Read Navajo JOB 13 Bible Online

JOB 13 - Navajo bible

JOB 13

¹Jó, díí t'áá ałtso yiiłtsą́, áádóó t'áá shí diséts'ą́ą'go bik'idiitą́.

²Nihił béédahózinígíí shí ałdó' shił bééhózin; doo nihi'ohgo ánísht'ée da.

³Aláahgo Ayóó'ábóodziilii t'áá aaníí bich'į' hadeesdzih nisin; Diyin God díí kónísht'éhígíí bił nabik'íyádeeshtih nisin.

⁴T'áá ánółtso wooch'ííd ádaoł'íinii danohłį́; t'áá ánółtso azee' ííł'íní doo ílíinii danohłį́.

⁵Dooládó' t'óó dadíínółyéel dooleeł nisin, áko éí bee dahonohsą́ą doo nít'éé'.

⁶Na'ák'íyáshti'ii índa baa ná'ooshkąąhii k'ad deísółts'ą́ą́'.

⁷Da' doo yá'ádaashóoniísh bee Diyin God bá hadahodziih doo, índa nihinda'adlo'goósh bá yádaołti' doo?

⁸Da' Diyin God bich'ijísh dadoohłeełgo bá yádaałti'? Diyin Godshą', da' éísh bá ałghada'doht'áah doo?

⁹Nanihiskáa'go yá'ádanoht'ééhísh dooleeł? Diné ahi'deesdlo'ígi át'éegoósh Diyin God bi'doołohgo át'é?

¹⁰T'áá nahont'inee diné ła' bich'ijí dadoohłeełgo t'áá aaníí Diyin God nihididooteh.

¹¹Da' doósh Yee Ayóó'át'éii nilínígíí nihił yéé' áhodoolíił da, índa bee báhádzidígíí naa anihidoonił da?

¹²Hódzą́ bee ééjílniihgo bee hahídziihii éí łeeshch'iih nahalin; ách'ą́ąhgi hólǫ́ǫgo ádeínóhsinígíí éí hashtł'ish nidahalin.

¹³T'áadoo íits'a'í nahísóotą́; t'áadoo shaa nídaaht'íní, áko nihich'į' yáshti'; háni' t'áá áshnéehgi áshnééh.

¹⁴Ha'át'íí biniyé t'óó shidaa' deestsxahgo she'iina' bąąh dah sétį́į doo?

¹⁵Azhą́ shidiyoołhéeł nidi, baa jóshłíi doo, nidi yishááłgóó t'áá bí t'éí bich'į' ách'ą́ą́h yáshti' doo.

¹⁶Bí t'éiyá bee yisdádeeshááł; t'óó áhodil'íinii éí doo Diyin God yidááhdóó nidoogáał da.

¹⁷Ádíshnínígíí haleebee deísółts'ą́ą́', áádóó bee nihił hashne'ígíí dadoohts'a'.

¹⁸Jó, shá baa hwiidínóot'įįłii hasht'eishłaa, áko hazhó'ó shá hasht'éédoolníiłgo shił bééhózin.

¹⁹Háí t'éí shił ałha'dit'áah doo? Áko k'ad doo ádíshnínígóó dadeestsaał.

²⁰Naakigo haz'ą́ doo shich'į' nididíí'áał da, áko índa doo nits'ąą nídideesht'į́įł da.

²¹Doo deeghánígóó shits'ádinílnííh, áádóó bee náhádzidígíí doo bik'ee shił yée' da doo.

²²Áko índa shich'į' handziihgo nich'į' hadeesdzih, éí doodaii' shí átsé haasdziih, áádóó shich'į' hadíídzih.

²³Doo ákwii áát'įįdii índa ádił ni'ayésíi'ii lá haa néelą́ą́'? Bee haz'áanii heshtíhígíí índa ádił ni'ayésíi'ii shił bééhonísįįh.

²⁴Ha'át'íí lá biniyé shits'ąą nanít'á, áádóó ha'át'íí lá biniyé ni'ana'í nishłį́įgo shaa nitsíníkees?

²⁵T'iis bit'ąą' bił naanááyołígíísh didínííyish? Áádóó atsǫz bił yiyołígíísh bikéé' yílwoł doo?

²⁶Jó, t'áá íiyisí doodago shaa hólne'go ak'e'íłchí, áádóó ániid naasháádą́ą́' doo ákwii áát'įįdii t'áá shii' hólǫ́ǫgo áshíínísin.

²⁷Tsin bighádínís'eezgo ałdó' anáshiinił'įįh, t'áá ninádíshtał bik'eh shiníníł'į́, shikék'eh hashchį́į nidi bá nihoodzogo íinilaa.

²⁸T'áá ha'át'íhída diłdzidígíí nahalingo áádóó ch'osh ałchozhii éí éé' dayííyą́'ígi át'éego ááshdįįł.