Read Navajo JOB 11 Bible Online

JOB 11 - Navajo bible

JOB 11

¹Ákohgo Néíyama hoolyéédę́ę́' Zófar wolyéii ánááhodoo'niidgo ání,

²Diné akónéelą́ą'go yáłti'goósh bich'į' saad doo nát'ą́ą́' ninádoot'áał da nít'éé'? Índa diné ayóo yáłti'iísh, T'áá ákogi ánít'é, bidi'níi doo?

³Ha'díłch'ałgoósh diné yik'ee dahidiiłheeł doo? Índa t'óó ánahółt'i'goósh diné ła' doo ádaa yánínídzingo ándoolíił da?

⁴Jó, ádíní, Na'nishtinígíí ts'ídá t'áadoo bee bąąh dah haz'ání da áádóó ninááł t'áá íiyisí yá'ánísht'ééh.

⁵Dooládó' Diyin God nich'į' yáołti' laanaa nisin, áádóó nik'ijį' hadoodzihgo

⁶t'áá bí t'éiyá bee hódzáanii ááhyiłníinii ahą́ą́h nániiláago nił ííshją́ą́ áyólééh laanaa. Éí bąą díí baa ákoniizįįh: Diyin God doo ákwii ánít'ínígíí biniinaa atínídoolííł nít'é'ígíí t'áá bi'oh góne' atíníł'į́.

⁷Da' hazhó'ó naniłkaahgo Diyin God át'éiísh nił bééhodoozįįł? Aláahgo Ayóó'ábóodziilii nabik'ítsíníłkeesgo bił nidahonees'ą́ą́góósh nił bééhodoozįįł?

⁸Éíyee' yádiłhił biláahdi hólóonii óolyé; nishą' éí ha'át'íí bíninil'ą́? Áádóó ch'į́įdiitah bilááh góyaa nidi ayóó át'é; nishą', ha'át'éego nił bééhózin doo?

⁹Át'éiigi nahasdzáán bilááhgóó áníłnééz, áádóó tónteel áníłtélígíí bilááh áníłtéél.

¹⁰Diyin God niiłtsoodgo yah anííłt'e'go naa nídóot'įįłjį' aníílóozgo háishą' bidínóołtł'ah?

¹¹Jó, Diyin God éí diné t'áadoo biniyéhígóó nidaakaii yééhósin; doo ákwii é'ét'éii ałdó' yiyiiłtséehgo yiníł'į́. Da' éísh doo yaa nitsíkees da doo?

¹²Télii ałchinii biyázhí doo át'íínígóó diné nilį́įgo yichíihgo doo bohónéedzą́ą da; éigi át'éego diné doo áhályáanii doo hodooyąął da.

¹³Nijéí bee yá'át'éehgo tsíńdííníkéezgo áádóó Diyin God bich'į'go dah díílnihgo

¹⁴doo ákwii ádaat'éii nii' hólǫ́ǫ́ ládą́ą́', éí doo deeghánígóó áts'ádinít'aah, áádóó t'ááká doo yá'ádaashóonii nighangi hólóníi la'.

¹⁵Áko lá índa t'áá aaníí t'áadoo haada níínílniní de ádííníił ni, áádóó doo ách'į' na'íínídlíígóó doo nił yée' da doo.

¹⁶Háálá nich'į' nahwiiłnánígíí beidiyíínah; tó íína'ígíí nahalingo doo béénílniih da doo.

¹⁷Áádóó ałné'é'áahgo hool'inígíí bilááh át'éego adinídííngóó hinínáa doo; bik'ee nił chahałheełígíí abínígo nee ha'íí'ánígíigi át'ée doo.

¹⁸Áko nidziih doo, háálá ná chohoo'į́ hólǫ́; t'áá aaníí ánaagóó ha'ísíid doo índa hasih haz'ą́ągi háánílyį́įh doo.

¹⁹Áádóó nínítį́įgo ła'da doo tsíńdidoołhis da, áádóó lą'í shich'oníníi doo daaníigo nídanookąąh doo.

²⁰Diné doo yá'ádaashóonii doo da'oo'į́į da dadooleeł, índa t'áá ha'át'éegoda ts'ídá doo yisdádahizhdookah da, áádóó diné ádazhdoodįįłígíí bee hoł chodahoo'į́.