Read Navajo JOB 19 Bible Online

JOB 19 - Navajo bible

JOB 19

¹Áádóó Job ánááhodoo'niidgo ání,

²Haa nízáágóó lá hinishnánígíí dadohłáashgo saad shik'ijį' dahidoołtáahgo shaa nídaaht'į́į doo?

³Neeznáadi la' t'óó shaa yáhásinígi át'éego shá hadasoohdzíí'; doo nihił baa yádahasingóó doo shéédahonohsingóó yee' ída'doołyaa.

⁴Azhą́ t'áá aaníí asésiih lá nidi, éí t'áá adííghahígo yee' asésiih.

⁵Áko k'ad t'áá aaníí shich'į' ayóó ádanoht'éego áda'doołyaago áádóó bee shich'į' nahwii'nánígíí bee shik'ijį' yádaołti'go

⁶díí baa ákodanohsįįh; Diyin God yee' nahjį' kóshiilaago índa tł'óół naneesdizí shinéineeshee'go át'é.

⁷Jó, doo yá'át'éhígi ádashiłní, nidi ła'da doo shá yiyíists'ą́'í da; saad hoséłį́į́' nidi doo shá baa náhát'į́į da.

⁸Yishááłgóó shidáahdi shich'ą́ą́h adeest'i'go doo bitis dósha' át'ée da. Yishááłgóó chahałheełgo áhoolaa.

⁹Bee shaa ha'niihii ałtso shąąh néíst'įįd; bee shéého'dílzinii shaa néidiidlá.

¹⁰T'áá ałtsodę́ę́' atíshiilaa, áko k'ad áníshdin; tsin sikaad nahjį' hajíítą́ nahalingo shił chohoo'íinii nahjį' kóyiilaa.

¹¹Áádóó ałdó' shich'į' t'óó báhádzidgo báhóóchįįdgo bi'ana'í la' nishłíįgo shaa nitsízkééz.

¹²Bisiláo yinéełii shich'į' yiyííł'aad. Łeeyi' da'deezgeedgo ách'ą́ą́h daní'áago ádayiilaa, áádóó shiníbaal yinaagóó nidahaazná.

¹³Shik'isóó danilíinii doo nádiiníghánígóó shits'éininíłkaad. Diné bił ahéédahasinii nidi doo shich'į' nidaakai da daazlį́į́'.

¹⁴Shik'éí danilíinii doo shaa daókááh át'ée da índa diné hánígo shik'is danilíinii shaa dayooznah.

¹⁵Shighangi naháaztánígíí áádóó asdzání shinaal'a'í éí dé'éyóní nishłį́įgo shaa nitsídaakees índa dabinááł doo bidine'é nishłį́į da nahonishłin.

¹⁶Diné shá naal'a'í, Hágo, bidííniidgo néisiskan nidi, t'áadoo shich'į' haadzíi' da.

¹⁷She'asdzą́ą́ éí shiza' niłchxonígíí doo yiníłdzil da, áádóó shidine'é t'áá ła' bił háíjé'ígíí nidi, doo shit'áahjį' dadikáah da.

¹⁸T'áá aaníí, áłchíní éí dashi'į́, áádóó nídiishnahgo shik'ijį' yádaałti' łeh.

¹⁹Hánígo diné shik'is danilíinii dashi'į́, áádóó diné ayóó ádeínísh'níinii shik'ijį' daazlį́į́'.

²⁰Shikágí éí shits'in bąąh ni'dibał, áádóó t'áá tídzí'ahída shik'i hooldoh.

²¹Shaa a'áhí danoohsįįh, shik'isóó danohłíinii, shaa a'áhí danoohsįįh, háálá Diyin God atíshiilaa.

²²Ha'át'íí lá biniyé Diyin God atíshíł'ínígi át'éego atídashooł'į́, áádóó ánísht'éhígíí haniih doo nihił daasihgóó ádaaht'į́?

²³Dooládó' saad bee yáshti'ígíí naaltsoos bikáá' ádaalyaa laanaa da! Dooládó' naaltsoos bii' bee ak'e'ashchį́įgo bee niit'ą́ą laanaa da!

²⁴Áádóó béésh nitł'izii bee tsé binída'ak'aashgo béésh dilyį́hí ákóne' ahidólyį́įhgo bee shizaad tsé bikáá' noo'níiłgo shizaad tsé bik'i sinilgo ahóyéel'áa laanaa.

²⁵Jó, shił bééhózingo nááshiisnii'ii hiná, áádóó niidoołkáałjį' ayííłką́ągo bí t'éí nihokáa'gi ahidíízį́į doo.

²⁶Áko shikágí ałtso atélyaadóó bik'ijį' shits'íís bee Diyin God yideestsééł.

²⁷T'áá shí hwiideestsééł; shináá' bee hwiideestsééł; t'áá háiida éí dooda.

²⁸Ádadooniidgo, Haa léit'éego atídahodiilnííł lá? T'áá bitł'ááhdę́ę́' bich'į' nahwii'nánígíí nihił béédahoozin dashíínóh'níigo

²⁹diltłish béédadoołdzííł, háálá yéego bibee atí'él'íinii éí diltłish yee atí'oolííł. Áko ánihwiit'aah baa hodoolzhishgo nihił béédahodoozįįł.