Read Navajo JOB 12 Bible Online

JOB 12 - Navajo bible

JOB 12

¹Áko Job ánááhodoo'niidgo ání,

²T'áá aaníí nihí t'éiyá diné danohłį́, índa dasinoonáago hódzą́ t'áá nihił ádoodįįł.

³T'áá nihígi át'éego ak'idi'yiishtįįh; doo nihi'ohgo ánísht'ée da. T'áá aaníí, háishą' díigi ádaat'éhígíí doo bił bééhózin da?

⁴Diné yił kééhat'íinii t'óó bá nahałt'i'ii nahonish łingo Diyin God bich'į' sonídíszįįhgo shich'į' éénáhoosįįh; diné t'áá ákwii át'éii, éí t'áá ákóne' át'éii yee' nilį́įgo, éí t'óó baa oodloh.

⁵Doo bide ádahoot'éhígíí éí ach'į' nahwii'ná dei'į́įgo t'áá chą́ą́h dadigeehgo deíkáahii t'éí bich'į' ákódahoonííł danízin.

⁶Diné aghada'ii'níiłii biníbaal hazhó'ó hasht'e'sinil; Diyin God yá nídahałchįįhii t'áadoo beinít'ínígóó kéédahat'į́; éí bílák'ee naazláii t'éí shidiyin át'é danízin.

⁷Nidi nidaaldlooshii nideídółkid; éí nidanihinitin doo; tsídii wódahgo naaldeehii nideídółkid; éí nihił dahodoolnih.

⁸Éí doodaii' nahasdzáán nideídółkid; éí nanihinitin doo, áádóó tónteel bii' łóó' naaldeehígíí nihił dahodoolnih.

⁹Díí bitaa'iisíłta'ígíí t'áá ałtso háidíígíishą' Bóhólníihii ádayiilaago doo hoł bééhózin da?

¹⁰Hiná nináneel'ą́ąjį' yee hináanii Bóhólníihii bílák'ee silá, índa nihokáá' dine'é t'áá ałtso yee nídídzihii dah yoolééł.

¹¹Ch'iyáán jilįhígi át'éego ajaa' bee saad dzółts'ą́'ígíí bééhodzoosįįh.

¹²Diné náás daazlį́į'ii dahóyą́, áádóó diné lą'í dabiiskáanii lą'ígóó ak'idadi'yiitįįh.

¹³Diyin God t'áá íiyisí hóyą́, índa ayóó ábóodziil; éí na'ak'íyáłti' áádóó t'áá íiyisí ak'idi'yiitįįh.

¹⁴Jó, diné ła' hałchǫǫhgo t'áadoo háázhdódle' át'éégóó áyiił'įįh; diné yidá'díłkałgo t'áadoo bee ąą ánáolne'ígóó áyiił'įįh.

¹⁵Tó t'ą́ą́' kóyósingo kéyah náltsih; tó yidichi'go kéyah bikáá'góó tó nídaadląąh.

¹⁶Bí t'éí ayóó ábóodziil, áádóó t'áá íiyisí hóyą́; diné bi'deesdlo'ii áádóó diné bina'adlo'ii t'áá áłah Diyin God yíí' nilį́.

¹⁷Diné na'ak'íyádaałti'ii t'áá ákohígo ayii'éésh; ánihwii'aahii doo dahóyą́ą́góó ádeile'.

¹⁸Aláahgo naat'áanii danilíinii yee ade ádahósinii k'ééda'i'a', áádóó biníí' gónaa yinída'ast'i'.

¹⁹Náá'iiłniihii danilíinii bąąh da'éébį́į'go ayii'éésh; diné ayóó ádaat'éii danilínígíí nahjį' hááyii'nííł.

²⁰Diné baa dahodzódlíii doo yádaałti'góó ádeile'; hadaastihii yik'idadi'yiitįįhii yił ch'aa ádeile'.

²¹Aghádahideezíinii t'óó yeidloh; ayóó ádaat'éii dabidziilii doo dabidziilgóó ádeile'.

²²Chahałheełdę́ę́' t'áá íiyisí doo daat'íinii ííshją́ą́ áyoolííł, áádóó hoot'į́įjį' anoonééł bichaha'oh yik'i di'yiiłdlaad.

²³Ał'ąą dine'é ayóó ádabóodziilgo ííł'į́, áádóó atíyoolíiłgo áyoołdįįł; ał'ąą dine'é ayóó ádaat'éego áyiił'įįh, áádóó doo dabidziilgóó ánáyoodlííł.

²⁴Nihokáá'góó aláahgo bídahólníihii bijéí yee yik'idadi'yiitįįhígíí yits'éidii'aahgo honoojíidi atiin ádindi tádadikáahgo áyoolííł.

²⁵Adinídíín t'áágééd chahałheełgóó nidadidza'; diné oodlą́ą'go na'nit'iígíí nahalingo nida'nit'igo áyoolííł.