Read Navajo JOB 17 Bible Online

JOB 17 - Navajo bible

JOB 17

¹Áá hosist'įįd; doo nááshiidoolkáałjį' baa hoolzhiizh; yóó'áshidi'doolníiłgi shá hasht'ehoolyaa.

²Shá nidahałt'i'iísh doo shináhookah da, índa shá nídahałchįįhiísh doo áłahjį' yish'į́į da?

³Bee shá nihwííní'ánígíí shá bi'ílééh. Háísh éí shá ąąh ni'ídidooltééł?

⁴Ak'ida'didootį́įłii bintsíkees bidáda'dííníłkaal; éí bąą t'áadoo ayóó át'éii danilį́įgo íínísiní.

⁵Diné ła' bik'isóó yich'į' doo t'áá aaníígóó yáłti'ígíí t'áá éí diné ba'áłchíní doo da'oo'į́į da dooleeł.

⁶Diné bitahgóó baa niyá'áho'diti'ii nishłį́įgo áshiilaa; diné shik'ijį' dadizhah.

⁷Yínííł nishłínígíí bik'ee doo eesh'į́į da yishłeeł; chaha'oh iildóhígi át'éego t'áá íiyisí shííts'iiní.

⁸Diné t'áá ákogi ádaaníiłii díí bik'ee t'óó bił adahayóí, diné t'áadoo át'éhígóó naagháii éí Diyin God doo deidósinii yich'į' ádá náhálchįįh.

⁹Diné t'áá ákogi át'éii yik'ehgo yigáałii t'áá ákót'éego t'éí naaghá, áádóó diné yá'át'éehgo hináanii bidziil yileełgo bidziil í'diil'įįh.

¹⁰Haa'íyee' aadę́ę́' shich'į' nináánóhkááh; nihitahgi diné hóyáanii doo ła' bik'ésháah da.

¹¹K'adę́ę ashííłkaah; biniyé ásht'íinii t'áá éí bíká shił chohoo'íinii t'áadoo nídaasdlį́'í da.

¹²Tł'éé' éí jį́, deiłní, chahałheeł hólónígíí biniinaa adinídínígíí doo sih da.

¹³Łeeh shidi'dooltéełgi biba' ánísht'éego áadi chahałheełgi ashhosh doo.

¹⁴Yóó'áshidi'doolníiłgi haz'ánígíí ábidishní, Shizhé'é nílį́, áádóó ch'osh ábidishní, Shimá áádóó shilah nohłį́.

¹⁵Háadishą' shá chohoo'į́? Jó, shá chohoo'į́įgo háishą' yoo'į́į doo?

¹⁶Łeeh hwii'nííłgóó sélį́į'go t'áásh shił chohoo'į́įgo ákǫ́ǫ́ hanáshyį́įh doo.