo Ííjip kéyahgi tó yich'į' Éran bigish yił dah didiilnii', áko áádę́ę́' ch'ał haaldee'go Ííjip kéyah ałtso yik'i diilkǫ'.

⁷Áko álíleego áda'ooł'įįłii beda'álííl yee t'áá ákónááda'iidlaa, áko Ííjip kéyahjį' ch'ał nááníłnii'.

⁸T'áá áko Féro éí Mózes áádóó Éran hágo yidííniidgo ání, Bóhólníihii shá néinikąąh, shí áádóó shidine'é bił nihits'ą́ąjį' ch'ał nahgóó kónéidoodlííł, áko diné béé'deesh'nihgo Bóhólníihii yich'į' nááda'di'yoołnih.

⁹Áko Mózes éí Féro áyidííniid, Ná ashja'óhsingo ni áádóó ná nidaal'a'í índa nidine'é nihá Bóhólníihii néideeshkąął, áko nihighan haz'ánígóó ch'ał nihik'óoznánígíí ałtso ádooldįįł, áko tooh t'éí yii' hólǫ́ǫ doo.

¹⁰Áko Féro ání, Yiską́ągo lą́ą. Áádóó Mózes ánáázhdoo'niid, T'áá háínídzí'ígi át'ée doo, áko díí nił bééhodoozįįł: t'áadoo ła' Bóhólníihii nihiDiyin God át'éhígi át'éhí da.

¹¹Áko ch'ał nihik'óoznánígíí éí ni lá áádóó danihighandóó áádóó ná nidaal'a'í índa nidine'é bits'ą́ąjį' anídoołnih, áko toohdi t'éí hólǫ́ǫ doo.

¹²Mózes áádóó Éran éí Féro bits'ą́ą́' ch'ízhní'áázh, áko Féro bik'ijį' ch'ał yiníłnii'ígíí biniinaa Mózes éí Bóhólníihii náyookąąh.

¹³Áko Bóhólníihii éí Mózes náhooskanígíí bi'jiilaago daakingóó áádóó kin dah naazhjaa'góó índa anída'azt'i'góó ch'ał ałtso daneezná.

¹⁴Áko ch'ał t'ááłáhíjį' yáádaa'áago ádayiilaa áádóó kéyah t'áá íiyisí hółchxon silį́į́'.

¹⁵Áko Féro bik'i hooldogo bił bééhoozingo bijéí náánáátł'isgo doo nááhwíists'ą́ą' da; Bóhólníihii ádííniidígi áhoodzaa.

¹⁶Áko Bóhólníihii éí Mózes áyidííniid, Éran kóbidiní, Nigish bił dah náádidiilníihgo łeezh dibahí nídiiłhaał, áko éí Ííjip kéyahgi t'áá át'éé nít'éé' yaa' dooleeł.

¹⁷Áádóó t'áá áho'doo'niidígi ádziidzaa; Éran hagish bił dashdidiilnii'go łeezh dibahí nízhdííłhaalgo łeezh dibahí yaa' daazlį́į́'. Diné bikáá'góó índa naaldlooshii bikáá'góó łeezh dibahí t'áá át'é yaa' daazlį́į́'. Ííjip kéyahgi t'áá át'éé nít'éé' ákódzaa.

¹⁸Áko álíleego áda'ooł'įįłii beda'álííl yee t'áá ákóda'alééh nít'éé'; ch'ééh ádáát'įįdgo t'áadoo yaa' hazlį́į' da, áko diné áádóó naaldlooshii éí yaa' baa níłnii'.

¹⁹Ákohgo álíleego áda'ooł'įįłii éí Féro ádeidííniid, Díí Diyin God bíla' yee át'į́į́ lá, nidi Féro bijéí yítł'isgo doo hwíists'ą́ą' da; Bóhólníihii ádííniidígi áhoodzaa.

²⁰Áko Bóhólníihii éí Mózes áyidííniid, T'ah abíínídą́ą́' nídidíí'nahgo toohgi Féro níyáago bidááhdę́ę́' nidíínááł, háálá tóógóó deeyá, áko ábididííniił, Bóhólníihii kóní, Shidine'é béé'níłnííh, áko shich'į' nidahałáa doo.

²¹Doodaii', shidine'é doo béé'níłnííhgóó, jó, ni áádóó ná nidaal'a'í áádóó nidine'é índa danihighan góne' tsé'édǫ́'ii nihił dah nída'asołgo ádeeshłííł, áádóó Ííjip dine'é dabighan góne' tsé'édǫ́'ii bił dah nída'asoł doo índa ni'góó nidi ałk'ída'asoł doo.

²²Áko éí bijį́ Góshen kéyahgi shidine'é kéédahat'ínígíí ats'ádeesh'áałgo áadi tsé'édǫ́'ii doo bił dah nída'asoł da doo, áko nahasdzáán bikáa'gi shí Bóhólníihii nishłį́įgo nił bééhodoozįįł.

²³Áko shidine'é índa nidine'é doo aheełt'éego bił haz'ą́ą́góó ádeeshłííł; yiską́ągo díí bee ééhózinii ádoolnííł.

²⁴Áádóó Bóhólníihii ákó'iilaa, áko Féro bikin góne' áádóó bá nidaal'a'í dabighan góne' índa Ííjip kéyah t'áá át'éé nít'éé' t'óó báhádzidígi ánéelą́ą'go tsé'édǫ́'ii haalzhiizh, áko tsé'édǫ́'ii haalzhiizhgo bee hóóchxǫ'.

²⁵Áko Féro éí Mózes índa Éran yíká ádííniid, Nihílááh, t'áá nihiDiyin God bich'į' díí kéyahgi nááda'iyołniih.

²⁶Áko Mózes ádííniid, Ákódeiidzaago doo beełt'ée da, háálá Bóhólníihii nihiDiyin God bich'į' nááda'iyeelnii'go éí Ííjip dine'é t'óó baa'ihígi yaa nitsídaakees doo. Jó, nihí Ííjip dine'é binááł náádahiilnii'ígíí t'óó baa'ihgo yaa nitsídaakeesígíí biniinaa nihił nidazdiyoołniił.

²⁷Nihí honoojíígóó tágí jį́ oodááł bíighahgóó dii'nééł; áadi Bóhólníihii nihiDiyin God bich'į' náádadi'yiilnih t'áá nihich'į' yee haadzí'ígi ádadii'nííł.

²⁸Áko Féro ádííniid, Nihéé'deeshnih lą́ą, áko honoojíidi Bóhólníihii nihiDiyin God bich'į' náádadi'yoołnih, nidi t'áá íiyisí nízaadgóó éí doo adoohnéeł da. Shá ná'iidííkąął.

²⁹Áko Mózes ádííniid, Jó, nits'ą́ą́' ch'ééníshdááh áádóó Bóhólníihii néideeshkąąłgo tsé'édǫ́'ii éí Féro áádóó bá nidaal'a'í índa bidine'é bits'ą́ąjį' yiską́ągo yóó'anídooldah, nidi t'ááká Féro nihináá'dóleehgo t'áadoo Ízrel dine'é éí Bóhólníihii yich'į' nááda'ayółniih da lágo.

³⁰Áko Mózes éí Féro yits'ą́ą́' ch'íníyáago Bóhólníihii náyooskan.

³¹Áko Bóhólníihii éí Mózes náhooskanígíí bi'jiilaago tsé'édǫ́'ii bił dah nída'asołígíí Féro áádóó bá nidaal'a'í índa bidine'é yits'ą́ąjį' iinííłkaad; t'ááłá'í nidi doo ła' t'áá ákǫ́ǫ da.

³²Nidi náá'áłdó' Féro bijéí náánáátł'isgo bąą t'áadoo diné yéé'níłnii' da.