Read Navajo JOB 14 Bible Online

JOB 14 - Navajo bible

JOB 14

¹Diné éí asdzání bishchínígíí éí ne'ełdįįhjį' bich'į' nahwii'náa łeh, índa doo lą'í biiłkaah da.

²Ch'ilátah hózhóón nahalingo jidínísééh áádóó jiniiłnah. Chaha'oh tsxį́įłgo eeldooígíí nahalingo hoł yóó'ahaghááh, áko doo náájii'náa da łeh.

³Diné ákót'éiísh níníł'į́įgo aa dahwiinít'į́įgi shaa nídíít'įįł?

⁴Háísh ha'át'íhída t'óó baa'ihii bits'ą́ą́dóó yá'át'éehgo ánéidoodlííł? T'áadoo yíneel'ání da.

⁵Ákwíí hwiidoołkáłígíí t'áá íídą́ą́' bee nihoot'ą́ągo ákwíí hwee nídidooziłígíí bee nihwííní'ą́; éí bilááhgóó ts'ídá doo jiináa da dooleełgo bee hosíníł'ą́.

⁶Adeenáago naalnishgo bee e'e'áhígi át'éego bił yee hwiih silį́į'jį' bíni' hanályį́į́h.

⁷Tsin k'élne' nidi hanáádínóoséełgo bá chohoo'į́, áko hanáádínóoséłígíí doo dínóotł'ahgóó nooséeł doo.

⁸Azhą́ behétł'óól łeeyi'di hadaatih nidi, índa tsehégod íí'áii dííłdzid nidi,

⁹tó bił nehekaahgo néidootsoh áádóó bits'áoz'a' náhodoodleełgo dootł'izhgo náánooséeł doo.

¹⁰Nidi diné éí daaztsą́ągo yóó'ábi'diil'įįh, áádóó áadi hodi'niiłdzi'. T'áá aaníí diné haayołgo háadi éí nááhódlǫ́ǫ łeh?

¹¹Tónteel bits'ą́ą́dóó tó yót'áahjį' ahwiilehígi át'éego índa tooh ádįįhgo náháltsihígíigi át'éego

¹²t'áá ákót'éego yádiłhił ásdįįdjį' diné noonéełii doo náádidoojah da, índa doo ch'éédabidoosiłí da.

¹³Łeeh ho'dii'níiłdi náshidóół'į́į́ł laanaa; t'óó báhádzidgo bee atí'éł'íinii eeldojį' náshidóół'į́į́ł laanaa; shá nihodíí'áałgo shéédíílnih laanaa!

¹⁴Diné daaztsą́ągo áádóósh nááhí'náa doo? Łahgo áshidi'doolníłígíí biba' ánísht'éego naashnishgo shíyoołkáał doo.

¹⁵Shíká ádííníniidgo nich'į' áńdideesh'niił; binishínílnishii bídin nílį́į doo.

¹⁶K'ad nihidishtaałígíí baa híínídáago ádił ni'iisíhígíísh doo hanisíid da?

¹⁷Bee haz'áanii héti'ii azis bii' dá'deestł'ǫ́, áádóó doo ákwii áát'įįdii bidáń'da'díłkad.

¹⁸Dził ałtso naa'iizhoshgo hodiilkǫǫh índa tsé éí nahjį' ahinika'.

¹⁹Tó éí tsé nidayiisháásh; t'áá íiyisí nahałtį́įhgo łeezh ayiił'eeł; t'áá ákót'éego diné bee bił chohoo'ínígíí ááłdįįł.

²⁰Hool'áágóó diné bik'eh dídlį́ áádóó daniné, áko binii'jį' łahgo ánoolningo íinił'įįh, áádóó dahodiileeh.

²¹Biye'ké ił nilíinii daaleeh, nidi doo hoł bééhózin da; biye'ké éí a'ohgo ádabi'diil'įįh, nidi t'áadoo hoł bééhoozįįh da.

²²T'áá hó hats'ísígíí t'éiyá neezgaigo baa ákoznízin łeh, índa t'áá hó yínííł jílį́įgo ádaa atínízhdindleeh łeh.