Read Navajo JOB 20 Bible Online

JOB 20 - Navajo bible

JOB 20

¹Ákohgo Néíyama hoolyéédę́ę́' Zófar wolyéii ánááhodoo'niidgo ání,

²Shintsíkees yíląądígíí biniinaa tsį́įłgo nich'į' hááhideesdzih nisin.

³Eii ádínínígíí yínísts'ą́ą'go bik'i'diitą́ągo bąąh shíni'go bąą nich'į' hááhideesdzih nisin.

⁴Da' díísh doo nił bééhózin da? Ałk'idą́ą́' nahasdzáán bikáa'gi diné niiltį́į́dóó wóshdę́ę́'

⁵diné doo yá'áshóonii t'óó kónígháníjį' ak'idiyaa danilį́, áádóó t'óó áhodil'íinii yee bił hózhónígíí t'óó deiltse'.

⁶Azhą́ yádił hił yaa ninísą́ą nidi, azhą́ k'os yaa ninísą́ągo bitsiits'iin yee yéhé'náah nidi,

⁷t'áá hó hachaan nahalingo hool'áágóó ázhdoodįįł, diné dahoo'į́į́ nít'ée'ii, Háájí lá ííyá? dahałníi dooleeł.

⁸Ałtso nidziizyeel nahalingo yóó'ajoot'a' doo, áádóó t'áadoo bee hwénáhoodzį́'í da doo. T'áá aaníí, tł'ée'go ił áhoodzaaígi át'éego yóó'ahodí'nóolchééł.

⁹Hoołtsáanii éí doo nááhwiidooltséeł da, índa kééhojit'į́į́ nít'é'ígi doo nááhoot'į́į da doo.

¹⁰Ha'áłchíní éí diné baa dahojoobá'íígíí yił dahóshǫ́ǫ doo biniyé bich'į' hanaalye'é ninádeidiyoodleeł.

¹¹Ániid na'adáhígi át'éego adiih áhát'į́į nidi, yóó'áhodi'doolnííł.

¹²Azhą́ doo yá'áshóonii bizéé' neił'aałgo bił ayóó áhóolką́ą́' lá nidi, azhą́ bitsoo' biyaa góne' nínéidił'į́į́h lá nidi,

¹³azhą́ doo t'áá k'ad haidííł'aalgóó t'áá bizéé' si'ą́ągo áyósin lá nidi,

¹⁴jííyą́'ígíí hatsą́ądi dadíík'ǫshgo tł'iish báhádzidii bik'aasda' bik'e'ashch'íi'go bik'e'íyée'ii át'é.

¹⁵At'į́ aníjiilnah yę́ę éí béézhdoolkoh; Diyin God éí hagháidooził.

¹⁶Tł'iish báhádzidii bik'aasda' hahizdoots'ǫs; na'ashǫ́'ii báhádzidii bik'aasda' hodiyoołhééł.

¹⁷Tooh danílį́įgo doo yizdoołtséeł da; tsés'ná bitł'izh áádóó abe' neesk'įhgo bił danílį́įgo doo yizdoołtséeł da.

¹⁸Bik'é nijishnishii ninázhdidoo'áałgo doo bee ákizhdoodlaał da; hanaalye'é hwee hazlį́į'ii ninázhdoodléełgo t'áadoo baa hoł ninááhoozhǫǫhí da doo.

¹⁹Háálá diné badahojoobá'íígíí bide áhojósin nít'éé' áádóó yóó'azhdíí'ą́; kin t'áadoo ájiilaii t'áá na'níle'dii diné bighazhdeet'ą́.

²⁰T'áá aaníí doo hwiih jileehígíí biniinaa bídin jílíinii doo ła' ni'áádziihsįįh da.

²¹Ałtso ayį́įhgo doo ła' ch'íníłnah da; éí bąą dah ajooléełii doo didoonaał da.

²²Azhą́ adzist'įįdgo t'áadoo bídin náájídlínígóó jideeyáa nidi ts'ídá nahontł'aaígi át'éego hóyoołáałgo ahwíidoołkááł, áádóó bee ach'į' nidahwii'náanii t'áá ałtso hak'i hwiidooleeł.

²³K'adę́ę hwiih jileehgo Diyin God t'áá bí t'óó báhádzidgo yee atí'éł'íinii yee atíhodoolííł áádóó t'ah ajiyą́ągo hak'ijį' naałtin nahalingo íidoolííł.

²⁴Béésh bee ana'al'íinii bik'ee dashdínóochééł, nidi ałtį́į́' béésh łitsoii bee ályaii bee hagházdoolkah.

²⁵K'aa' t'áá nááseego hayi'dę́ę́' haatą́; t'áá aaníí k'aabéésh hatł'izh bii'dę́ę'go haatą́; bi'diskahígíí bił niníyéé'.

²⁶Chahałheełgi hayódí bá hasht'ehoolyaa; kǫ' doo nánílzołii ahodidoołk'ą́ą́ł; haníbaal góne' dadzidziihii adazhdidook'ą́ą́ł.

²⁷Doo ákǫ́ǫ́ ájíít'įįdii yá'ąąshdę́ę́' hats'ą́ą́' báádi'dooltsos; nahasdzáán hach'į' nídidoodááł.

²⁸Haghandóó danilíinii k'ee'ąą dínéest'áanii dah nídahidiildéeh doo, índa Diyin God t'óó báhádzidgo atí'doolííł bijį́įdi hanaalye'é doo bééhodoozįįł da.

²⁹Kót'éego diné doo yá'ájíshóonii Diyin God hach'į' niidoolééł, áádóó Diyin God díí yee há nihodiní'ą́.