Read Navajo EXODUS 9 Bible Online

EXODUS 9 - Navajo bible

EXODUS 9

¹Ákohgo Bóhólníihii éí Mózes áyidííniid, Féro bił yah anináahgo bił hólne', Hííbrew dine'é biBóhólníihii Diyin God kóní, Shidine'é béé'níłnííh, áko shich'į' nidahałáa doo.

²Áko doo t'áá k'ad béé'ííníłnii'góó áádóó t'áá yínítą'go,

³jó, Bóhólníihii éí dahootsogóó danihilį́į́' yik'ijį' dah didoolnihgo łį́į́' áádóó télii áádóó ghą́ą́'ask'idii áádóó béégashii índa dibéda t'óó ayóó át'éego iiłtį́į́h łóód báhádzidii bąąh dahodooleeł.

⁴Áádóó Bóhólníihii éí Ízrel dine'é bilį́į́' índa Ííjip dine'é bilį́į́' t'áá ał'ąągo łahjíígíí atíidoolííł; áko Ízrel dine'é bíhígíí t'ááłá'í nidi doo ła' bididootłish da.

⁵Áko Bóhólníihii hoolzhishígíí yee nihoní'ą́ągo ádííniid, Yiską́ągo Bóhólníihii ádííniidígíí kéyahgi yi'doolííł.

⁶Áko biiskání Bóhólníihii ádííniidígíí yi'iilaago Ííjip dine'é bilį́į́' ałtso daneezná, nidi Ízrel dine'é bilį́į́' t'ááłá'í nidi t'áadoo ła' daaztsą́ą da.

⁷Áádóó Féro dah adiił'a', nít'éé' shoo, Ízrel dine'é bilį́į́' t'ááłá'í nidi t'áadoo ła' daaztsą́ą da lá. Azhą́ ákót'ée nidi Féro t'ahdii bijéí nitł'iz, áko t'áadoo diné yéé'níłnii' da.

⁸Áko Bóhólníihii éí Mózes áádóó Éran áyidííniid, Déédíljahdóó łeeshch'iih nihílák'ee hadeezbingo nídoohjáahgo Féro binááł bíni' Mózes éí yá bich'į'go łeeshch'iih yéidooghas.

⁹Áko éí Ííjip kéyah t'áá át'éé nít'éé' łeezh dibahí dooleeł, áádóó Ííjip kéyahgi diné áádóó naaldlooshii bik'ijį' ch'ozh łóód hadoołnih.

¹⁰Áko déédíljahdóó łeeshch'iih nízhdiijaa'go Féro bidááhdę́ę́' nizhní' áázh, áádóó Mózes éí yá bich'į'go łeeshch'iih yááyiighazgo diné áádóó naaldlooshii bitahgóó ch'ozh łóód hááłnii'.

¹¹Áko álíleego áda'ooł'įįłii ch'ozh łóód baa níłnii'go bąą Mózes doo yidááhdóó nidaokááh át'ée da, háálá álíleego áda'ooł'įįłii índa Ííjip dine'é t'áá ałtso ch'ozh baa níłnii'.

¹²Áko Bóhólníihii éí Féro bijéí nááyííłtł'isgo doo nááhwíists'ą́ą' da. Bóhólníihii éí Mózes yich'į' yaa yááłti'ígi áhoodzaa.

¹³Áko Bóhólníihii éí Mózes áyidííniid, T'ah abíínídą́ą́' nídidíí'nahgo Féro bidááhdę́ę́' nidíínááł, áko ábididííniił, Hííbrew dine'é biBóhólníihii Diyin God kóní, Shidine'é béé'níłnííh, áko shich'į' nidahałáa doo.

¹⁴Áko díí hoolzhishígíí biyi' naałniih bee atí'ésh'íinii t'áá ałtso bee nijéí atídeeshłííł, áádóó ná nidaal'a'í índa nidine'é atídeeshłíiłgo díí nił bééhodoozįįł: nihokáá'góó t'áá át'éé nít'éé' doo ła' shígi át'éhí da.

¹⁵Áko k'ad t'áá íídą́ą́' nihik'ijį' k'ídíshnii'go ni áádóó nidine'é t'áá bił naałniih bee atínihiishłaago nahasdzáán bikáa'gi ánihisíłdįįd doo nít'éé'.

¹⁶Nidi t'áá aaníí díí biniyé aláahgo naat'áanii ániishłaa: ninahjį' shibee adziilii bééhózingo ádeeshłííł áádóó nahasdzáán bikáá'góó shízhi' baa hane' doo.

¹⁷Áko t'ahdii shidine'é bich'į' ayóó át'éii á'díínílzingo doo béé'níłníih da.

¹⁸Jó, yiską́ągo kóhoodzaago t'óó báhádzidgo nílótsoh nihik'ijį' nídeeshtį́į́ł, áko Ííjip kéyah hodideezlį́į́'dóó wóshdę́ę́' dííshjį́įjį' nílótsoh kót'éhígíí ts'ídá t'ah doo naałtin da nít'éé'.

¹⁹Éí bąą k'ad nílááh nihilį́į́' nidaakaigóó dahodíł'á, áko dahootsodę́ę́' danihilį́į́' t'áá ałtso yah anídahidínóołkał, háálá diné t'áá áadi nidajikaígíí índa alį́į́' t'áá áadi nidaakaígíí doo nii'ohjį' anídazneeskaadgóó éí t'áá áadi bik'ijį' nílótsoh nidoołtį́įłgo ábidoołdįįł.

²⁰Áko Bóhólníihii bizaad yik'ee bi ł yéé' hazlį́'ígíí t'éiyá Féro bá nidaal'a'í bitahdóó bá nidaal'a'ígíí índa dabilį́į́' yah anídeiniiłkaadgo ádayiilaa.

²¹Áko Bóhólníihii bizaad doo yaa áńdahodílt'íinii éí bá nidaal'a'í índa dabilį́į́' t'áá dahootsodi nidaakai.

²²Bóhólníihii éí Mózes áyidííniid, Yá bich'į'go yadidiilníihgo Ííjip kéyahgi nílótsoh nidoołtį́į́ł; diné áádóó naaldlooshii índa dahootsogóó nidanise'ígíí bik'ijį' Ííjip kéyahgóó t'áá át'éé nít'éé' ákóhodoonííł.

²³Áko Mózes éí yá bich'į'go bigish yił yadidiilnii', áádóó Bóhólníihii éí nida'dilch'ilgo ni'dóó hahidinaadgo nílótsoh naałtingo áyiilaa, áko Bóhólníihii éí Ííjip kéyah bik'ijį' nílótsoh nayííłtą́.

²⁴Áko nílótsoh naałtingo t'óó báhádzidgo kǫ' bił ałtahgo nílótsoh nááłtą́; Ííjip kéyahgi dine'é hodideezlį́į́'dóó wóshdę́ę́' ákót'éhígíí ts'ídá t'ah doo ánéeh da nít'éé'.

²⁵Áko nílótsoh éí Ííjip kéyahgi t'áá át'éé nít'éé' dahootsogóó diné áádóó naaldlooshii áadi nidaakaígíí t'áá ałtso bił niníłtą́, áádóó nidanise' t'áá ałtso bił niníłtą́ índa tsin t'áá ałtso nayííti'.

²⁶Nidi Góshen hoolyéedi Ízrel dine'é kééhat'į́įgi t'éiyá t'áadoo nílótsoh nááłtą́ą da.

²⁷Áko Féro éí Mózes áádóó Éran yíká i'ííł'a'go áyidííniid, Jó, k'ad ádił asésiih lá. Bóhólníihii éí t'áá ákogi át'éii nilį́į́ lá. Shí áádóó shidine'é éí doo yá'áshóonii daniidlį́.

²⁸Bóhólníihii náohkąąh, áko ayóó át'éego ni'dilch'ilígíí índa nílótsoh naałtinígíí áhodidoolzih, áádóó nihéé'deesh'nihgo náásgóó doo t'áá kǫ́ǫ́ kénááhóht'į́į da doo.

²⁹Áko Mózes áhodííniid, Díí kin haal'áádóó t'áá ch'íníyáhí; t'áá ałch'ishjí bee Bóhólníihii bich'į' yadideesh'nihgo ni'dilch'ilgo nílótsoh naałtinígíí áhodidoolzih, áko díí nił bééhodoozįįł: nahasdzáán éí Bóhólníihii bíí' át'é.

³⁰Nidi ni áádóó ná nidaal'a'í t'ahdii nidi Bóhólníihii Diyin God doo dadíínóhsin da dooleełgo shił bééhózin.

³¹Áko nidik'ą' dits'idígíí índa tł'oh naadą́ą́' bidee'í bił nihoníłtą́, jó, tł'oh naadą́ą́' bidee'í bąąh hazlį́į́' nít'éé' áádóó nidik'ą' dits'idígíí k'adę́ę bílátah iigááh nít'éé'.

³²Nidi tł'oh naadą́ą́' áádóó tł'oh naadą́ą́' rái wolyéhígíí éí t'áadoo bił nihoniłtą́ą da, háálá t'ah doo t'áá íiyisí dadínísée da.

³³Mózes éí kin haal'áádóó Féro bits'ą́ą́' ch'éédzídzáago t'áá ałch'ishjí bee Bóhólníihii bich'į' yazhdidiilnii'; t'áá áko ni'dilch'ilígíí índa nílótsoh naałtinígíí áhodiilzee', áádóó ałtso ahóółtą́.

³⁴Ákódzaago nahałtinígíí áádóó nílótsoh naałtinígíí índa ni'dilch'ilígíí áhodiilzee'go Féro éí bił bééhoozingo t'ah nááyówehígo ádił náá'ásiih; bí áádóó bá nidaal'a'í bijéí nááyííłtł'is.

³⁵Áko Féro bijéí yítł'isgo t'áadoo Ízrel dine'é yéé'níłnii' da. Bóhólníihii t'áá Mózes yich'į' yee haadzí'ígi áhoodzaa.