Read Navajo JOB 1 Bible Online

JOB 1 - Navajo bible

JOB 1

¹Diné léi' Job wolyéego Uz kéyahdi kééhat'į́; éí diné t'áadoo bee bik'íhót'ahí da nít'éé' áádóó t'áá ákogi ááníiłii nilį́į́ nít'éé' índa Diyin God yidósin áádóó bąąhági át'éii yá doolnih nít'éé'.

²Éí haye'ké tsosts'id há neheezhchį́ áádóó hatsi'ké táá' há neheezhchį́.

³Hadibé tsosts'idi mííl áádóó haghą́ą́'ask'idii táadi mííl áádóó habéégashii ahąąh naazį́įgo nida'ałbąąsígíí ashdladi neeznádiin áádóó hatéliitsa'ii ashdladi neeznádiin índa há nidaal'a'í t'óó ahayóí, áko díí diné bidziilgo dah oolééł; haa'a'aahjigo diné kéédahat'ínígíí t'áá ałtso yiláahgo át'éé nít'éé'.

⁴Áádóó haye'ké bitah hoolzhishgo t'ááłá'í nítínígo baa náhwiilzhíishgo bighandi áńda'azįįh, áko dabilahkéí tált'éhígíí hoł da'dooyį́į́ł áádóó hoł deidoodlį́į́ł biniyé hágo nídeidi'niih nít'éé'.

⁵Áko áda'azįįd ałtso yaa ninákahgo Job háká aná'áł'aahgo dazhdiyingo ánáhool'įįh áádóó t'óó haiłkááhdą́ą́' náádii'nahgo t'áá ádzíłtso há didlidgo náádahaniihii nááyiiłnih nít'éé', háálá áńdí'niih, Shiye'ké daats'í ádił da'asiih índa bijéí tł'ááhdę́ę́' Diyin God dayódziih dó'óshłí. Job haye'ké bá náá'jiiłnihgo hoolzhish nít'éé'.

⁶Ákohgo diyingo nidaal'a'í danilíinii Bóhólníihii yidááhdóó ádéédahodoolzįįł biniyé yíkai bijį́į́ góne'; níłch'i bida'iiníziinii binanit'a'í Séítan wolyéii ałdó' atah níyá.

⁷Áádóó Bóhólníihii éí Séítan áyidííniid, Háádę́ę'shą' yínááł? Ákohgo Séítan éí Bóhólníihii áyidííniidgo ání, Nahasdzáán bikáá'góó táhodishłeeh áádóó nahasdzáán bikáá'góó háádiishdááh.

⁸Áko Bóhólníihii éí Séítan áyidííniid, Shá naal'a'í Job wolyéiísh baa ákoninizį́į́'? Nahasdzáán bikáá'góó t'áadoo ła' ákójít'éhí da; éí diné t'áadoo bee bik'íhót'ahíii nilį́ áádóó t'áá ákogi ááníiłii nilį́ áádóó Diyin God yidósin índa bąąhági át'éii yá doolnihii nilį́.

⁹Ákohgo Séítan éí Bóhólníihii ánéidoo'niid, Da' Job joolyéiísh t'áadoo nilínígóó Diyin God jidósin?

¹⁰Bí áádóó ba'áłchíní índa bee hólóonii t'áá ałtso da' éísh anít'i' yine' nidaadzi' dooleełii doo bá íinilaa da? Yinaashnishii bá bik'ijiisínídli' áádóó kéyahgóó binaalye'é k'ee'ąą deeshzhiizh.

¹¹Nidi k'ad, bee hólóonii t'áá ałtso bidinílchíidgo tídílééh, áko t'áá ninii'jį' níídóodzih.

¹²Bóhólníihii éí Séítan áyidííniid, Jó, bee hólóonii t'áá ałtso bee nóhólnííh, nidi t'áá bí sizį́įgi t'ááká bidóólchííd yíila'. Áádóó Bóhólníihii yits'ą́ąjį' Séítan dah hodiile'.

¹³Áádóó łah Job biye'ké áádóó bitsi'ké danilíinii bínaaí alą́ąjį'ígíí bighan góne' da'ayą́ áádóó wáin deidlą́ą́ nít'éé',

¹⁴áko naal'a'í ła' Job yaa yílwodgo ání, Béégashii ahąąh naazį́įgo bee nidahojiildlaad nít'éé' áádóó télii éí hanaagóó nida'ałchozh nít'éé'

¹⁵índa Sabíyadóó dine'é bik'i dah yizhjée'go adeiniiskaad, áko, t'áá aaníí, nidaal'a'í ałtso diltłish bee nidabidiztseedgo t'áá shí t'éiyá yisdááshwodgo nił hashne'.

¹⁶T'ahdii yáłti'go ła' náánálwodgo ání, Diyin God bits'ą́ą́dóó kǫ' yá biyi'dę́ę́' hadadíínáadgo dibé áádóó nidaal'a'í ałtso iidííłk'ą́ą'go t'áá shí t'éiyá yisdááshwodgo nił hashne'.

¹⁷T'ahdii yáłti'go ła' náánálwodgo ání, Kaldíya dine' é éí táádę́ę'go ghą́ą́'ask'idii yaatįįh yínáago adeiniiskaad áádóó nidaal'a'í yę́ę ałtso diltłish bee nidabidiztseedgo t'áá shí t'éiyá yisdááshwodgo nił hashne'.

¹⁸T'ahdii yáłti'go ła' náánálwodgo ání, Niye'ké áádóó nitsi'ké danilíinii bínaaí alą́ąjį'ígíí bighan góne' da'ayą́ áádóó wáin deidlą́ą́ nít'éé',

¹⁹jó, honoojíídę́ę́' t'óó báhádzidgo deeyolgo t'áá dį́į́'dę́ę́' kin biyah yiiyolgo ahiih néidinííyiizh, áádóó na'áłchíní ałtso bik'i hoołdáazgo daneezná, áko t'áá shí t'éiyá yisdááshwodgo nił hashne'.

²⁰Ákohgo Job nízhdii'na' áádóó ha'éé' ák'inijooldláád; hatsii' ałdó' ałtso jííshéé' índa ni'jį' tsé'yaa jineeshjoolgo Diyin God bich'į' nahodzisá,

²¹áko ájíní, T'áá łinishchí'ígo shimá shishchį́, áádóó t'áá łinishchí'ígo dah nídideeshdááł; Bóhólníihii sheidiní'ą́, Bóhólníihii shaa nááyiisdláá'; Bóhólníihii bízhi' bee bi'dójíigo baa ha'niih le'.

²²Díí t'áá ałtso ákóhóót'įįd nidi, Job t'áadoo ádił asziihígi da, índa t'áá áhoodzaagóó t'áadoo Diyin God yik'i hodii'ą́ą da.