Read Navajo JOB 18 Bible Online

JOB 18 - Navajo bible

JOB 18

¹Ákohgo Shúwah dine'é Bíldad wolyéii ánááhodoo'niidgo ání,

²Ła' ałyóí bee hahídziihgoshą' haa nízahgóó hodidoonaał? Hazhó'ó baa nitsíníkees, áko índa nihí hadadiidzih.

³Ha'át'íísh biniyé naaldlooshii daniidlį́įgo nihaa nitsíníkees? Ha'át'íísh biniyé doo áhályáanii daniidlį́įgo nihaa nitsíníkees?

⁴Náháchį'go ha'ádiyílgháashii nílíinii, nahasdzáán daats'í ná yóó'adidoot'ááł? Tsé daats'í nahjį' ná hadoot'ááł?

⁵T'áá aaníí diné doo yá'áshóonii yee ayóó át'éii kǫ' nahalinii deineestsiz; bikǫ' dah nídíno'ii doo i'dííłdíin da.

⁶Biníbaal góne' nideezdíinii chahałheeł doo índa bee hool'iní yaa'áii dínóoltsis.

⁷Nízaadi nidahidiltaałgo naaghá yę́ę t'áá áyídígo nidahidiltaałgo ályaa áádóó yee na'ak'íyáłti'ii yiyaa ninádootłish.

⁸T'áá bí łoh yiih yíyá, áko łeeh hoodzą́ągo áhoolyaago bik'i ni'íljoolii yikáá' deeyá.

⁹Joogááłgóó bee dah hizhdidoogáałii biishdoogááł, áádóó łoh biishdoolwoł.

¹⁰Łoh łeeyi' haba' niit'ą́; łoh biishdoogáałii hadáahgi si'ą́.

¹¹T'áá ałtsodę́ę́' ách'į' na'ódlíigo náldzidgo yigááł; t'áá éí binoołchéeł doo.

¹²Dichin éí doo hadziilgóó áhodoolííł; hach'į' hodiyoołnáałii hwíighahgóó hólǫ́ǫ doo.

¹³Łóód na'ałtseedii t'áá át'é hakáá'góó niníkę́ęzgo hats'íís bidziilii bidi'niiłdzid.

¹⁴Haníbaal ba'jólí yę́ędóó ch'íhodeedzį́įzgo bik'e'íyée'ii aláahgo binanit'a'í baa ho'deedzį́į́z.

¹⁵Doo daahóhígíí t'éiyá haníbaal góne' naaznil; haghangi tsékǫ' łitsoii nidoołtį́į́ł.

¹⁶Hwehétł'óól t'áá łeeyi'dę́ę́' nídadooltsih; wódahdi hats'áoz'a' daniiłna' doo.

¹⁷Nahasdzáán bikáa'gi doo hwééhániih da doo áádóó haa hoyoosnahgo kintah da'nítiingóó házhi' doo baa yáti' da.

¹⁸Adinídííndóó chahałheeł góne' aho'di'nóolchééł; nihokáá'dóó hahodi'nóolchééł.

¹⁹Hadine'é bitahgóó haye' índa hanálí doo hodooleeł da, áádóó kééhojit'į́ yę́ęgi doo ła' bighan da doo.

²⁰Dadziztsą́ bijį́ halą́ąjį' nidaakaígíí hak'ee t'óó bił adahayói doo índa hakéédę́ę́' nidaakaígíí hak'ee bił daayéé'.

²¹Diné doo yá'ádaashóonii t'áá ałtso kojį' ts'ídá bá adahwiizt'i' ni. Diyin God doo yéédahósinii ákwii bá haz'ą́.