Read Navajo JOB 15 Bible Online

JOB 15 - Navajo bible

JOB 15

¹Ákohgo Tííman kin haal'áádóó Élifaz wolyéii ánááhodoo'niidgo ání,

²Diné hóyáaniísh t'áadoo biniyéhígóó bił bééhoozinii yee yáłti' doo, áádóó ha'a'aahdę́ę́' níyolígíísh yee nídínóochał?

³Índa doo bee a'doodiłiísh yee yáłti' doo? Éí doodaii' saad doo idééłníiniísh yee yáłti' doo?

⁴T'áá aaníí Diyin God doo dólzingóó yee' íínísin índa Diyin God doo bich'į' sohodizingóó yee' íínísin.

⁵Jó, doo ákwii ánít' éhígíí yee' ákót'éego yániiłti' índa diné binídahwéedǫ́ǫsii yádaałti'ígi át'éego yáshti' dooleeł nínízingo nihidí'aah.

⁶T'áá ni ádínínígíí bee ádá nináhonít'aah; shí éí doo nánihonish'aah da; t'áá aaníí, t'áá ni ádínínígíí bee ádaa nahólne'.

⁷Niísh áłtsé ni'dizhchį́? Deílk'idígíí t'ah doo ádaalnééhdą́ą́'ásh ándiilyaa?

⁸Diyin God yinaha'áiísh t'áá disíníts'ą́ą́'? T'áásh ni t'éiyá honíyą́ągo ádaa nitsíníkees?

⁹Ha'át'íísh nił bééhózin shį́į́ doo nihił béédahózin da? Ha'át'íí bik'idi'nitą́ą́ shį́į́ nihí doo bik'ida'diitįįh da?

¹⁰Bitsii' deiba'ii áádóó t'áá íiyisí hadaastihii nizhé'é yilą́ąjį' nidaakaii yee' nihitahgóó kéédahat'į́.

¹¹Diyin God bits'ą́ą́dę́ę́' bee ha'ahóníiniísh doo nił hwiih da índa hazhó'ógo nich'į' yáti'ígíísh doo nił sih da?

¹²Ha'át'íísh biniyé ákót'éego yáníłti'? Índa ha'át'íísh biniyé hashké nínídzin yínílnáa'go

¹³Diyin God bik'ijį' nílį́įgo tsídíníkééz, áádóó saad doo adaaníinii bee hahídziih?

¹⁴Dinéshą' ha'át'íí át'éego ba'át'e' ádin doo, índa bi'dizhchį́įgo t'áá ákogi át'ée doo?

¹⁵Jó, Diyin God t'áá bí bidiyį́į́' doo ya'ólíi da; t'áá aaníí, yádiłhił yiníł'į́įgo doo dadílzin da.

¹⁶T'ah nááyówehgo diné doo yildingóó índa t'óó baa'ihgo dahiná; éí tó jidlą́ nahalingo doo ákwii át'éii adeisłį́.

¹⁷Nił ch'íhodeesh'áałgo shíísíníłts'ą́ą́' áádóó yiiłtsáanii bee nił hodeeshnih:

¹⁸éí hastóí dahóyáanii dabizhé'é yę́ę bits'ą́ą́dóó yaa nidahasne', áádóó t'áadoo deidínées'į́į' da.

¹⁹Éí dabizhé'é yę́ę t'áá sáhí kéyah baa deet'ą́, índa dé'éyóní nidi t'áadoo ła' hatahjį' deeyáa da.

²⁰Diné doo yá'áshóonii ni'níłdįįdjį' ti'hooníihgo di'ní, áádóó diné ade áhósinii ákwíí béédoohahgo bá nídeet'ą́.

²¹Ił dahółyée'ii bił íits'a' doo; bighangi t'áá ałtsoní bee ída'íízįįdgo atíbidi'doolnííł.

²²Chahałheeł yits'ádoogáłígíí doo nayólíi da, áádóó ła' diltłish yee hodiyoołhéełgo haa héesdá.

²³Ch'iyáán lá háá hólǫ́? níigo adókeedgo tádíghááh. T'óó bił chahodoołhiłígíí koshídę́ę́' bich'į' hoolzhishgo yaa ákonízin.

²⁴T'áadoo anáánáo'ne'ígóó índa bił hodiniihígíí yik'ee bił yée' doo; aláahgo naat'áanii deezbaa'go hasht'e'ádiilyaaígíí ak'eh deesdlį́į́' nahalingo hak'eh didoodleeł.

²⁵Háálá Diyin God bik'ijį' jílį́įgo bich'į' k'ízhdeeshchid áádóó Aláahgo Ayóó'ábóodziilii bich'į' nidzildzilgo ízh'diilyaa.

²⁶Naagé ditáanii ách'ą́ą́h niji'áago Diyin God bich'į' nijichǫ'go bik'ijį' dzideesdzil.

²⁷Jó, ałk'ízhniilk'aiigo hanii'jį' neesk'ah silį́į́' áádóó haníí' gónaa hak'ahígíí ahééhineesk'ool silį́į́'.

²⁸Kin hadaas'áajį' doo na'adáágóó haz'ánígi kééhojit'į́ áádóó kin doo bii' dahooghanii k'adę́ę ahiih nídaałdaasgo yáádaa'áa dooígi kééhojit'į́.

²⁹Doo náázhdoot'įįł da, áádóó jit'ínígíí doo didoonaał da, índa nihokáa'gi doo hats'ííd nááhwiizhdooł'aał da.

³⁰Chahałheeł doo bits'ázhdoogáał da; jidínóoséłígíí éí kǫ' ałtso yidoozis, áádóó biyol yee yóó'ahó'doosoł.

³¹Bíni' ádin'jidlo'ii éí t'áadoo biniyéhí daígíí t'áadoo beijólíhí doo; jó, t'áadoo biniyéhí daígíí k'ééhodidoodlííł.

³²T'ah doo dadzitsaahgóó t'áadoo biniyéhí daígíí ałtso hach'į' nidoolyééł, índa hat'ąą' t'éiyá ts'ídá doo yidootsoh da.

³³Ch'il na'atł'o'ii bineest'ą' t'áadoo nit'ání ádąąh nayoogádígíí nahalingo honeest'ą' t'áadoo nit'ání ádąąshdoogał, áádóó áliv tsin bílátah da'diigai ádąąh nayoogádígíí nahalingo honeest'ą' ádąąshdoot'įįł.

³⁴Doo Diyin God k'ehgo ádaat'éii ba'áłchíní doo dahodooleeł da, áádóó bee nahodi'yoonihii hoł yá'ádaat'éhígíí dahaníbaal adadidook'ą́ą́ł.

³⁵Ádílááh yida'niiltsąąh índa t'áadoo biniyéhí daígíí bee nidahwiileeh, áko na'adlo'go nahagiz yídaaltsą́ą łeh.