Read Navajo JOB 2 Bible Online

JOB 2 - Navajo bible

JOB 2

¹Áádóó náánáłah diyingo nidaal'a'í danilíinii Bóhólníihii yich'į' ádéédahodoolzįįł biniyé náánákai bijį́į́ góne' Séítan ałdó' Bóhólníihii yidááhdóó ádééhodoolzįįł yiniyé náánádzá.

²Áko Bóhólníihii éí Séítan áyidííniid, Háádę́ę'shą' yínááł? Áádóó Séítan éí Bóhólníihii ánéidoo'niidgo ání, Nahasdzáán bikáá'góó táhodishłeeh áádóó nahasdzáán bikáá'góó háádiishdááh.

³Áko Bóhólníihii éí Séítan áyidííniid, Shinaal'a'í Job wolyéiísh baa ákoninizį́į́'? Nahasdzáán bikáá'góó t'áadoo ła' ákójít'éhí da; éí diné t'áadoo bee bik'íhót'ahíii nilį́ áádóó t'áá ákogi ááníiłii nilį́ índa Diyin God yidósin áádóó bąąhági át'éii yá doolnihii nilį́. Azhą́ t'áadoo biniinaanígóó atídeeshłííł biniyé áajį' dashíníyił nidi, t'ahdii dziilí bee doo bina'adlo'góó ba'ahódlíigo hiná.

⁴Áádóó Séítan éí Bóhólníihii áyidííniidgo ání, Akágí biniyégo akágí biniyé dooleeł; t'áá aaníí diné hinánígíí hináa doo biniyé bee hólónígíí t'áá ałtso ádích'ą́ą́h ninéididoo'ááł.

⁵Nidi k'ad, k'ídinílchíidgo bits'in áádóó bitsį' bidinílchíidgo tídílééh, áko t'áá ninii'jį' níídóodzih.

⁶Áádóó Bóhólníihii éí Séítan áyidííniid, Jó, nílááhánee' tídílééh, t'áá hazhó'ó be'iina' t'éí doo haada díílíił da.

⁷Áko Bóhólníihii bits'ą́ąjį' Séítan dah hodiile'go Job bikétł'ááhdóó bitsiit'áajį' ch'ozh yiidííłna'.

⁸Áádóó Job éí hashtł'ish łeets'aa' neheestǫ'ígíí yee ádígaas doo biniyé néidii'ą́ągo łeesch'iihtahdi neezdá.

⁹Áko be'asdzą́ą́ ábidííniid, T'ahdiísh doo shina'adlo'góó yisháał dooleeł nínízin? Doo haniih Diyin God yínídziihgo dantsxaah da.

¹⁰Áádóó Job áhodííniid, Asdzání doo ádahalyánígíí nahalingo la' yáníłti'. Ha'át'íí lá diní? Da' t'áásh aaníí Diyin God éí yá'ádaat'éehii nihaa yiinííł índa doo yá'ádaat'éehii ałdó' doo nihik'ijį' kwííł'į́į da dooleeł? Díí t'áá ałtso kódahóót'įįd lá nidi, Job t'áadoo ádił asiihgo haadzíi' da.

¹¹Ákohgo Job bik'isóó tált'éego éí doo yá'áshóonii t'áá át'é Job bik'i hoole'ígíí dayíínii'go t'ááłá'í nítínígo kéédahat'į́į́dę́ę́' haa yíkai: Élifaz wolyéii Tííman kin haal'áádę́ę́' áádóó Shúwah dine'é Bíldad wolyéii índa Zófar wolyéii Néíyama hoolyéédę́ę́' éí díí ahada'deest'ą́ągo, Hak'édí daniidlį́į doo áádóó hadah ho'ayiilniih doo, daaníigo biniyé haa yíkai.

¹²Áko t'ah nízaadę́ę́' hach'į' yikahgo, doo hwéédahósingóó yéego hadaazhchago bi'éé' ák'indayooldláád, áádóó łeezh dibahí dego adayiighaasgo bitsii'káa'jį' anáhindééh.

¹³T'óó hoł nidzíiztą́ągo t'áadoo hach'į' hadadzidziihí tsosts'id jį́ áádóó tsosts'id tł'éé' azlį́į́', háálá ts'ídá ayóó át'éego t'óó hąąh yínínígi át'éego ti'hojiyoonííh.