Read Navajo JOB 10 Bible Online

JOB 10 - Navajo bible

JOB 10

¹Shii' sizíinii she'iina' yijoosłxáá'; t'áá shí ádaa saad honishłónígíí doo t'áá áásésįįd da; shii' sizíinii bił niiłch'iihgo hahideesdzih.

²Diyin God ábidideeshniił, Doo shá nihodíí'áał da. Ha'át'íí biniyé doo ákǫ́ǫ́ shik'ijį' ánít'é? Bee shił hólne'.

³Diné bide áhwíínísingo áádóó binishínílnishígíí ni'į́įgo índa diné doo yá'ádaashóonii yindaha'áii bich'ijí nílį́įgoósh nił yá'át'ééh?

⁴Ats'íís k'ehgoósh nináá' hólǫ́? Doodaii' diné oo'ínígi át'éegoósh ííní'į́?

⁵Diné bíyoołkáłígi át'éegoósh níyoołkááł? Índa diné bee nináháháhígi át'éegoósh nee nináháhááh;

⁶biniinaa doo ákwii áát'įįdii naniłkaah áádóó ádił asésiihígíí hazhó'ó hanisííd?

⁷Ákondi diné doo yá'áshóonii doo nishłį́į́góó nił bééhózin áádóó doo nigha'ódléłí da.

⁸T'áá sézį́į́ nít'éé' shits'áoz'a' dahólǫ́ǫgo áshiinilaa, nidi tíhodideeshłííł shííní'ní.

⁹Nánooshkąąh, hashtł'ish bee áshiinilaaígíí béénílnííh. Da' ákoósh łeezh dibahí ánáshídléeh doo?

¹⁰Abe' yajiiziid nahalingo yashiiniziid, áádóó géeso ályaaígi át'éego áshiinilaa.

¹¹Shikágí shits'íís bik'i nííníłkaad, áádóó ts'in bee ahą́ą́h dashidínínilgo ats'id bee ahídadiniłkad.

¹²Hinishnáago índa shichoha'níigo shaa nitsíníkeesgo áshíínísin nít'éé'; shiníłch'i baa áhólyánígíí bee kónízahgóó hinishná.

¹³Nidi díí nijéí bii' nídadííníł'į́į́', áko díí biniyé ánít'íinii shił bééhózin;

¹⁴éí ádił ni'iisíihgo shaa ákonínízin, áádóó doo ákwii áát'įįdii doo shá nahjį' kwáálíił da.

¹⁵Doo yá'áshóonii nishłį́įgo hatihíláane'go shá haz'ą́; t'áá ákogi ánísht'éego doo de dah dínéesht'áał da. Atíshi'dool'įįdígíí bąą t'óó shił haada; éí bąą ti'hoosh'níihgo sídáhígíí níníł'į́.

¹⁶Jó, shide ádzaago nááshdóítsoh bitsiijį' daditł'ooii naalzheeh nahalingo shíkanítá áádóó t'óó bida'ayóii bee shik'ijį' nanilnish.

¹⁷Ná dahalne'í shik'ijį' danilį́įgo ánáádlííł, áádóó shik'ijį' nánáháchįįhígíí t'óó hoonaał; ana'í ániidiígíí shich'į' ałnááhíí'nił.

¹⁸Ha'át'íishą' biniyé shi'dizhchį́? T'áadoo ła'da shiiłtséhé t'óó dasétsą́ą laanaa nisin.

¹⁹T'áadoo hosélį́į́'góó t'óó áníshdin doo nít'éé'; t'óó shi'dizhchį́į́dóó łeshi'dooltį́į doo nít'éé'.

²⁰Doo lą'í shiidoołkáał da; t'áadoo yee' shaa nánít'íní, áko ha'íídéeshniiłgo háádeeshyįh nisin;

²¹t'ah doo dah nídiishdááhdą́ą́' háádeeshyįh; áadi índa doo nídeeshdááłgóó kéyah chahałheeł bii'góó áádóó anoonééł chaha'oh bii'góó deeshłeeł.

²²Éí kéyah hodiłhiłii ts'ídá hodiłhiłgo hazhóodii át'é, áádóó anoonééł chaha'oh bii' t'áá ałtsoní ił ałtaa nás'nil, índa áadi adinídíinii chahałheełígíigi át'é.